Address https://gelex.eu/eli/EU/act/2018/1537@2017-07-18/mt

Contents

1. Preamble
2. (12) Tabella 1 It-traffiku tal-Ajruport Nazzjonali ta' Brussell fil-perjodu ta' bejn l-2005 u l-2015 (traffiku ta' passiġġieri kummerċjali u mhux kummerċjali)
3. (13) Tabella 2 L-iżvilupp tas-sehem ta' traffiku kummerċjali tal-passiġġieri tal-UE/MHUX TAL-UE (eskluż it-traffiku tal-passiġġieri mhux kummerċjali) fl-Ajruport Nazzjonali ta' Brussell matul il-perjodu ta' bejn l-2005 u l-2015
4. (15) Tabella 3 Kumpaniji tal-ajru ewlenin li operaw bi tluq mill-Ajruport nazzjonali ta' Brussell (2012 – 2015)
5. (23)
6. (25)
7. (26) Tabella 4 L-ammont tal-imposta tas-sigurtà għall-perjodu 2013-2017
8. Artikolu 1

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea, u b'mod partikolari l-ewwel subparagrafu tal-Artikolu 108(2) tiegħu,

Wara li kkunsidrat il-Ftehim dwar iż-Żona Ekonomika Ewropea, u b'mod partikolari l-Artikolu 62(1)(a) tiegħu,

Wara li l-partijiet interessati ġew mistiedna jressqu l-kummenti tagħhom skont dawn l-Artikoli u wara li ġew ikkunsidrati dawn il-kummenti,

Billi: PROĊEDURA

(1) Fid-19 ta' Diċembru 2013, stqarrija lill-istampa mill-Kunsill tal-Ministri tal-gvern Belġjan ħabbret li kien ġie approvat abbozz ta' Digriet Irjali għal għajnuna finanzjarja lill-utenti tas-servizzi ta' Brussels Airport Company (minn hawn 'il quddiem BAC), detentur tal-liċenzja operattiva tal-Ajruport Nazzjonali ta' Brussell.

(2) Permezz tal-ittra tal-31 ta' Diċembru 2013, il-Kummissjoni rċeviet ilment dwar dan l-abbozz mingħand International Airlines group (minn hawn 'il quddiem IAG), grupp li jikkontrolla diversi kumpaniji tal-ajru, fosthom British Airways u Iberia.

(3) Permezz tal-ittra tat-2 ta' Jannar 2014, il-kumpanija tal-ajru Ryanair ukoll ressqet ilment kontra dan l-abbozz.

(4) Il-Kummissjoni bagħtet l-ilmenti ta' IAG u ta' Ryanair lill-Belġju u talbitu aktar informazzjoni permezz tal-ittra tat-13 ta' Jannar 2014. Il-Belġju ppreżenta l-kummenti tiegħu permezz tal-ittra tal-5 ta' Frar 2014.

(5) Fis-7 ta' Jannar 2014, ġie adottat id-Digriet Irjali li l-abbozz tiegħu kien ġie ddenunzjat mill-ilmenti msemmija fil-premessi 2 u 3.

(6) Fil-11 ta' Frar 2014, il-Kummissjoni indirizzat talba għal informazzjoni lill-Belġju. Il-Belġju ppreżenta l-osservazzjonijiet tiegħu permezz tal-ittra tat-2 ta' April 2014.

(7) Permezz tal-ittra tal-1 ta' Ottubru 2014, il-Kummissjoni infurmat lill-Belġju dwar id-deċiżjoni tagħha li tiftaħ il-proċedura prevista fl-Artikolu 108(2) TFUE fir-rigward ta' din il-miżura (minn hawn 'il quddiem il-proċedura ta' investigazzjoni formali). Il-Kummissjoni stiednet lill-Belġju jissottometti l-osservazzjonijiet tiegħu u jipprovdi kwalunkwe informazzjoni utli għall-valutazzjoni tal-miżura inkwistjoni. Fis-16 ta' Jannar 2015, il-Belġju bagħat l-osservazzjonijiet tiegħu lill-Kummissjoni.

(8) Id-deċiżjoni tal-Kummissjoni li tiftaħ il-proċedura (minn hawn 'il quddiem id-Deċiżjoni tal-ftuħ) ġiet ippubblikata f'Il-Ġurnal Uffiċjali tal-Unjoni Ewropea. Il-Kummissjoni stiednet lill-partijiet interessati biex jippreżentaw l-osservazzjonijiet tagħhom rigward il-miżura kkonċernata.

(9) Il-Kummissjoni rċeviet osservazzjonijiet mingħand Ryanair, IAG, il-kumpanija tal-ajru Brussels Airlines u mingħand parti oħra interessata li talbet li tibqa' anonima. Il-Kummissjoni bagħtet dawn l-osservazzjonijiet lill-Belġju, li bagħtilha l-kummenti tiegħu dwarhom bl-ittri tal-14 ta' Awwissu 2015 u tat-3 ta' Ġunju 2016.

(10) Permezz tal-ittra tal-10 ta' Frar 2015, il-Kummissjoni talbet informazzjoni lill-Belġju dwar il-miżura inkwistjoni. Il-Belġju wieġeb fit-12 ta' Marzu 2015. Il-Belġju pprovda aktar informazzjoni bl-ittri tal-20 ta' Marzu u tas-16 ta' Mejju 2017.

DESKRIZZJONI TAL-MIŻURA Elementi preliminari – tagħrif ġenerali dwar l-Ajruport Nazzjonali ta' Brussell Il-karatteristiċi tal-ajruport u t-traffiku

(11) L-Ajruport Nazzjonali ta' Brussell jinsab fil-muniċipalità ta' Zaventem fil-Grigal ta' Brussell, 12-il kilometru 'l bogħod minn Brussell.

(12) Tabella 1 It-traffiku tal-Ajruport Nazzjonali ta' Brussell fil-perjodu ta' bejn l-2005 u l-2015 (traffiku ta' passiġġieri kummerċjali u mhux kummerċjali)

Fl-2013, l-ajruport laqa' madwar 19-il miljun passiġġier, bil-kapaċità massima teoretika tal-ajruport tkun stmata għal 35 miljun passiġġier. It-traffiku tal-passiġġieri tal-Ajruport Nazzjonali ta' Brussell mill-2005 'l hawn huwa miġbur fil-qosor fit-Tabella 1. Sena Passiġġieri Movimenti 2005 16179733 (+ 3,50 %) 253255 (– 0,30 %) 2006 16707892 (+ 3,30 %) 254772 (+ 0,60 %) 2007 17877618 (+ 7,10 %) 264366 (+ 3,80 %) 2008 18515730 (+ 3,40 %) 258795 (– 2,10 %) 2009 16999154 (– 8,20 %) 231668 (– 10,5 %) 2010 17180606 (+ 1,10 %) 225682 (– 2,60 %) 2011 18786034 (+ 9,30 %) 233758 (+ 3,60 %) 2012 18971332 (+ 1 %) 223431 (– 4 %) 2013 19133222 (+ 0,90 %) 216678 (– 3 %) 2014 21933190 (+ 14, 60 %) 231528 (+ 6, 90 %) 2015 23460018 (+ 7 %) 239349 (+ 3, 40 %)

(13) Tabella 2 L-iżvilupp tas-sehem ta' traffiku kummerċjali tal-passiġġieri tal-UE/MHUX TAL-UE (eskluż it-traffiku tal-passiġġieri mhux kummerċjali) fl-Ajruport Nazzjonali ta' Brussell matul il-perjodu ta' bejn l-2005 u l-2015

L-Ajruport Nazzjonali ta' Brussell huwa essenzjalment miftuħ għat-traffiku kummerċjali Ewropew u internazzjonali. It-Tabella 2 tiġbor fil-qosor is-sehem tat-traffiku Ewropew u internazzjonali tal-passiġġieri mit-traffiku totali tal-ajruport. UE MHUX TAL-UE TOTAL 2005 11089996 (68,74 %) 5043410 (31,26 %) 16133406 2006 11760414 (70,56 %) 4906108 (29,44 %) 16666522 2007 12235290 (68,59 %) 5602924 (31,41 %) 17838214 2008 11986491 (64,9 %) 6493416 (35,1 %) 18479907 2009 10730415 (63,2 %) 6240239 (36,8 %) 16970654 2010 10530785 (61,4 %) 6618631 (38,6 %) 17149416 2011 11650291 (62,1 %) 7105912 (37,9 %) 18756203 2012 11437193 (60,4 %) 7506495 (39,6 %) 18943688 2013 11661585 (61 %) 7443813 (39 %) 19105398 2014 14134723 (64,5 %) 7770000 (35,5 %) 21904723 2015 15549806 (66,4 %) 7873461 (33,6 %) 23423267

(14) L-Ajruport Nazzjonali ta' Brussell iservi bħala hub għal diversi kumpaniji tal-ajru bħal Brussels Airlines u l-kumpaniji tal-ajru li jikkooperaw magħha fl-alleanza Star Alliance, kif ukoll Jet Airways.

(15) Tabella 3 Kumpaniji tal-ajru ewlenin li operaw bi tluq mill-Ajruport nazzjonali ta' Brussell (2012 – 2015)

It-Tabella 3 tiddeskrivi t-traffiku tal-kumpaniji tal-ajru ewlenin li operaw fl-Ajruport Nazzjonali ta' Brussell fil-perjodu ta' bejn l-2012 u l-2015: Numri ta' passiġġieri li telqu mill-ajruport (inklużi l-passiġġieri fi transitu u fi trasferiment) 2012 2013 Brussels Airlines 2931025 2957455 TUI Airlines Belgium 720655 725800 Thomas Cook Airlines Belgium 411093 411636 Lufthansa 420072 410153 easyJet 382875 396969 Numru ta' passiġġieri li telqu mill-ajruport (inklużi l-passiġġieri fi transitu u fi trasferiment) 2014 2015 Brussels Airlines 3351032 3750725 Ryanair 639335 908990 TUI Airlines Belgium 813014 803200 easyJet 499129 496576 Lufthansa 413618 438253 Thomas Cook Airlines Belgium 428737 423671

(16) Minn Frar 2014, l-Ajruport Nazzjonali ta' Brussell beda jilqa' lill-kumpaniji tal-ajru low-cost Ryanair u Vueling. Mal-wasla tagħha fl-Ajruport Nazzjonali ta' Brussell, Ryanair fetħet disa' rotot minn hemmhekk u stabbiliet it-tieni bażi tagħha fil-Belġju wara dik fl-ajruport ta' Charleroi.

L-operat u s-sjieda tal-infrastruttura tal-ajruport - BAC

(17) Mill-2004, BAC tieħu ħsieb il-ġestjoni tal-Ajruport Nazzjonali ta' Brussell skont id-Digriet Irjali tas-27 ta' Mejju 2004 (minn hawn 'il quddiem id-Digriet Irjali tas-27 ta' Mejju 2004). BAC hija wkoll is-sid tal-faċilitajiet tal-ajruport.

(18) BAC hija s-suċċessur tal-kumpanija pubblika b'responsabbiltà limitata msejħa Brussels International Airport Company (BIAC).

(19) BAC hija kumpanija privata. 75 % tal-ishma ta' BAC huma miżmuma minn investituri privati: 38,99 % minn fond ta' pensjoni Kanadiż u 36,01 % minn grupp Awstraljan. Il-bqija tal-ishma (25 %) huma miżmuma mill-Istat Belġjan. Il-Bord tad-Diretturi huwa magħmul minn 11-il membru li erbgħa minnhom, fosthom il-President tal-Bord tad-Diretturi, huma maħtura mill-Istat Belġjan.

Qafas regolatorju dwar il-ġestjoni tal-Ajruport Nazzjonali ta' Brussell

(20) Skont l-Artikolu 6(1)(X)(7) tal-Att Speċjali tat-8 ta' Awwissu 1980 dwar ir-Riformi Istituzzjonali, ir-responsabbiltà tat-tagħmir u tal-operat tal-ajruporti taqa' taħt il-ġurisdizzjoni tar-reġjuni, ħlief għall-Ajruport Nazzjonali ta' Brussell li l-operat tiegħu jaqa' taħt il-ġurisdizzjoni tal-Istat Federali.

(21)1. Il-Kapitolu IV tad-Digriet Irjali tas-27 ta' Mejju 2004 jiddefinixxi l-kundizzjonijiet tal-operat tal-faċilitajiet tal-Ajruport Nazzjonali ta' Brussell. Dan l-operat huwa soġġett għall-għoti minn qabel b'Digriet Irjali ta' liċenzja operattiva individwali għal żmien indeterminat. L-Artikolu 30 tad-Digriet Irjali tas-27 ta' Mejju 2004 jipprevedi li d-detentur tal-liċenzja operattiva għandu, b'mod partikolari: iżomm u jiżviluppa l-faċilitajiet tal-ajruport f'kundizzjonijiet ekonomikament aċċettabbli sabiex jiżgura s-sigurtà tal-persuni u s-sikurezza tal-faċilitajiet tal-ajruport, iċ-ċertifikazzjoni kontinwa tal-faċilitajiet tal-ajruport, kapaċità suffiċjenti, skont l-iżvilupp tad-domanda u tar-rwol internazzjonali tal-Ajruport Nazzjonali ta' Brussell, u livell għoli ta' kwalità;

(22) Il-liċenzja operattiva tal-Ajruport Nazzjonali ta' Brussell ingħatat lil B.I.A.C. (li saret BAC fl-2013) permezz tad-Digriet Irjali tal-21 ta' Ġunju 2004 (minn hawn 'il quddiem id-Digriet Irjali tal-21 ta' Ġunju 2004). L-Artikolu 4(4) ta' dan id-Digriet Irjali jipprevedi li d-detentur tal-liċenzja operattiva jiżgura (…) li jżomm is-sikurezza u s-sigurtà fuq l-art, minbarra l-kompiti tal-pulizija ġenerali u l-ispezzjoni ajrunawtika, kif ukoll il-kompiti militari..

(23) Fl-Ajruport Nazzjonali ta' Brussell, hemm attivitajiet regolati li r-rikavat li jista' jdaħħal minnhom id-detentur tal-liċenzja operattiva tal-ajruport (in casu, BAC) huwa kkontrollat skont formula ta' kontroll tat-tariffi, intiża biex tillimita l-evoluzzjoni tar-rikavat miġbur għal kull unità ta' traffiku għal dawn l-attivitajiet. L-attivitajiet regolati huma dawn li ġejjin:

(23)

(a) l-inżul u t-tluq tal-ajruplani;

(b) l-ipparkjar tal-ajruplani;

(c) l-użu mill-passiġġieri tal-faċilitajiet tal-ajruport disponibbli għalihom;

(d) il-forniment tal-fjuwil tal-magni għall-ajruplani permezz ta' infrastruttura ċentralizzata;

(e) is-servizzi għall-iżgurar tas-sigurtà tal-passiġġieri u tas-sikurezza tal-faċilitajiet tal-ajruport.

(24) L-Artikolu 30(7) tad-Digriet Irjali tas-27 ta' Mejju 2004 jipprevedi li sistema ta' tariffi, li tikkostitwixxi sett koerenti ta' imposti tal-ajruport, kif ukoll il-formula ta' kontroll tat-tariffi msemmija fil-premessa 23 jiġu stabbiliti mid-detentur tal-liċenzja operattiva, wara li jikkonsulta mal-organizzazzjonijiet li jirrappreżentaw lill-utenti. Il-formula ta' kontroll tat-tariffi hija intiża sabiex tillimita l-iżvilupp tar-rikavat li d-detentur tal-liċenzja operattiva jista' jdaħħal għal kull unità ta' traffiku għall-attivitajiet irregolati.

(25) Barra minn hekk, l-Artikolu 42 tad-Digriet Irjali tal-21 ta' Ġunju 2004 jistipula li l-formula ta' kontroll tat-tariffi u s-sistema ta' tariffi msemmijin fl-Artikolu 30(7) tad-Digriet Irjali tas-27 ta' Mejju 2004 għandhom ikunu stabbiliti b'mod li: L-Artikolu 43 tad-Digriet Irjali tal-21 ta' Ġunju 2004 jipprevedi li s-sistema ta' tariffi, il-formula tal-kontroll tat-tariffi u l-iżvilupp annwali tagħhom għandhom jiġu stabbiliti minn BAC, wara li tikkonsulta mal-utenti tal-ajruport, għal perjodu ta' regolazzjoni ffissat għal ħames snin (mill-1 ta' April tas-sena n sal-31 ta' Marzu tas-sena n + 5). Jekk ma tasalx notifika ta' nuqqas ta' qbil ġustifikat mingħand utent tal-ajruport mal-proposta tat-tariffi fformulata minn BAC, il-partijiet ikunu qablu dwar is-sistema tat-tariffi u l-formula ta' kontroll tat-tariffi, skont l-Artikolu 55(1) tad-Digriet Irjali tal-21 ta' Ġunju 2004. Jekk mill-inqas żewġ kumpaniji mhux relatati li kull waħda minnhom tirrappreżenta minn tal-anqas jew 1 % tal-movimenti annwali jew 1 % tal-passiġġieri annwali, u li flimkien jirrappreżentaw minn tal-anqas jew 25 % tal-movimenti annwali jew 25 % tal-passiġġieri fis-sena kalendarja ta' qabel il-konsultazzjoni tal-utenti tal-ajruport jirrifjutaw il-formula ta' kontroll tat-tariffi jew is-sistema ta' tariffi, dawn jistgħu jippreżentaw rikors motivat quddiem l-awtorità regolatorja ekonomika. L-awtorità regolatorja ekonomika tista' mbagħad tivvalida l-formula ta' kontroll tat-tariffi u s-sistema tat-tariffi jew teżiġi ċerti adattamenti jew emendi fil-formula ta' kontroll tat-tariffi u/jew fis-sistema tat-tariffi. Il-formula ta' kontroll tat-tariffi u s-sistema tat-tariffi mbagħad jiġu soġġetti għad-deċiżjoni tal-Ministru responsabbli min-navigazzjoni bl-ajru qabel ma jiġu ppubblikati fil-Moniteur belge. L-imposta tas-sigurtà msemmija fil-premessa 26 tiġi stabbilita skont l-istess proċedura.

(25)

1. jirriflettu t-total tal-ispejjeż irregolati fuq il-bażi tar-riżultati tal-mudell tal-kostijiet ABC;

2. jiżguraw marġni ta' profitt ġust għall-kapital investit, bl-għan li jiġi żgurat, b'mod partikolari, l-iżvilupp tal-faċilitajiet tal-ajruport (…);

3. jallinjaw it-tariffi tal-imposti tal-ajruport tal-attivitajiet irregolati mal-prassi tat-tariffi tal-ajruporti ta' referenza abbażi tar-riżultati tal-mudell tat-tariffi ta' referenza.

(26) Tabella 4 L-ammont tal-imposta tas-sigurtà għall-perjodu 2013-2017

Kif speċifikat fil-premessa 23 taħt il-punt 23(e), ta' din id-Deċiżjoni, is-servizzi li jiżguraw is-sigurtà tal-passiġġieri u s-sikurezza tal-faċilitajiet tal-ajruport jagħmlu parti mill-attivitajiet irregolati. Biex tiffinanzja dawn is-servizzi, BAC titlob lill-kumpaniji tal-ajru jħallsu imposta tas-sigurtà (security charge) għal kull passiġġier li jitlaq mill-Ajruport Nazzjonali ta' Brussell. Perjodu L-ammont tal-imposta tas-sigurtà (għal kull passiġġier li jitlaq mill-ajruport, f'EUR) 1 ta' Jannar 2013 – 31 ta' Marzu 2013 6,39 1 ta' April 2013 – 31 ta' Marzu 2014 6,62 1 ta' April 2014 – 31 ta' Marzu 2015 6,71 1 ta' April 2015 – 31 ta' Marzu 2016 6,73 1 ta' April 2016 – 31 ta' Marzu 2017 6,19

(27) Matul il-perjodu inkwistjoni, l-imposta tas-sigurtà applikata minn BAC kienet ammont wieħed għal kull passiġġier li jitlaq mill-ajruport, mingħajr distinzjoni bejn it-tip ta' passiġġier (passiġġier li l-punt tat-tluq tal-itinerarju bl-ajru tiegħu huwa l-Ajruport Nazzjonali ta' Brussell, passiġġier fi trasferiment jew passiġġier fi transitu).

Id-Digriet Irjali tas-7 ta' Jannar 2014

(28) Il-miżura li hija s-suġġett ta' din id-Deċiżjoni hija l-għoti ta' sussidji, skont id-Digriet Irjali tas-7 ta' Jannar 2014, (minn hawn 'il quddiem id-Digriet Irjali tas-7 ta' Jannar 2014), lil diversi kumpaniji tal-ajru, li ġejjin mill-fondi li rċeviet BAC mingħand il-Gvern Federali Belġjan u ridistribwiti skont regoli stabbiliti mid-Digriet Irjali msemmi.

(29) Skont l-Artikolu 1 tad-Digriet Irjali tas-7 ta' Jannar 2014, sussidju li jammonta għal EUR 19000000 fis-sena huwa allokat lil BAC bħala appoġġ għall-infrastruttura relatata mas-sigurtà, jiġifieri mal-attivitajiet kollha li jiżguraw is-sigurtà tal-passiġġieri u tal-faċilitajiet tal-ajruport, bħall-kontroll tal-passiġġieri u tal-bagalji tagħhom malli jidħlu fiż-żona riservata tal-ajruport biex jiġi identifikat kwalunkwe splussiv jew arma jew kwalunkwe oġġett perikoluż ieħor. Dan is-sussidju għandu jingħata għas-snin baġitarji 2014, 2015 u 2016. Jitħallas kull sena fil-kont ta' BAC sa mhux aktar tard mill-31 ta' Marzu ta' kull sena.

(30) Skont l-Artikolu 2(1) tad-Digriet Irjali tas-7 ta' Jannar 2014, BAC għandha tqassam lura lill-utenti tal-Ajruport Nazzjonali ta' Brussell li jkunu ġarrew aktar minn 400000 passiġġier li jitilqu bejn l-1 ta' Jannar u l-31 ta' Diċembru 2012, esklużi l-passiġġieri fi transitu u fi trasferiment, is-sussidju msemmi fl-Artikolu 1 tal-imsemmi Digriet Irjali għal ammont korrispondenti għal sehem ta' dak imħallas minnhom bħala servizzi għas-sigurtà tal-passiġġieri u s-sigurtà tal-faċilitajiet tal-ajruport matul is-sena ta' qabel.

(31) L-Artikolu 2(2) tad-Digriet Irjali tas-7 ta' Jannar 2014 jispeċifika li l-ammont imħallas lura lil kull utent li jirrispetta l-kundizzjonijiet imsemmija fl-Artikolu 2(1) tal-imsemmi Digriet Irjali huwa kkalkulat kull sena abbażi tan-numru ta' passiġġieri li jitilqu mill-ajruport, inklużi l-passiġġieri fi transitu u fi trasferiment, għas-snin 2013, 2014 u 2015; lil hinn mill-400000 passiġġier fis-sena, l-utent huwa eżenti milli jħallas is-servizzi għas-sigurtà tal-passiġġieri u għas-sigurtà tal-faċilitajiet tal-ajruport għas-snin 2013, 2014 u 2015, għal ammont totali massimu ta' 19-il miljun euro (EUR 19000000) fis-sena.

(32) L-Artikolu 4 tad-Digriet Irjali tas-7 ta' Jannar 2014 jistipula li din il-miżura baġitarja se tiġi vvalutata matul is-sena 2015 sabiex tkun tista' tiġi adattata qabel ma jibda l-perjodu l-ġdid tat-tariffi 2016-2021. Il-perjodu ta' tariffi msemmi f'din id-dispożizzjoni jikkorrispondi għall-perjodu ta' ħames snin ta' regolamentazzjoni tat-tariffi tal-imposti tal-Ajruport Nazzjonali ta' Brussell, kif previst fl-Artikolu 43 tad-Digriet Irjali tal-21 ta' Ġunju 2004.

(33) Id-Digriet Irjali tas-7 ta' Jannar 2014 jistipula li jibda jgħodd mill-1 ta' Jannar 2013.

Pagamenti mħallsa skont id-Digriet Irjali tas-7 ta' Jannar 2014

(34) Għall-kuntrarju ta' dak li jipprovdi l-Artikolu 2(1) tad-Digriet Irjali tas-7 ta' Jannar 2014 (… BAC għandha tqassam mill-ġdid lill-utenti tal-Ajruport Nazzjonali ta' Brussell (…) is-sussidju msemmi fl-Artikolu 1(…)), il-Belġju għadda l-pagamenti dovuti direttament lill-kumpaniji tal-ajru mingħajr ma għaddew minn BAC.

(35) Skont il-Belġju, f'ittra tat-8 ta' Lulju 2014, BAC talbet espressament lill-awtoritajiet Belġjani jħallsu direttament l-ammonti fuq il-kontijiet bankarji tal-kumpaniji tal-ajru benefiċjarji sabiex tiġi ffaċilitata l-implimentazzjoni amministrattiva tad-Digriet Irjali tas-7 ta' Jannar 2014.

(36) Fit-12 ta' Settembru 2014, il-Kunsill tal-Ministri ħa nota tax-xewqa ta' BAC espressa fl-ittra tagħha tat-8 ta' Lulju 2014 u approva s-simplifikazzjoni tal-proċedura proposta, jiġifieri l-ħlas dirett tal-ammonti kkonċernati fil-kontijiet bankarji tal-kumpaniji tal-ajru benefiċjarji.

(37) Fit-22 ta' Settembru 2014, il-kumpaniji tal-ajru li kienu jissodisfaw il-kriterji previsti mid-Digriet Irjali tas-7 ta' Jannar 2014, jiġifieri Brussels Airlines, TUI Airlines Belgium u Thomas Cook Airlines Belgium, irċevew rispettivament EUR 16779819, EUR 2143621 u EUR 76560, għas-sena 2013.

(38) Il-Belġju pprovda d-dettalji tal-kalkoli ta' dawn l-ammonti, u b'hekk iċċara l-metodi tal-applikazzjoni tad-Digriet Irjali tas-7 ta' Jannar 2014.

(39) Il-Belġju l-ewwel nett iddetermina li tliet kumpaniji tal-ajru biss, Brussels Airlines, TUI Airlines Belgium u Thomas Cook Airlines Belgium kienu eliġibbli għall-iskema, minħabba li l-ebda kumpanija tal-ajru oħra ma kienet ġarret aktar minn 400000 passiġġier li telqu bejn l-1 ta' Jannar u l-31 ta' Diċembru 2012, esklużi l-passiġġieri fi transitu u fi trasferiment.

(40) L-ammonti dovuti għal kull waħda minn dawn it-tliet kumpaniji fl-2014 ġew ikkalkulati skont in-numru ta' passiġġieri li telqu mill-ajruport fuq l-ajruplani ta' kull waħda minnhom f'kull xahar tas-sena 2013, inklużi l-passiġġieri fi trasferiment u fi transitu. Għal kull kumpanija, ġew identifikati ix-xahar li matulu nqabeż il-livell limitu ta' 400000 passiġġier li telqu mill-ajruport u ttrasportati mill-1 ta' Jannar 2013 u l-imposta tas-sigurtà fis-seħħ f'dak ix-xahar. Imbagħad ġie kkalkulat l-ammont tal-imposta tas-sigurtà dovut minn kull kumpanija, xahar b'xahar, għal kull passiġġier trasportat mill-1 ta' Jannar 2013 minbarra l-ewwel 400000 passiġġier. Dan l-ammont jikkorrispondi għas-sussidju li huwa dovut lill-kumpanija tal-ajru skont id-Digriet Irjali tas-7 ta' Jannar 2014 fin-nuqqas ta' livell massimu tal-baġit.

(41) Biex jiġi rrispettat il-livell massimu tal-baġit ta' EUR 19000000 fis-sena, ġiet applikata mbagħad regola ta' tlieta għal kull wieħed mit-tliet ammonti kkalkulati b'dan il-mod, sabiex jiġi stabbilit l-ammont effettivament dovut lil kull kumpanija tal-ajru għas-sena 2013.

Benefiċjarji

(42) Fid-Deċiżjoni tal-ftuħ, il-Kummissjoni identifikat il-kumpaniji tal-ajru li jissodisfaw il-kriterji stabbiliti fl-Artikolu 2(1) tad-Digriet Irjali tas-7 ta' Jannar 2014 bħala l-uniċi benefiċjarji potenzjali tal-miżura li jaf tikkostitwixxi għajnuna mill-Istat li hija s-suġġett tal-proċedura ta' investigazzjoni formali.

Sospensjoni tal-applikazzjoni tad-Digriet Irjali tas-7 ta' Jannar 2014

(43) Wara l-ftuħ tal-proċedura ta' investigazzjoni formali, il-Belġju ddeċieda li jissospendi l-eżekuzzjoni tad-Digriet Irjali tas-7 ta' Jannar 2014 mit-3 ta' Diċembru 2014, bħala prekawzjoni u mingħajr preġudizzju għall-pożizzjoni tiegħu rigward l-evalwazzjoni preliminari li għamlet il-Kummissjoni fid-Deċiżjoni tal-ftuħ. Il-Belġju ntrabat li, sa avviż ieħor, ma jagħmel ebda pagament taħt id-Digriet Irjali msemmi. Skont l-informazzjoni li għandha l-Kummissjoni, il-Belġju żamm dan l-impenn.

Id-Digriet Irjali tal-15 ta' Marzu 2017

(44) Fil-15 ta' Marzu 2017, ġie adottat digriet irjali (minn hawn 'il quddiem id-Digriet Irjali tal-15 ta' Marzu 2017) li jirtira d-Digriet Irjali tas-7 ta' Jannar 2014.

(45) Barra minn hekk, skont l-Artikolu 2 tad-Digriet Irjali tal-15 ta' Marzu 2017, is-sussidji previsti mid-Digriet Irjali rtirat u miġbura waqt li kien fis-seħħ mill-kumpaniji tal-ajru kkonċernati, jiġifieri mill-1 ta' Jannar 2013 sas-7 ta' Jannar 2014, għandhom jitħallsu lura lill-awtoritajiet federali Belġjani sa mhux aktar tard mill-31 ta' Marzu 2017. Dan l-Artikolu jipprevedi wkoll li l-ammonti li għandhom jiġu rkuprati jagħtu lok għall-ħlas tal-imgħax li jibda mid-data li fiha s-sussidji ngħataw lill-benefiċjarju sal-irkupru effettiv tagħhom. L-imgħax għandu jiġi kkalkulat skont il-Kapitolu V tar-Regolament tal-Kummissjoni (KE) Nru 794/2004. Il-Belġju ppreżenta lill-Kummissjoni dokument li juri li Brussels Airlines, TUI Airlines Belgium u Thomas Cook Airlines Belgium ħallsu lura s-sussidji kollha li rċevew, bl-imgħaxijiet, skont l-Artikolu 2 tad-Digriet Irjali tal-15 ta' Marzu 2017.

IR-RAĠUNIJIET LI WASSLU GĦALL-FTUĦ TAL-PROĊEDURA TA' INVESTIGAZZJONI FORMALI

(46) Fid-Deċiżjoni tal-ftuħ tagħha, il-Kummissjoni kkunsidrat l-ewwel nett l-eżistenza ta' għajnuna mill-Istat lill-kumpaniji tal-ajru li jissodisfaw il-kundizzjonijiet definiti fl-Artikolu 2(1) tad-Digriet Irjali tas-7 ta' Jannar 2014. Imbagħad indirizzat il-kwistjoni tal-kompatibbiltà ta' din l-għajnuna eventwali. Fl-aħħar nett hija eżaminat il-kwistjoni tal-illegalità ta' din l-għajnuna eventwali u tal-irkupru eventwali tagħha.

(47) Rigward l-eżistenza ta' għajnuna mill-Istat, il-Kummissjoni analizzat l-ewwel nett l-attività tal-benefiċjarji tal-miżura inkwistjoni. Peress li l-utenti tal-Ajruport Nazzjonali ta' Brussell li lilhom BAC trid tqassam mill-ġdid is-sussidju huma kumpaniji tal-ajru, il-Kummissjoni qieset li l-attività tagħhom hija ekonomika skont l-Artikolu 107(1) TFUE.

(48) Fir-rigward tal-preżenza ta' riżorsi tal-Istat u tal-imputabilità tal-miżura lill-Istat, il-Kummissjoni nnutat li s-sussidju ngħata skont Digriet Irjali u ġie ffinanzjat mill-baġit tal-Belġju, b'mod aktar speċifiku l-baġit tas-Servizz pubbliku federali tal-Mobilità u t-Trasport. Barra minn hekk, skont l-Artikolu 2(1) tad-Digriet Irjali tas-7 ta' Jannar 2014, BAC għandha tqassam lura s-sussidju msemmi fl-Artikolu 1 ta' dan id-Digriet Irjali lill-utenti tal-Ajruport Nazzjonali ta' Brussell li jkunu ġarrew aktar minn 400000 passiġġier (esklużi l-passiġġieri fi transitu u fi trasferiment) fi tluq mill-ajruport bejn l-1 ta' Jannar u l-31 ta' Diċembru 2012, skont regoli definiti għal kollox mill-imsemmi Digriet Irjali. Għaldaqstant il-Kummissjoni qieset li l-miżura, li tikkonsisti fi ħlasijiet lil ċerti kumpaniji tal-ajru skont l-Artikolu 2 tad-Digriet Irjali, kienet imputabbli lill-Belġju u ffinanzjata minn riżorsi tal-Istat.

(49) Rigward il-preżenza ta' vantaġġ ekonomiku għall-kumpaniji tal-ajru, il-Kummissjoni nnutat li, skont l-Artikolu 2 tad-Digriet Irjali tas-7 ta' Jannar 2014, BAC ma kinitx libera li ma tbiddilx l-imposti miġbura mingħand il-kumpaniji tal-ajru ladarba s-sussidju mogħti minn dan id-Digriet Irjali jkun inġabar, iżda kellha tagħti lil ċerti kumpaniji tal-ajru l-effetti ta' dan is-sussidju, li jikkostitwixxi vantaġġ ekonomiku għal dawn il-kumpaniji.

(50) Il-Kummissjoni kkonkludiet ukoll b'mod preliminari li l-miżura hija selettiva. Minnha jistgħu jibbenefikaw biss il-kumpaniji tal-ajru li użaw l-Ajruport Nazzjonali ta' Brussell u li ssodisfaw għadd ta' kundizzjonijiet ta' traffiku fl-Ajruport Nazzjonali ta' Brussell fl-2012. Skont l-analiżi preliminari tal-Kummissjoni, l-eliġibbiltà tal-kumpaniji tal-ajru għall-iskema kkonċernata hija bbażata fuq kriterji diskriminatorji, mingħajr ebda rabta mal-għan u n-natura tal-miżura, u li fil-fatt jiffavorixxu tliet kumpaniji tal-ajru u jeskludu mingħajr ebda raġuni valida lill-utenti kollha l-oħrajn tal-Ajruport Nazzjonali ta' Brussell.

(51) Il-Kummissjoni kkonstatat b'mod preliminari li dan il-vantaġġ selettiv seta' joħloq distorsjonijiet fil-kompetizzjoni fis-suq intern u jaffettwa l-kummerċ bejn l-Istati Membri sa fejn seta' jippermetti lill-kumpaniji tal-ajru kkonċernati jħaddmu politika ta' tariffi aktar aggressiva, kif ukoll iżommu jew iżidu artifiċjalment l-offerta tas-servizzi pprovduti meta mqabbla mal-kundizzjonijiet normali tas-suq.

(52) Minn dan il-Kummissjoni kkonkludiet b'mod preliminari li s-sussidju li ħadu l-kumpaniji tal-ajru benefiċjarji kien għajnuna mill-Istat skont l-Artikolu 107(1) TFUE.

(53) Il-Kummissjoni kkonstatat ukoll fid-Deċiżjoni tal-ftuħ tagħha li ma kienx hemm bażi ġuridika li teżenta lill-Belġju milli jinnotifika din l-għajnuna taħt l-Artikolu 108(4) TFUE. B'mod partikolari, il-Kummissjoni nnutat li s-sussidji inkwistjoni ma kinux koperti mir-Regolament għal Eżenzjoni Ġenerali Sħiħa skont il-kategorija peress li ma kinux jissodisfaw il-kundizzjonijiet stipulati fil-Kapitolu I tal-imsemmi Regolament. Il-Kummissjoni stmat li l-miżura tista' tikkostitwixxi għajnuna illegali, peress li d-Digriet Irjali tas-7 ta' Jannar 2014 daħal fis-seħħ mingħajr ma ġie nnotifikat lill-Kummissjoni.

(54) Fl-aħħar nett, il-Kummissjoni esprimiet dubji rigward il-kompatibbiltà tal-għajnuna eventwali mas-suq intern, l-aktar fid-dawl tal-Linji Gwida tal-Kummissjoni tal-4 ta' April 2014 dwar l-għajnuna mill-Istat għall-ajruporti u l-linji tal-ajru (minn hawn 'il quddiem il-Linji Gwida dwar l-Avjazzjoni) li ma jipprevedux li l-għajnuna mill-Istat tista' tingħata lil kumpaniji tal-ajru għall-attivitajiet tagħhom ta' tluq mill-ajruport li jilqgħu aktar minn ħames miljun passiġġier fis-sena li mhumiex f'reġjuni mbiegħda, bħall-Ajruport Nazzjonali ta' Brussell.

IL-KUMMENTI TAL-BELĠJU DWAR ID-DEĊIŻJONI TA' FTUĦ

(55) Fil-15 ta' Jannar 2015, il-Belġju bagħat il-kummenti tiegħu lill-Kummissjoni dwar id-Deċiżjoni tal-ftuħ.

Fir-rigward tal-eżistenza ta' għajnuna mill-Istat

(56) Il-Belġju jfakkar l-ewwel nett il-kundizzjonijiet kumulattivi meħtieġa għall-kwalifika ta' miżura bħala għajnuna mill-Istat, l-aktar il-fatt li 1) il-benefiċjarju jew benefiċjarji jridu jkunu impriżi skont l-Artikolu 107(1) TFUE, 2) il-miżura inkwistjoni trid tingħata permezz ta' riżorsi mill-Istat u trid tkun imputabbli lill-Istat, 3) il-miżura trid tagħti vantaġġ lill-benefiċjarju jew benefiċjarji tagħha u dan il-vantaġġ irid ikun selettiv, u 4) il-miżura inkwistjoni trid toħloq distorsjoni jew thedded li toħloq distorsjoni u trid taffettwa l-kummerċ bejn l-Istati Membri.

(57) Imbagħad il-Belġju jispeċifika li huwa ma jikkontestax li l-miżura inkwistjoni hija imputabbli lill-Istat u li tista' eventwalment taffettwa l-kummerċ bejn l-Istati Membri.

(58) Iżda l-Belġju jikkunsidra li mhuwiex 1) sussidju mogħti lil impriża li twettaq attività ekonomika, u lanqas 2) vantaġġ selettiv, li huwa biżżejjed biex jeskludi li l-miżura stabbilita mid-Digriet Irjali tas-7 ta' Jannar 2014 tikkwalifika bħala għajnuna mill-Istat.

(59) L-argumenti mressqa mill-Belġju insostenn ta' dawn iż-żewġ konklużjonijiet huma miġbura fil-qosor fil-premessi minn 60 sa 72.

Dwar il-kunċett ta' impriża u ta' attività ekonomika

(60) Il-Belġju jinnota li l-kunċett ta' impriża fis-sens tal-Artikolu 107 TFUE, jinkludi kwalunkwe entità li twettaq attività ekonomika, irrispettivament mill-istatus ġuridiku ta' din l-entità u mill-mod kif hija ffinanzjata.

(61) Huwa jenfasizza wkoll li l-attivitajiet imwettqa bħala parti mill-eżerċizzju ta' prerogattivi ta' awtorità pubblika mhumiex meqjusa ekonomiċi.

(62) Fil-każ tal-ajruporti, attivitajiet bħal dawn jinkludu b'mod partikolari s-sigurtà, il-kontroll tat-traffiku tal-ajru u l-pulizija.

(63) Skont il-Belġju, minn dan jirriżulta li l-attivitajiet relatati mas-sigurtà fl-ajruporti ma jikkostitwixxux attività ekonomika u li l-finanzjament tagħhom mhuwiex għalhekk għajnuna mill-Istat.

(64) F'dan ir-rigward, il-Belġju jikkunsidra li huwa possibbli li entità tgħaqqad l-eżerċizzju tal-prerogattivi ta' awtorità pubblika mal-eżerċizzju ta' ċerti attivitajiet ekonomiċi, u li din l-entità tkun għalhekk soġġetta għar-regoli applikabbli għall-għajnuna mill-Istat biss f'dak li jirrigwarda l-attivitajiet ekonomiċi tagħha.

(65) Il-Belġju jqis li l-finanzjament tas-servizzi għas-sigurtà tal-ajruport, kif stabbilit mid-Digriet Irjali tas-7 ta' Jannar 2014, ma jikkostitwixxix għajnuna mill-Istat peress li dawn l-attivitajiet jaqgħu taħt l-eżerċizzju tal-prerogattivi ta' awtorità pubblika.

Dwar l-eżistenza ta' vantaġġ selettiv

(66) Il-Belġju jikkunsidra wkoll li l-miżura inkwistjoni ma tagħtix vantaġġ lill-benefiċjarji tagħha fis-sens tar-regoli dwar l-għajnuna mill-Istat.

(67) B'mod aktar speċifiku, huwa jirreferi għall-fatt li l-eżistenza ta' vantaġġ għandha tiġi stabbilita permezz ta' paragun bejn is-sitwazzjoni eżaminata u s-sitwazzjoni normali.

(68) Għaldaqstant, biex tiġi evalwata l-eżistenza ta' vantaġġ fis-sens tar-regoli dwar l-għajnuna mill-Istat f'dan il-każ, jeħtieġ, skont il-Belġju, li jsir paragun bejn il-miżura eżaminata f'din il-proċedura u sitwazzjoni simili fil-Belġju, sabiex jiġi vverifikat jekk il-miżura kkontestata tagħtix jew le tali vantaġġ lill-kumpaniji tal-ajru benefiċjarji.

(69) Il-Belġju jispeċifika li, sal-adozzjoni tal-miżura inkwistjoni, l-Ajruport Nazzjonali ta' Brussell biss kien jitlob imposta mingħand l-utenti tiegħu għall-ispejjeż tas-sigurtà ġġenerati mill-użu tagħhom tal-ajruport, mingħajr intervent pubbliku. Skont il-Belġju, dan jiddistingwi lill-Ajruport Nazzjonali ta' Brussell mis-sitwazzjoni tal-ajruporti l-oħrajn li jinsabu fir-reġjun ta' Walloon u fir-reġjun Fjamming, fejn l-ispejjeż kollha relatati mas-servizzi tas-sigurtà tal-ajruport huma mħallsa mir-reġjuni kkonċernati. Il-Belġju jirreferi għad-Deċiżjoni tal-Kummissjoni tal-1 ta' Ottubru 2014 fil-kawża dwar il-miżuri implimentati mill-Belġju favur l-ajruport ta' Charleroi u Ryanair, (minn hawn 'il quddiem id-Deċiżjoni Charleroi) u b'mod partikolari għall-premessi 269 u 270 tagħha.

(70) Skont il-Belġju, minn dan jirriżulta li fil-Belġju l-prezz tas-suq tas-servizzi tal-ajruport impost fuq il-kumpaniji tal-ajru ma jidhirx li jinkludi l-ispejjeż kollha relatati mas-sigurtà fl-ajruporti. F'dan ir-rigward, huwa jqis li, fid-Deċiżjoni Charleroi, il-Kummissjoni ma kkunsidratx li dan il-fatt jikkostitwixxi għajnuna mill-Istat.

Dwar il-limitu ta' 400000 passiġġier fis-sena u l-impatt tiegħu fuq is-selettività tal-miżura

(71) F'dak li jirrigwarda l-limitu ta' 400000 passiġġier, il-Belġju jirreferi prinċipalment għall-ittra tiegħu tat-2 ta' April 2014, li fiha, qabel il-ftuħ tal-proċedura ta' investigazzjoni formali, huwa ppreżenta l-argumenti tiegħu rigward il-fondatezza ta' dan il-limitu, argumenti miġbura fil-qosor fil-punti minn 46 sa 49 tad-Deċiżjoni tal-ftuħ. Il-Belġju jżid jgħid ma' dawn l-argumenti li l-għan kien li nħeġġu lill-kumpaniji tal-ajru jkomplu jiżviluppaw fi Brussell billi nikkumpensawhom għat-tnaqqis fl-ispejjeż tas-sigurtà li ġġib magħha żieda fil-passiġġieri.

(72) Barra minn hekk, abbażi tal-klawżola tal-evalwazzjoni perjodika tal-iskema, prevista fl-Artikolu 4 tad-Digriet Irjali tas-7 ta' Jannar 2014, il-Belġju jirreferi għall-ipoteżi ta' estensjoni tal-miżura għal perjodu addizzjonali ta' tliet snin mutatis mutandis, jiġifieri għall-benefiċċju tal-kumpaniji tal-ajru li jkunu ttrasportaw aktar minn 400000 passiġġier li jitilqu mill-ajruport fl-2015. Minn dan il-Belġju jiddeduċi li l-mekkaniżmu huwa inċentiv peress li jista' jġib ridistribuzzjoni tal-lista tal-benefiċjarji kull tliet snin, għall-partijiet kollha li jkunu qabżu l-limitu ta' 400000 passiġġier waqt l-evalwazzjoni ta' kull tliet snin.

Dwar il-kompatibbiltà tal-għajnuna eventwali

(73) Peress li l-Belġju jikkunsidra li l-miżura stabbilita mid-Digriet Irjali tas-7 ta' Jannar 2014 mhijiex għajnuna mill-Istat, ma jqisx li huwa rilevanti li jindika fuq liema bażi ġuridika l-miżura inkwistjoni tista' tiġi ddikjarata kompatibbli mas-suq intern u li juri li l-kundizzjonijiet ta' kompatibbiltà huma ssodisfati.

Dwar il-legalità u l-irkupru tal-għajnuna eventwali

(74) Il-Belġju jqis li l-eżami ta' jekk il-miżura inkwistjoni ġietx innotifikata jew le lill-Kummissjoni Ewropea skont l-Artikolu 108(3) TFUE huwa irrilevanti.

(75) Huwa jqis ukoll li, għaldaqstant, lanqas il-kwistjoni ta' jekk il-miżura għandhiex tiġi rkuprata ma hija rilevanti.

KUMMENTI MILL-PARTIJIET TERZI Kummenti minn Ryanair

(76) Fit-13 ta' Jannar 2015, Ryanair bagħtet il-kummenti tagħha lill-Kummissjoni dwar id-Deċiżjoni tal-ftuħ.

Dwar ordni eventwali ta' sospensjoni tal-għajnuna

(77) Ryanair taqbel mal-konklużjonijiet preliminari tal-Kummissjoni rigward l-eżistenza ta' għajnuna mill-Istat, u titlob lill-Kummissjoni tordna lill-Belġju biex jissospendi l-miżura inkwistjoni.

(78) Skont Ryanair, l-għan innifsu tal-miżura huwa b'mod ċar antikompetittiv peress li din il-miżura għandha l-għan li toħloq distorsjoni fil-kompetizzjoni billi ddgħajjef lill-kumpaniji tal-ajru l-oħrajn preżenti fl-Ajruport Nazzjonali ta' Brussell, b'mod speċjali lill-kumpaniji low-cost.

(79) Barra minn hekk, Ryanair tqis li l-benefiċjarji tal-miżura (jiġifieri Brussels Airlines, TUI Airlines Belgium u Thomas Cook Airlines Belgium) użawha sabiex isaħħu sħubija strateġika li kienet diġà teżisti kontra grupp ta' konkorrenti effettivi, bħal Ryanair u Vueling, fil-hub tal-Ajruport Nazzjonali ta' Brussell.

Dwar l-istruttura tal-miżura u n-natura tagħha ta' għajnuna mill-Istat

(80) L-ewwel nett, Ryanair tapprova l-konklużjonijiet preliminari tal-Kummissjoni dwar in-natura arbitrarja tal-limitu ta' 400000 passiġġier, li skont Ryanair huwa nieqes mil-loġika ekonomika.

(81) It-tieni nett, Ryanair tenfasizza li l-kumpaniji tal-ajru eliġibbli għall-iskema jintgħażlu abbażi ta' kriterju li jeskludi lill-passiġġieri fi trasferiment u fi transitu, meta l-ammonti dovuti lil kull benefiċjarju jinkludu lil dawn il-kategoriji ta' passiġġieri. Ryanair tqis li dan huwa inkonsistenti, u tassumi li d-differenzi tat-trattament tal-passiġġieri fi transitu u fi trasferiment, ikkawżati mill-miżura huma loġikament ir-riżultat tax-xewqa tal-Belġju li jeskludi lill-kumpaniji mhux Belġjani mill-kamp ta' applikazzjoni tal-miżura.

(82) Fl-aħħar nett, Ryanair taqbel mal-analiżi preliminari tal-Kummissjoni li l-għażla tas-sena 2012 bħala s-sena ta' referenza biex jiġu identifikati l-benefiċjarji tal-miżura hija arbitrarja. Ryanair tinnota li din mhijiex l-unika sena li għaliha kien hemm data disponibbli, peress li BAC tippubblika d-data dwar it-traffiku tal-passiġġieri fuq is-sit web tagħha kull xahar għax-xahar ta' qabel.

Dwar l-inkompatibbiltà tal-għajnuna

(83) Ryanair tqis li l-għajnuna ma tistax tiġi ddikjarata kompatibbli mas-suq intern diment li tikser ir-regoli dwar il-libertà li jiġu pprovduti s-servizzi. Skont Ryanair, l-għajnuna tiffavorixxi lis-servizzi offruti minn ċerti kumpaniji tal-ajru Belġjani magħżula bir-reqqa. Ryanair tenfasizza li ebda kumpanija tal-ajru kbira Belġjana ma tidher li hija eskluża mil-lista tal-benefiċjarji, u li l-Ministru tat-Trasport Belġjan innifsu stqarr li l-għan tal-miżura kien li ssostni lill-kumpaniji tal-ajru nazzjonali.

(84) Barra minn hekk, Ryanair tirrapporta d-dikjarazzjonijiet ostili li għamel il-Gvern Belġjan ta' dak iż-żmien fil-konfront tagħha, li skont Ryanair, kien kontra l-istabbiliment tagħha fl-Ajruport Nazzjonali ta' Brussell u li permezz ta' din l-għajnuna antikompetittiva xtaq jiskoraġġixxi kwalunkwe offerta ġdida ta' servizzi ta' tluq minn dan l-ajruport minn kumpaniji low-cost.

Dwar id-diffikultajiet finanzjarji ta' Brussels Airlines

(85) Ryanair tinnota li mill-2009 'l hawn Brussels Airlines irreġistrat telf operattiv kull sena. Fil-fehma tagħha, mingħajr l-intervent tal-Belġju, kien ikollha toħroġ mis-suq f'qasir żmien jew f'terminu medju. Skont Ryanair, is-sitwazzjoni tant kienet kritika li Brussels Airlines minnufih inkludiet l-għajnuna mistennija fil-kontijiet annwali tagħha tal-2013, meta kien għadu mhux ċert jekk kellhiex dritt tirċievi din is-somma.

(86) Ryanair titlob lill-Kummissjoni tuża is-setgħat kollha li għandha taħt ir-Regolament (KE) Nru 659/1999 tal-Kunsill, sostitwit bir-Regolament (UE) 2015/1589 tal-Kunsill biex titlob informazzjoni finanzjarja dettaljata u aġġornata dwar il-kontijiet ta' Brussels Airlines, TUI Airlines Belgium u Thomas Cook Airlines Belgium għall-2012, 2013 u 2014. Ryanair titlob ukoll lill-Kummissjoni sabiex tivverifika kif l-għajnuna ġiet riflessa fil-kontijiet tal-benefiċjarji sabiex tiddetermina jekk dawn il-benefiċjarji humiex impriżi f'diffikultà skont il-verżjoni tal-Linji Gwida dwar l-għajnuna għas-salvataġġ u għar-ristrutturar applikabbli fil-mument tal-fatti.

L-osservazzjonijiet tal-International Airlines Group (IAG)

(87) Fis-16 ta' Frar 2015, IAG bagħat il-kummenti tiegħu lill-Kummissjoni dwar id-Deċiżjoni tal-ftuħ.

Dwar l-imputabbiltà tal-miżura lill-Istat

(88) Skont IAG huwa evidenti li l-miżura ġiet approvata mill-Belġju permezz tad-Digriet Irjali tas-7 ta' Jannar 2014, u li hija bbażata fuq riżorsi tal-Istat, b'mod partikolari fuq il-baġit tas-Servizz Pubbliku federali tal-Mobilità u t-Trasport. IAG jenfasizza wkoll li r-rwol ta' BAC fil-ġestjoni u t-tqassim ta' din ir-riżorsa huwa limitat għall-applikazzjoni tad-deċiżjonijiet tal-Istat Belġjan, billi r-regoli tat-tqassim tal-fondi li rċeviet BAC mingħand l-Istat kienu kollha stabbiliti mid-dispożizzjonijiet ta' dak id-Digriet Irjali. Skont IAG, il-fatt li BAC hija operatur privat ma jikkontestax għalhekk il-preżenza ta' riżorsi tal-Istat u l-imputabbiltà tal-miżura lill-Istat.

Dwar l-eżistenza ta' vantaġġ selettiv lil kumpaniji tal-ajru

(89) IAG ifakkar li l-kumpaniji tal-ajru li ma operawx fl-2012 huma awtomatikament esklużi mid-Digriet Irjali tas-7 ta' Jannar 2014. Huwa jqis li, għalkemm il-miżura hija ppreżentata bħala li tapplika b'mod ġenerali għall-utenti kollha tal-Ajruport Nazzjonali ta' Brussell, il-miżura hija mfassla b'tali mod li tista' tapplika biss għal porzjon żgħir tal-kumpaniji tal-ajru.

Dwar l-aspetti relatati mal-passiġġieri fi transitu u l-passiġġieri fi trasferiment

(90) IAG jirreferi għal waħda mill-affermazzjonijiet tal-Belġju dwar is-selettività tal-miżura, jiġifieri li b'differenza mill-Ajruport Nazzjonali ta' Brussell, ħafna ajruporti Ewropej ma jeżentawx lill-passiġġieri fi transitu u fi trasferiment mill-imposti tas-sigurtà tagħhom. IAG jibdel din l-affermazzjoni billi jibbaża fuq diversi eżempji ta' ajruporti kbar Ewropej.

(91) Barra minn hekk, IAG jinnota li wara t-telf irreġistrat minn Brussels Airlines f'dawn l-aħħar snin, Lufthansa ddeċidiet li tipposponi d-deċiżjoni tagħha li tixtri l-ishma kollha ta' Brussels Airlines għall-2017, meta din id-deċiżjoni kienet inizjalment prevista għall-2014. Skont IAG, jista' jitqies li Lufthansa mhix se tikkonkludi x-xiri ta' Brussels Airlines qabel ma din tkun tejbet id-dikjarazzjoni tad-dħul tagħha, inkluż permezz ta' fondi pubbliċi.

L-osservazzjonijiet ta' Brussels Airlines

(92) Fit-23 ta' Frar 2015, Brussels Airlines bagħtet il-kummenti tagħha lill-Kummissjoni dwar id-Deċiżjoni tal-ftuħ.

(93) Brussels Airlines tikkunsidra li l-miżura inkwistjoni ma tikkostitwix għajnuna mill-Istat peress li tirrigwarda l-finanzjament ta' attivitajiet mhux ekonomiċi u, fi kwalunkwe każ, ma tagħtix vantaġġ selettiv lid-destinatarji tas-sussidju.

(94) Barra minn hekk, Brussels Airlines tikkunsidra li l-miżura hija kompatibbli mas-suq intern qabel id-dħul fis-seħħ tal-Linji Gwida dwar l-Avjazzjoni.

Il-kunċett ta' impriża u ta' attività ekonomika

(95) Brussels Airlines tikkunsidra li s-sussidju mogħti mid-Digriet Irjali tas-7 ta' Jannar 2014 jirrigwarda attivitajiet mhux ekonomiċi, li għalihom huwa previst kumpens finanzjarju parzjali.

(96) Insostenn ta' din l-analiżi, Brussels Airlines tirreferi għad-deċiżjoni tal-estensjoni tal-proċedura ta' eżami tal-21 ta' Marzu 2012 fil-Kawża SA.14093 (C76/2002) Vantaġġi mogħtija mir-Reġjun ta' Walloon lil Brussels South Charleroi Airport u lill-kumpanija tal-ajru Ryanair.

(97) Skont Brussels Airlines, il-kumpaniji tal-ajru li joperaw fl-ajruport ta' Charleroi ma jħallsux spejjeż tas-sigurtà lil dan l-ajruport u, skont l-imsemmija Deċiżjoni tal-Kummissjoni tal-21 ta' Marzu 2012, dan ma jimplikax li huma qegħdin jirċievu għajnuna mill-Istat. Barra minn hekk, Brussels Airlines tinnota li peress li d-Deċiżjoni Charleroi msemmija qabel, għalqet il-proċedura ta' investigazzjoni formali estiża bid-Deċiżjoni tal-21 ta' Marzu 2012, hija vvalidat, skont Ministru tar-Reġjun ta' Walloon, il-kumpens finanzjarju għas-sigurtà mogħti mir-Reġjun ta' Walloon lill-ajruport ta' Charleroi u, għalhekk, skont Brussels Airlines, lill-operaturi tiegħu.

Vantaġġ selettiv

(98) Brussels Airlines issemmi l-punt 44 tad-Deċiżjoni tal-ftuħ, fejn il-Kummissjoni kkonkludiet dwar is-selettività tal-miżura għal tliet raġunijiet: 1) il-miżura tibbenefika biss lill-kumpaniji tal-ajru u mhux lil modi oħrajn ta' trasport tal-passiġġieri, 2) il-miżura tibbenefika biss lill-kumpaniji tal-ajru li jużaw l-Ajruport Nazzjonali ta' Brussell u 3) il-miżura tibbenefika lill-kumpaniji tal-ajru li jissodisfaw ċerti kundizzjonijiet ta' traffiku fl-Ajruport Nazzjonali ta' Brussell.

(99) B'referenza għall-ewwel punt, Brussels Airlines għandha dubji dwar is-selettività tas-sussidju minħabba l-fatt li ngħata biss lill-kumpaniji tal-ajru. Brussels Airlines tikkunsidra li hemm raġunijiet oġġettivi li jispjegaw id-differenza bejn it-traffiku tal-ajru u l-modi l-oħrajn ta' trasport tal-passiġġieri, minħabba li dawn tal-aħħar ma joħolqux daqstant riskji ta' sigurtà daqs it-trasport bl-ajru.

(100) F'dak li jirrigwarda t-tieni punt, Brussels Airlines tirreferi għall-ordni ġuridiku Belġjan li jwassal għat-tqassim tal-għajnuna lill-kumpaniji li jgħaddu mill-Ajruport Nazzjonali ta' Brussell biss. Ir-reġjuni Belġjani huma responsabbli għat-tagħmir u l-operat tal-ajruporti u tal-ajrudromi pubbliċi, minbarra l-Ajruport Nazzjonali ta' Brussell li jaqa' taħt ir-responsabbiltà federali. Minn dan Brussels Airlines tiddeduċi li l-Istat Federali jista' jagħti dan is-sussidju biss lill-Ajruport Nazzjonali ta' Brussell u mhux lill-ajruporti l-oħrajn.

(101) Rigward it-tielet punt, Brussels Airlines jistieden lill-Kummissjoni tirreferi għall-Istat Federali li adotta d-Digriet Irjali tas-7 ta' Jannar 2014. Madankollu, hija tixtieq tiċċara li hija tqis li limitu marbut man-numru ta' passiġġieri huwa rilevanti fil-każ ta' sussidju għal servizzi relatati mas-sigurtà tal-ajruporti peress li l-ispejjeż tas-sigurtà fl-ajruporti huma wkoll marbuta man-numru ta' passiġġieri.

(102) Brussels Airlines tikkunsidra wkoll li l-użu tas-sena ta' referenza 2012 huwa dovut għall-fatt li din hija l-aħħar sena li għaliha kien hemm ċifri disponibbli meta l-Kunsill tal-Ministri ddeċieda li jadotta l-miżura. Brussels Airlines tqis li ovvjament, l-għażla ta' punt ta' referenza dejjem tibqa' sa ċertu punt arbitrarja. Skont l-analiżi ta' Brussels Airlines, meta għażel is-sena ta' referenza 2012, il-Belġju ma jidhirx li qabeż il-marġni ta' diskrezzjoni tiegħu fuq dan il-punt.

(103) Brussels Airlines tikkonkludi li l-miżura ma tagħtix vantaġġ selettiv.

Il-kompatibbiltà tal-għajnuna

(104) Brussels Airlines tixtieq tfakkar li, madankollu, kieku l-Kummissjoni kellha tikkonkludi dwar l-eżistenza ta' għajnuna, din l-għajnuna kienet tkun kompatibbli tal-anqas sal-4 ta' April 2014, id-data tad-dħul fis-seħħ tal-Linji Gwida dwar l-Avjazzjoni. Brussels Airlines tirreferi dwar dan il-punt għad-Deċiżjoni Charleroi msemmija qabel, li fiha l-Kummissjoni aċċettat li diversi miżuri mogħtija mir-Reġjun ta' Walloon lill-operatur tal-ajruport ta' Charleroi, li kienu jissussidjaw l-attività ekonomika tal-ajruport b'mod selettiv u kienu għalhekk jikkostitwixxu għajnuna mill-Istat illegali, ma kinux inkompatibbli mas-suq intern ħlief wara li daħlu fis-seħħ il-Linji Gwida dwar l-Avjazzjoni.

(105) Dan jimplika, skont l-analiżi ta' Brussels Airlines, li s-sussidji mħallsa għas-servizzi tas-sigurtà pprovduti qabel din id-data ma jistgħux bl-ebda mod jiġu rkuprati mingħand l-impriżi li rċevewhom.

Konklużjoni

(106) Brussels Airlines tqis li l-miżura inkwistjoni ma tikkostitwix għajnuna mill-Istat peress li ma tissussidjax attività ekonomika u ma tagħti ebda vantaġġ selettiv. Fi kwalunkwe każ, hija tinnota li l-miżura għandha titqies kompatibbli mas-suq intern qabel id-dħul fis-seħħ tal-Linji Gwida dwar l-Avjazzjoni.

L-osservazzjonijiet ta' parti kkonċernata oħra li talbet li tibqa' anonima

(107) Fis-26 ta' Frar 2015, parti oħra kkonċernata, li talbet li tibqa' anonima (minn hawn 'il quddiem il-parti kkonċernata li talbet li tibqa' anonima), bagħtet il-kummenti tagħha dwar id-Deċiżjoni tal-ftuħ lill-Kummissjoni.

(108) L-ewwel nett, il-parti kkonċernata li talbet li tibqa' anonima tfakkar li l-Liġi Qafas tat-30 ta' Diċembru 2001 tipprevedi espressament li l-imposti tal-ajruport miġbura minn BAC għandhom ikunu nondiskriminatorji, trasparenti u orjentati skont il-kostijiet.

(109) Hija tenfasizza mbagħad li d-Digriet Irjali tas-7 ta' Jannar 2014 ma jistax jippreġudika d-dispożizzjonijiet tal-Liġi Qafas peress li din ġejja minn standard ogħla minn Digriet Irjali.

(110) Il-parti kkonċernata li talbet li tibqa' anonima tosserva li fuq il-bażi tal-Liġi Qafas, il-Belġju ta lil BAC liċenzja li tippermettilha topera l-Ajruport Nazzjonali ta' Brussell. Għaldaqstant, skont il-parti kkonċernata li talbet li tibqa' anonima, il-Belġju għandu jiżgura l-konformità mal-kundizzjonijiet marbuta mal-liċenzja u allura l-karattru nondiskriminatorju tal-imposti tal-ajruport. Il-parti kkonċernata li talbet li tibqa' anonima tqis li jekk BAC ma tirrispettax dawn il-kundizzjonijiet, il-Belġju jista', u għandu, jieħu miżuri biex jirrimedja għal dan.

(111) Il-parti kkonċernata li talbet li tibqa' anonima tistaqsi għalhekk jekk il-Belġju riedx jappoġġa lill-kumpaniji tal-ajru Belġjani kkonċernati mingħajr preġudizzju għar-regolamenti ekonomiċi msemmija fil-premessa 108 u tistaqsi jekk hijiex ir-responsabbiltà ta' BAC li tagħti l-istess skont fuq l-ispiża tal-miżuri tas-sigurtà lill-kumpaniji kollha tal-ajru li jużaw l-Ajruport Nazzjonali ta' Brussell.

(112) Barra minn hekk, il-parti kkonċernata li talbet li tibqa' anonima tfakkar li hemm ftehim ta' ħames snin bejn BAC u l-kumpaniji tal-ajru rigward is-sistema ta' tariffi u l-metodi ta' kontroll tat-tariffi. Kwalunkwe tibdil fil-ftehim fis-seħħ jeżiġi konsultazzjoni ġdida mal-kumpaniji tal-ajru.

(113) Minn dan il-parti kkonċernata li talbet li tibqa' anonima tiddeduċi li l-Belġju jitlaq mill-prinċipju li BAC għandha tagħti skont nondiskriminatorju lill-kumpaniji kollha tal-ajru, (jiġifieri tnaqqas b'mod ġenerali l-kostijiet relatati mal-miżuri ta' sigurtà). Il-kuntrarju ta' dan ikun vantaġġ selettiv għal ċerti kumpaniji tal-ajru u jikser l-Artikolu 15 tal-Konvenzjoni ta' Chicago u d-Direttiva 2009/12/KE tal-Parlament Ewropew u tal-Kunsill.

IL-KUMMENTI TAL-BELĠJU DWAR L-OSSERVAZZJONIJIET TAL-PARTIJIET TERZI Kummenti dwar l-osservazzjonijiet ta' Ryanair

(114) L-ewwel nett, il-Belġju jfakkar li fl-osservazzjonijiet tiegħu tas-16 ta' Jannar 2015 kif ukoll fit-tweġiba tiegħu tat-12 ta' Marzu 2015 għat-talba ta' informazzjoni tal-10 ta' Frar 2015, huwa kien spjega fid-dettall għalfejn il-miżura kkontestata ma kinitx tikkostitwixxi għajnuna mill-Istat.

(115) Barra minn hekk, il-Belġju jikkunsidra li l-elementi mressqa minn Ryanair aktar jirriflettu l-istrateġija kummerċjali tagħha milli argumentazzjoni purament ġuridika.

Dwar it-talba ta' sospensjoni tal-għajnuna

(116) Il-Belġju jfakkar li wara li l-Kummissjoni esprimiet dubji fid-Deċiżjoni tal-ftuħ, il-Ministru tal-Mobilità ddeċieda li jissospendi l-eżekuzzjoni tad-Digriet Irjali tas-7 ta' Jannar 2014, bħala prekawzjoni u mingħajr preġudizzju għall-pożizzjoni tiegħu rigward l-evalwazzjoni preliminari li għamlet il-Kummissjoni fid-Deċiżjoni tal-ftuħ.

Dwar l-eżistenza ta' għajnuna mill-Istat

(117) Meta kkummenta fuq l-argumenti ta' Ryanair dwar l-eżistenza ta' għajnuna mill-Istat, b'mod partikolari dwar in-natura allegatament arbitrarja tal-limitu ta' 400000 passiġġier fis-sena, in-natura allegatament mhux tas-soltu tat-trattament tal-passiġġieri fi transitu u fi trasferiment għall-identifikazzjoni tal-benefiċjarji tal-għajnuna u l-kalkolu tal-ammont tal-għajnuna, u n-natura allegatament arbitrarja tal-użu tas-sena 2012 bħala sena ta' referenza għall-għażla tal-benefiċjarji tal-għajnuna, il-Belġju jirreferi lill-Kummissjoni għall-osservazzjonijiet tiegħu tas-16 ta' Jannar 2015 u għat-tweġiba tiegħu tat-12 ta' Marzu 2015 għat-talba ta' informazzjoni tal-10 ta' Frar 2015.

(118) Fir-rigward tal-argumenti dwar is-sena 2012 bħala sena ta' referenza, skont il-Belġju, Ryanair naqset milli tispeċifika li għalkemm huwa minnu li ċ-ċifri dwar it-traffiku tax-xahar preċedenti jiġu ppubblikati kull xahar fuq is-sit web ta' BAC, din hija biss statistika ġenerali dwar in-numru ta' passiġġieri li jitilqu, jaslu, jittransitaw jew jiġu trasferiti, u mhux imqassma skont il-kumpaniji tal-ajru.

(119) Rigward id-dikjarazzjoni tal-eks Segretarju tal-Istat għall-Mobilità msemmija minn Ryanair, il-Belġju jqis li din id-dikjarazzjoni bl-ebda mod ma tindika l-eżistenza ta' għajnuna mill-Istat, u lanqas ta' xi pjan ieħor tal-Gvern Belġjan li jostakola l-kompetizzjoni eżerċitata minn Ryanair fil-konfront tal-kumpaniji tal-ajru l-oħrajn.

Dwar il-kompatibbiltà tal-għajnuna allegata mas-suq intern

(120) F'dan ir-rigward, il-Belġju jfakkar li l-miżura ma tikkostitwix għajnuna mill-Istat peress li tkopri servizzi mhux ekonomiċi u, b'mod sussidjarju, peress li ma tagħtix vantaġġ lill-benefiċjarji tagħha.

(121) Minn dan il-Belġju jikkonkludi li l-kwistjoni tal-kompatibbiltà tal-allegata għajnuna mill-Istat mhijiex rilevanti f'dan il-każ.

Dwar it-talba għal informazzjoni finanzjarja mingħand il-benefiċjarji

(122) F'dan ir-rigward, il-Belġju jenfasizza li l-miżura inkwistjoni ma tikkostitwix għajnuna mill-Istat u għaldaqstant il-Kummissjoni ma għandha ebda raġuni għalfejn titlob informazzjoni finanzjarja mingħand Brussels Airlines, TUI Airlines Belgium u Thomas Cook Airlines Belgium.

(123) Fi kwalunkwe każ, il-Belġju jemmen li huma t-tliet kumpaniji tal-ajru kkonċernati li għandhom jiġu mitluba, jekk ikun il-każ, jagħmlu l-osservazzjonijiet tagħhom.

Kummenti dwar l-osservazzjonijiet ta' IAG

(124) Fil-kummenti tiegħu dwar l-osservazzjonijiet ta' IAG, il-Belġju jirreferi lill-Kummissjoni għall-osservazzjonijiet tiegħu tas-16 ta' Jannar 2015 kif ukoll għat-tweġiba tiegħu tat-12 ta' Marzu 2015 għat-talba ta' informazzjoni tal-10 ta' Frar 2015, fejn huwa jqis li kien spjega fid-dettall għalfejn il-miżura inkwistjoni ma kinitx tikkostitwixxi għajnuna mill-Istat.

Kummenti dwar l-osservazzjonijiet ta' Brussels Airlines

(125) Il-Belġju nnota b'attenzjoni l-osservazzjonijiet li għamlet Brussels Airlines, li fihom hija tikkonkludi prinċipalment li l-miżura inkwistjoni ma tikkostitwix għajnuna mill-Istat. Il-Belġju jinforma lill-Kummissjoni li huwa jaqbel f'dan ir-rigward ma' din il-konklużjoni ta' Brussels Airlines.

Kummenti dwar l-osservazzjonijiet tal-parti kkonċernata li talbet li tibqa' anonima

(126) Il-Belġju jirreferi għall-osservazzjonijiet tiegħu tas-16 ta' Jannar 2015 kif ukoll għat-tweġiba tiegħu tat-12 ta' Marzu 2015 għat-talba ta' informazzjoni tal-10 ta' Frar 2015, fejn huwa jqis li kien spjega fid-dettall għalfejn il-miżura inkwistjoni ma kinitx tikkostitwixxi għajnuna mill-Istat.

EVALWAZZJONI L-eżistenza ta' għajnuna mill-Istat

(127) Skont l-Artikolu 107(1) tat-Trattat, kull għajnuna mogħtija minn Stat Membru jew permezz ta' riżorsi tal-Istat f'kull forma li tfixkel jew thedded li tfixkel il-kompetizzjoni billi tiffavorixxi ċerti impriżi jew il-produzzjoni ta' ċerti oġġetti għandha tkun inkompatibbli mas-suq intern, sa fejn taffettwa l-kummerċ bejn l-Istati Membri.

(128) Għalhekk, biex miżura nazzjonali tiġi kklassifikata bħala għajnuna mill-Istat, iridu jiġu ssodisfati l-kundizzjonijiet kumulattivi li ġejjin: 1) il-benefiċjarji tal-miżura jkunu impriżi fis-sens tal-Artikolu 107(1) TFUE, 2) il-miżura inkwistjoni tkun iffinanzjata b'riżorsi tal-Istat u tkun imputabbli lill-Istat, 3) il-miżura tagħti vantaġġ ekonomiku lill-benefiċjarji tagħha u dan il-vantaġġ ikun selettiv u 4) il-miżura inkwistjoni twassal għal distorsjoni jew thedded li ġġib distorsjoni fil-kompetizzjoni u tista' taffettwa l-kummerċ bejn l-Istati Membri.

Il-kunċett ta' impriża u ta' attività ekonomika

(129) Skont l-Artikolu 107(1) TFUE, ir-regoli dwar l-għajnuna mill-Istat japplikaw biss fejn il-benefiċjarju huwa impriża. Il-kunċett ta' impriża jkopri kull entità impenjata f'attività ekonomika, irrispettivament mill-istatus ġuridiku tagħha u mill-mod kif tiġi ffinanzjata. Kull attività li tikkonsisti fl-offerta ta' prodotti u servizzi f'suq partikolari titqies li hija attività ekonomika. Kif fakkret il-Kummissjoni fil-punt 34 tal-Linji Gwida dwar l-Avjazzjoni, il-kwistjoni ta' jekk entità, tkun liema tkun, tikkostitwixxix impriża jew le, hija dejjem marbuta ma' attività speċifika.

(130) Skont il-Belġju, is-sussidju mħallas skont id-Digriet Irjali tas-7 ta' Jannar 2014 jiffinanzja servizzi li jiżguraw is-sigurtà tal-passiġġieri u tal-faċilitajiet tal-ajruport, u għalhekk, ma jsostnix attivitajiet ta' natura ekonomika. Il-Belġju jirreferi għad-Deċiżjoni Charleroi li fiha l-Kummissjoni kkunsidrat li l-finanzjament mir-Reġjun ta' Walloon ta' ċerti attivitajiet li jaqgħu taħt il-prerogattivi ta' awtorità pubblika fl-ajruport ta' Charleroi ma kienx jikkostitwixxi għajnuna mill-Istat, b'mod partikolari minħabba li dawn l-attivitajiet ma kinux ta' natura ekonomika. Brussels Airlines ippreżentat argumenti simili.

(131) Il-Kummissjoni ma tikkontestax li l-Belġju jista' eventwalment jagħti kumpensi lil BAC għall-attivitajiet ta' sigurtà li twettaq fl-Ajruport Nazzjonali ta' Brussell, u li dawn il-kumpensi jistgħu ma jikkwalifikawx bħala għajnuna mill-Istat lil BAC. Madankollu, is-suġġett ta' din il-proċedura mhuwiex sussidju mogħti lil BAC, iżda sussidju lill-kumpaniji tal-ajru.

(132) F'dan ir-rigward, ta' min jinnota li d-Digriet Irjali tas-7 ta' Jannar 2014 jipprevedi li BAC għandha tgħaddi s-sussidju kollu li tirċievi lill-kumpaniji tal-ajru li jkunu ġarrew aktar minn 400000 passiġġier mill-ajruport fl-2012. Għaldaqstant, is-sussidju previst mid-Digriet Irjali tas-7 ta' Jannar 2014, jagħti vantaġġ lill-kumpaniji tal-ajru li jkunu ġarrew aktar minn 400000 passiġġier mill-ajruport fl-2012, permezz tal-mekkaniżmu ta' ridistribuzzjoni stabbilit mill-Artikolu 2 tal-istess Digriet Irjali.

(133) Is-sussidji li l-kumpaniji tal-ajru jirċievu mingħand BAC taħt l-Artikolu 2 tad-Digriet Irjali tas-7 ta' Jannar 2014 għandhom l-għan li jkoprulhom parti mill-imposta tas-sigurtà dovuta lil BAC. L-imposta tas-sigurtà hija waħda mill-imposti tal-ajruport li permezz tagħha l-kumpaniji tal-ajru jħallsu lil BAC għall-aċċess għall-infrastruttura tal-ajruport u għall-provvista ta' servizzi tal-ajruport. Għaldaqstant hija waħda mill-komponenti tal-prezz tas-servizzi kummerċjali, iddeterminat minn operatur privat li jipprovdi servizzi. Barra minn hekk, l-imposta tas-sigurtà hija ammont mitlub għal kull passiġġier ittrasportat mill-kumpanija tal-ajru bi tluq mill-ajruport. Għaldaqstant huwa evidenti li s-sussidji inkwistjoni jiffinanzjaw attivitajiet ta' trasport kummerċjali tal-passiġġieri, li, kif spjegat il-Kummissjoni fil-punt 27 tal-Linji Gwida dwar l-Avjazzjoni, jikkostitwixxu attivitajiet ekonomiċi. Dan bl-ebda mod ma huwa kumpens għall-kostijiet li jkollhom iġarrbu l-kumpaniji tal-ajru għall-attivitajiet li jaqgħu taħt ir-responsabbiltà tal-Istat fl-eżerċizzju tal-prerogattivi uffiċjali tiegħu ta' awtorità pubblika.

(134) Fid-Deċiżjoni Charleroi, il-Kummissjoni eżaminat il-finanzjament tal-attivitajiet li jaqgħu taħt ir-responsabbiltà tal-Istat fl-eżerċizzju tal-prerogattivi uffiċjali tiegħu ta' awtorità pubblika, imwettqa mill-operatur tal-ajruport ta' Charleroi. Ma eżaminatx xi mekkaniżmu ta' ridistribuzzjoni lill-kumpaniji tal-ajru bħal dak li ġie stabbilit mill-Artikolu 2 tad-Digriet Irjali tas-7 ta' Jannar 2014. Lanqas ma kkonkludiet li kwalunkwe finanzjament li rċevew il-kumpaniji tal-ajru ma kienx jikkwalifika bħala għajnuna mill-Istat minħabba li kien se jiffinanzja attivitajiet mhux ekonomiċi. Għaldaqstant id-Deċiżjoni Charleroi mhijiex rilevanti fl-analiżi tal-miżura eżaminata f'din id-Deċiżjoni.

(135) Jirriżulta minn dak li ntqal qabel li l-miżura eżaminata, jiġifieri s-sussidju lill-kumpaniji tal-ajru mogħti permezz tad-Digriet Irjali tas-7 ta' Jannar 2014, jiffinanzja attività ekonomika, jiġifieri t-trasport kummerċjali tal-passiġġieri. Il-benefiċjarji tagħha, li huma kumpaniji tal-ajru, huma b'mod ċar impriżi fis-sens tal-Artikolu 107(1) TFUE.

Ir-riżorsi tal-Istat u l-imputabilità lill-Istat

(136) Is-sussidju huwa mogħti skont Digriet Irjali adottat fil-Kunsill tal-Ministri. L-Artikolu 6 tad-Digriet Irjali tas-7 ta' Jannar 2014 jistipula li l-Ministru responsabbli għan-navigazzjoni bl-ajru huwa inkarigat mill-eżekuzzjoni tad-Digriet.

(137) Barra minn hekk, is-sussidju huwa ffinanzjat minn riżorsi li ġejjin mill-baġit tal-Istat Belġjan. L-Artikolu 3 tad-Digriet Irjali tas-7 ta' Jannar 2014 jispeċifika fil-fatt: Is-sussidju msemmi fl-Artikolu 1 għandu jitħallas mill-allokazzjoni bażika 52.60.31.32.01, Għajnuna lis-settur tal-ajrunawtika, (…) tal-Baġit tas-Servizz Pubbliku Federali tal-Mobilità u t-Trasport għas-sena baġitarja 2014..

(138) Barra minn hekk, l-Artikolu 2 tad-Digriet Irjali tas-7 ta' Jannar 2014 jimponi lil BAC li tqassam lura mill-ġdid is-sussidju kollu riċevut mingħand l-Istat lil ċerti kumpaniji tal-ajru, f'ammonti determinati għal kull kumpanija tal-ajru skont metodu interament stabbilit mid-Digriet Irjali. Din id-dispożizzjoni ma tħalli ebda libertà lil BAC fl-għażla tal-kumpaniji tal-ajru benefiċjarji u fl-ammonti allokati lil kull waħda minnhom. Għaldaqstant, il-pagamenti li ħallset BAC lill-kumpaniji tal-ajru taħt id-Digriet Irjali tas-7 ta' Jannar 2014 għandhom jitqiesu imputabbli lill-Istat u ffinanzjati minn riżorsi tal-Istat, mingħajr ma din il-konklużjoni tiġi affettwata mill-fatt li BAC hija kumpanija b'75 % tal-ishma tagħha miżmuma minn investituri privati.

(139) Barra minn hekk, ta' min jinnota li l-uniċi pagamenti li saru skont id-Digriet Irjali tas-7 ta' Jannar 2014 saru mingħajr ma ġew segwiti eżattament il-modi previsti inizjalment mid-digriet. Fil-fatt, l-ammonti dovuti lil kull kumpanija tal-ajru, ikkalkulati skont id-dispożizzjonijiet tal-Artikolu 2 tal-imsemmi Digriet Irjali, tħallsu direttament mill-Istat lill-kumpaniji li ssodisfaw il-kriterji previsti fl-Artikolu 2(1) tal-istess Digriet Irjali, mingħajr ma għaddew minn BAC. B'hekk, fit-22 ta' Settembru 2014, l-Istat Belġjan ħallas l-ammonti li ġejjin direttament lill-kumpaniji tal-ajru: EUR 16779819 (Brussels Airlines), EUR 2143621 (TUI Airlines Belgium), EUR 76560 (Thomas Cook Airlines Belgium). Huwa ovvju li dawn il-pagamenti diretti huma imputabbli lill-Istat u ffinanzjati permezz ta' riżorsi tal-Istat.

(140) Abbażi ta' dawn l-elementi, għandu jiġi konkluż li l-mekkaniżmu tas-sussidji lill-kumpaniji tal-ajru stabbilit mill-Artikolu 2 tad-Digriet Irjali tas-7 ta' Jannar 2014 huwa imputabbli lill-Istat u mogħti mill-Belġju permezz ta' riżorsi tal-Istat fis-sens tal-Artikolu 107(1) TFUE.

Vantaġġ ekonomiku

(141) Sabiex jiġi ddeterminat jekk miżura tal-Istat tikkostitwix għajnuna lil impriża, għandu jiġi ddeterminat jekk il-kumpanija inkwistjoni tgawdix minn vantaġġ ekonomiku li jippermettilha tevita kostijiet li kieku kien ikollha tħallas mir-riżorsi finanzjarji proprji tagħha, jew jekk tgawdix minn vantaġġ li kieku ma kinitx tirċievi f'kundizzjonijiet normali tas-suq.

(142) Huwa biss l-effett tal-miżura fuq l-impriża li huwa rilevanti, mhux il-kawża jew l-objettiv tal-intervent mill-Istat. Kull meta s-sitwazzjoni finanzjarja ta' impriża tittejjeb bħala riżultat ta' intervent mill-Istat fuq termini li jkunu differenti mill-kundizzjonijiet tas-suq normali, ikun hemm vantaġġ. Sabiex dan jiġi vvalutat, is-sitwazzjoni finanzjarja tal-impriża li ssegwi l-miżura għandha tiġi mqabbla mas-sitwazzjoni finanzjarja tagħha li kieku l-miżura ma ġietx introdotta. Minħabba li l-effett tal-miżura fuq l-impriża biss huwa importanti, huwa irrelevanti jekk il-vantaġġ huwiex obbligatorju għall-impriża fis-sens li ma setgħetx tevitah jew tirrifjutah.

(143) Skont l-Artikolu 2 tad-Digriet Irjali tas-7 ta' Jannar 2014, BAC għandha tqassam lura is-sussidju li tirċievi mingħand l-Istat lill-utenti tal-Ajruport Nazzjonali ta' Brussell li jkunu ġarrew aktar minn 400000 passiġġier (esklużi l-passiġġieri fi transitu u fi trasferiment) li jkunu telqu mill-ajruport bejn l-1 ta' Jannar u l-31 ta' Diċembru 2012, skont modi definiti minn dan l-istess Artikolu. Dawn il-pagamenti jikkonsistu fir-rimborż ta' parti mill-imposta tas-sigurtà dovuta lil BAC minn kull waħda mill-kumpaniji tal-ajru kkonċernati, kif juri l-kalkolu ppreżentat fil-premessi 39 sa 41. L-imposta tas-sigurtà tagħmel parti mill-imposti tal-ajruport stabbiliti minn BAC u fatturata lill-kumpaniji tal-ajru bi skambju għal servizzi kummerċjali, fosthom l-aċċess għall-infrastruttura tal-ajruport, li l-kumpaniji tal-ajru jkollhom bżonn biex jipprovdu s-servizzi ta' trasport bl-ajru tagħhom. Barra minn hekk, din l-imposta hija espressa bħala ammont fatturat għal kull passiġġier ittrasportat mill-ajruport u għalhekk taqa' direttament taħt l-attivitajiet ta' trasport kummerċjali tal-passiġġieri mill-kumpaniji tal-ajru. Għaldaqstant hija tagħmel parti mill-ispejjeż li l-kumpaniji tal-ajru li joperaw fl-Ajruport Nazzjonali ta' Brussell ikollhom iġarrbu f'kundizzjonijiet normali tas-suq. Għaldaqstant, il-miżura inkwistjoni tevita lill-kumpaniji tal-ajru kkonċernati li jġarrbu spejjeż li normalment kien ikollhom iħallsu mir-riżorsi finanzjarji proprji tagħhom u tagħtihom vantaġġ li ma kinux jirċievu f'kundizzjonijiet normali tas-suq.

(144) Skont il-Belġju, biex tiġi evalwata l-eżistenza ta' vantaġġ ekonomiku f'dan il-każ, jeħtieġ li jsir paragun bejn il-miżura eżaminata f'din il-proċedura u sitwazzjoni simili fil-Belġju. Il-Belġju jenfasizza f'dan ir-rigward li, sal-adozzjoni tal-miżura inkwistjoni, l-Ajruport Nazzjonali ta' Brussell biss kien jitlob imposta mingħand l-utenti tiegħu għall-ispejjeż tas-sigurtà ġġenerati mill-użu tagħhom tal-ajruport, mingħajr intervent pubbliku. Skont il-Belġju, dan jiddistingwi lill-Ajruport Nazzjonali ta' Brussell mis-sitwazzjoni tal-ajruporti l-oħrajn li jinsabu fir-Reġjun ta' Walloon u fir-Reġjun Fjamming, fejn il-kostijiet kollha relatati mas-servizzi tas-sigurtà tal-ajruport huma mħallsa mir-reġjuni kkonċernati. Il-Belġju jirreferi f'dan ir-rigward għad-Deċiżjoni Charleroi, u b'mod partikolari għall-premessi 269 u 270 tagħha. Abbażi tal-punti minn 54 sa 60 tal-Linji Gwida dwar l-Avjazzjoni, li jirrigwardaw l-applikazzjoni tal-prinċipju tal-operatur f'ekonomija tas-suq għall-miżuri meħuda favur il-kumpaniji tal-ajru, u l-użu tal-metodi ta' tqabbil bejn l-ajruporti għal dan il-għan, il-Belġju jikkonkludi li l-miżura inkwistjoni ma tagħti ebda vantaġġ ekonomiku lill-kumpaniji tal-ajru kkonċernati. Brussels Airlines tressaq argumenti simili, billi tenfasizza n-nuqqas ta' imposta ta' sigurtà mitluba mingħand il-kumpaniji tal-ajru fl-ajruport ta' Charleroi.

(145) Il-Kummissjoni ma taqbilx mal-pożizzjoni tal-Belġju rigward il-metodu li għandu jiġi applikat biex tivvaluta l-eżistenza ta' vantaġġ ekonomiku f'din il-kawża. Il-Kummissjoni tinnota l-ewwel nett li s-silta tal-Linji Gwida dwar l-Avjazzjoni li għaliha jirreferi l-Belġju tirrigwarda l-analiżi tal-imġiba ta' operatur ta' ajruport fir-rigward ta' kumpanija jew diversi kumpaniji tal-ajru, sabiex jiġi ddeterminat jekk l-imposti mitluba minn dan l-operatur humiex konformi mal-prinċipju tal-operatur f'ekonomija tas-suq. Il-miżura eżaminata ma tidħolx f'dan il-kuntest peress li hija miżura ta' rimborż parzjali mill-Istat ta' imposti mitluba minn operatur ta' ajruport privat lil tliet kumpaniji tal-ajru speċifiċi.

(146) Barra minn hekk, għall-kumpaniji tal-ajru li joperaw fil-Belġju, il-kundizzjonijiet normali tas-suq jikkorrispondu għal sitwazzjoni fejn huma jġorru l-piż finanzjarju kollu tal-imposti tal-ajruport mitluba mingħandhom, ikunu xi jkunu d-differenzi bejn dawn l-imposti, li l-livell tagħhom huwa stabbilit mid-diversi operaturi tal-ajruporti skont għadd ta' fatturi bħall-politiki kummerċjali rispettivi tagħhom, il-livelli ta' kostijiet rispettivi tagħhom, il-qafas regolatorju reġjonali jew nazzjonali li fih ikollhom jistabbilixxu dawn l-imposti, kif ukoll kemm ikollhom iġorru mill-piż finanzjarju tal-attivitajiet li jaqgħu taħt il-prerogattivi ta' awtorità pubblika. Il-kundizzjonijiet normali tas-suq ma jassumux li l-imposti tal-ajruport ikunu l-istess fid-diversi ajruporti Belġjani, anki jekk wieħed iqis li dawn huma komparabbli biżżejjed biex ikun jista' jiġi applikat il-metodu rakkomandat fil-punti minn 54 sa 60 tal-Linji Gwida dwar l-Avjazzjoni, xi ħaġa li l-Belġju ma ppruvax juri. Għaldaqstant, sussidju li jqarreb l-imposti mitluba f'ajruport Belġjan mal-imposti mitluba f'ajruporti Belġjani oħrajn ma jistax ma jiġix ikkwalifikat bħala vantaġġ ekonomiku.

(147) Barra minn hekk, ir-referenza tal-Belġju għall-premessi 269 u 270 tad-Deċiżjoni Charleroi ma tidhirx li hija rilevanti. F'dawn il-premessi, il-Kummissjoni ma tiħux pożizzjoni iżda tiġbor fil-qosor il-kummenti tal-Belġju dwar l-osservazzjonijiet tal-partijiet ikkonċernati fil-kuntest tal-proċedura ta' investigazzjoni formali fir-rigward tal-ajruport ta' Charleroi. Barra minn hekk, il-premessi inkwistjoni jirrigwardaw l-għażla tal-awtoritajiet pubbliċi Belġjani jekk jassumux jew le r-responsabbiltà tal-eżekuzzjoni jew tal-finanzjament tal-attivitajiet imwettqa mill-operaturi tal-ajruport u li dawn l-awtoritajiet iqisu li jaqgħu taħt il-prerogattivi ta' awtorità pubblika. Din il-kwistjoni mhijiex rilevanti għall-analiżi tal-miżura li qed tiġi eżaminata. Kif indikat qabel fil-premessa (131) ta' din id-Deċiżjoni, il-Kummissjoni ma tikkontestax il-possibbiltà li l-Istat Federali jikkumpensa spejjeż imġarrba minn BAC għall-attivitajiet ta' sigurtà tagħha iżda tipprova tiddetermina jekk il-mekkaniżmu ta' ridistribuzzjoni tas-sussidju stabbilit mid-Digriet Irjali tas-7 ta' Jannar 2014 lill-kumpaniji tal-ajru jagħtix vantaġġ ekonomiku lil dawn tal-aħħar.

(148) Jirriżulta minn dak li ntqal li l-argumenti ppreżentati mill-Belġju u minn Brussels Airlines ma jippreġudikawx il-konklużjoni li l-miżura li qed tiġi eżaminata tipprevjeni li l-kumpaniji tal-ajru kkonċernati jġarrbu l-kostijiet li normalment kien ikollhom iħallsu mir-riżorsi finanzjarji proprji fil-kundizzjonijiet normali tas-suq.

(149) Barra minn hekk, fl-ipoteżi li BAC irċeviet sussidju fil-kundizzjonijiet previsti fl-Artikolu 1 tad-Digriet Irjali tas-7 ta' Jannar 2014 u dan ma kienx soġġett għal ebda obbligu li jitqassam fost il-kumpaniji tal-ajru, huwa improbabbli li BAC kienet se tgħaddi l-effett ta' dan is-sussidju fuq l-imposta tas-sigurtà mitluba mingħand il-kumpaniji tal-ajru bl-istess mod kif previst fl-Artikolu 2 tal-imsemmi Digriet Irjali.

(150) L-ewwel nett, xejn ma jindika b'mod ċar li taħt l-effett ta' tali sussidju, BAC kienet se tnaqqas l-imposta tas-sigurtà jew kienet se tirrimborża parti minnha. BAC tista' talloka s-sussidju għall-finanzjament ta' investimenti addizzjonali fil-qasam tas-sigurtà, mhux previsti fil-programm ta' investiment eżistenti tagħha. F'tali konfigurazzjoni, BAC ma jkollha ebda raġuni biex tnaqqas l-imposta tas-sigurtà jew li tirrimborża parti minnha. Min-naħa l-oħra, kif indikat fit-Taqsima 2.1.3, is-sistema tal-kontroll tat-tariffi u l-formula ta' kontroll tat-tariffi huma stabbiliti minn BAC għal perjodu regolatorju ta' ħames snin. Id-Digriet Irjali tas-7 ta' Jannar 2014 ġie adottat matul il-perjodu regolatorju 2011-2015. Huwa improbabbli li bħala riżultat tas-sussidju, BAC setgħet issib jew kienet issib inċentiv biex tipproponi tnaqqis fl-imposta tas-sigurtà jew rimborż parzjali ta' din l-imposta qabel tmiem dan il-perjodu regolatorju, jiġifieri kważi sentejn wara l-adozzjoni tad-Digriet Irjali.

(151) Barra minn hekk, anki jekk wieħed jassumi li bħala riżultat ta' dan is-sussidju, BAC setgħet tqis u qieset li kien ikun tajjeb li tgħaddi r-riżultat ta' dan is-sussidju fuq il-kumpaniji tal-ajru billi tnaqqas l-imposta tas-sigurtà jew billi tirrimborża parti minnha, huwa raġonevoli li wieħed jaħseb li dan kienet tagħmlu b'mod uniformi għall-utenti kollha tal-Ajruport Nazzjonali ta' Brussell. Fil-fatt, l-imposta tas-sigurtà attwalment għandha l-forma ta' ammont wieħed għal kull passiġġier li jitlaq mill-ajruport irrispettivament mit-tip ta' passiġġier. Sussidju li jnaqqas l-ispejjeż tas-sigurtà ta' BAC għandu għalhekk loġikament iwassal għal tnaqqis ta' dan l-ammont wieħed, u b'hekk igawdu l-kumpaniji kollha tal-ajru b'mod proporzjonali għan-numru ta' passiġġieri li huma jġorru bi tluq mill-Ajruport Nazzjonali ta' Brussell. Madankollu, il-mekkaniżmu previst fl-Artikolu 2 tad-Digriet Irjali tas-7 ta' Jannar 2014 iwassal għal riżultati differenti ħafna. B'mod partikolari, permezz ta' dan il-mekkaniżmu, ħafna mill-utenti tal-Ajruport Nazzjonali ta' Brussell ma jgawdu minn ebda rimborż parzjali tal-imposta tas-sigurtà tagħhom, filwaqt li tliet kumpaniji tal-ajru biss jaqsmu fosthom il-baġit disponibbli ta' EUR 19000000 fis-sena.

(152) Għalhekk, il-mekkaniżmu ta' ridistribuzzjoni jibdel il-piżijiet finanzjarji mġarrba mill-kumpaniji tal-ajru li jużaw l-Ajruport Nazzjonali ta' Brussell favur it-tliet kumpaniji tal-ajru li jgawdu minn dan il-mekkaniżmu, meta mqabbel ma' sitwazzjoni ipotetika fejn BAC kienet tirċievi sussidju fil-kundizzjonijiet previsti fl-Artikolu 1 tad-Digriet Irjali tas-7 ta' Jannar 2014 mingħajr ma dan is-sussidju jkun marbut ma' xi obbligu ta' ridistribuzzjoni lill-kumpaniji tal-ajru.

(153) Barra minn hekk, il-miżura ma tistax titqies bħala kumpens finanzjarju li l-Istat jagħti lill-kumpaniji tal-ajru kkonċernati għall-provvista ta' xi servizz ta' interess ekonomiku ġenerali, peress li l-Belġju ma invokax l-eżistenza ta' tali servizz ta' interess ekonomiku ġenerali fdat lill-kumpaniji tal-ajru kkonċernati. Għaldaqstant il-miżura ma tistax titqies li hija eżenti minn vantaġġ ekonomiku skont is-Sentenza Altmark.

(154) Jirriżulta minn dan kollu li ntqal li l-miżura inkwistjoni tagħti vantaġġ ekonomiku lil xi kumpaniji tal-ajru.

(155) Il-Kummissjoni tinnota li fis-26 ta' Awwissu 2014, is-sit web tas-Sur Melchior Wathelet, li dak iż-żmien kien il-Viċi Prim Ministru u l-eks Segretarju tal-Istat għall-Ambjent, l-Enerġija, il-Mobilità u r-Riformi Istituzzjonali, kien jindika li il-Kumitat Ministerjali Ristrett iddeċieda f'Diċembru 2012 li jagħti pakkett ta' EUR 20000000 fis-sena biex jappoġġja lill-kumpaniji tal-ajru Belġjani (…). Fis-27 ta' Awwissu 2014, is-Sinjura Catherine Fonck, li dak iż-żmien kienet is-Segretarju tal-Istat għall-Mobilità, iddikjarat: Il-gvern ħa deċiżjoni ċara ħafna. Is-sussidji lill-kumpaniji tal-ajru li jgħaddu minn Brussels Airport iridu jitħallsu. Dawn id-dikjarazzjonijiet ministerjali jispjegaw il-konklużjoni li l-mekkaniżmu ta' ridistribuzzjoni stabbilit mill-Artikolu 2 tad-Digriet Irjali tas-7 ta' Jannar 2014 jagħti vantaġġ ekonomiku lill-kumpaniji tal-ajru kkonċernati, u saħansitra jissuġġerixxu li l-għoti ta' dan il-vantaġġ lil dawn il-kumpaniji tal-ajru seta' kien l-għan ewlieni ta' dan id-Digriet Irjali.

(156) Jonqos li jiġi ddeterminat jekk il-vantaġġ ekonomiku identifikat fil-premessi minn 141 sa 154 huwiex selettiv.

Selettività

(157) L-Artikolu 107(1) TFUE jirrikjedi li miżura, sabiex tiġi definita bħala għajnuna mill-Istat, għandha tiffavorixxi ċerti impriżi jew il-produzzjoni ta' ċerti oġġetti. Għalhekk, il-miżuri li jagħtu vantaġġ b'mod selettiv lil ċerti impriżi jew kategoriji ta' impriżi jew lil ċerti setturi ekonomiċi biss jistgħu jikkostitwixxu għajnuna mill-Istat.

(158) Il-Kummissjoni tinnota l-ewwel nett li skont id-Digriet Irjali tas-7 ta' Jannar 2014, it-tliet kumpaniji tal-ajru li ġarrew aktar minn 400000 passiġġier mill-Ajruport Nazzjonali ta' Brussell fl-2012 biss setgħu jgawdu mill-miżura, jiġifieri Brussels Airlines, TUI Airlines Belgium u Thomas Cook Airlines Belgium, jiġifieri sottogrupp ta' kumpaniji tal-ajru li effettivament jew potenzjalment iġorru passiġġieri bi tluq mill-Ajruport Nazzjonali ta' Brussell. B'hekk, meta ġie adottat id-Digriet Irjali, l-uniċi benefiċjarji possibbli tal-miżura kienu perfettament identifikabbli u kienu jiffurmaw sottogrupp ristrett ta' kumpaniji tal-ajru li jittrasportaw passiġġieri bi tluq mill-Ajruport Nazzjonali ta' Brussell, iddeterminat esklussivament skont id-data dwar is-sena 2012 li kienet disponibbli meta ġie adottat id-Digriet Irjali. Madankollu, vantaġġ ekonomiku mogħti lil grupp ristrett magħmul minn impriżi perfettament identifikabbli fil-mument tal-għoti, huwa bilfors selettiv, kemm de jure kif ukoll de facto.

(159) Il-miżura li qed tiġi eżaminata tagħti għalhekk vantaġġ selettiv lill-kumpaniji tal-ajru li jibbenefikaw minnha. Din il-konklużjoni ma tikkontradixxix ir-raġunament tal-Qorti tal-Ġustizzja fis-sentenza li tat fil-21 ta' Diċembru 2016 fil-Kawża Hansestadt Lübeck, għar-raġunijiet mogħtija fil-premessi 161 u 162.

(160) F'din is-sentenza, il-Qorti tal-Ġustizzja eżaminat il-kundizzjonijiet li fihom regolament li jistabbilixxi l-ammont tal-imposti tal-ajruport ta' Lübeck seta' jimplika vantaġġ selettiv. Hija qieset li l-kuntest ta' riferiment rilevanti sabiex jiġi eżaminat il-kriterju ta' selettività tar-regolament inkwistjoni kien dak tal-iskema ta' imposti applikabbli għall-ajruport ta' Lübeck. B'hekk, huwa fi ħdan il-grupp kostitwit mill-utenti attwali u potenzjali tal-Ajruport ta' Lübeck li jeħtieġ li jiġi eżaminat jekk ir-regolament inkwistjoni jagħtix vantaġġ lil ċerti impriżi fuq oħrajn, u fejn xieraq, li jiġi ddeterminat jekk l-għoti ta' dan il-vantaġġ huwiex iġġustifikat min-natura u l-ekonomija tas-sistema li taħtha taqa' l-miżura.

(161) Il-miżura li qed tiġi eżaminata hija differenti mill-miżura inkwistjoni fil-każ Hansestadt Lübeck peress li ma tikkonsistix mir-regolazzjoni tal-imposti tal-ajruport applikabbli għall-grupp miftuħ tal-utenti kollha tal-Ajruport Nazzjonali ta' Brussell, iżda tagħti sussidju lil sottogrupp magħluq ta' dak il-grupp. B'mod partikolari, kwalunkwe kumpanija tal-ajru li ttrasportat inqas minn 400000 passiġġier bi tluq mill-Ajruport Nazzjonali ta' Brussell fl-2012 hija eskluża mill-benefiċċju tal-miżura, irrispettivament min-numru u t-tip ta' passiġġieri li ġarret matul il-perjodu ta' applikazzjoni tal-miżura. Għaldaqstant il-mudell ta' analiżi tas-selettività li għażlet il-Qorti tal-Ġustizzja fil-każ Hansestadt Lübeck ma japplikax għall-miżura li qed tiġi eżaminata.

(162) Madankollu, anki jekk wieħed jassumi li l-mekkaniżmu ta' ridistribuzzjoni stabbilit mill-Artikolu 2(1) tad-Digriet Irjali tas-7 ta' Jannar 2014 jista' jitqies bħala miżura għall-iffissar tal-imposti tal-Ajruport Nazzjonali ta' Brussell u li s-selettività eventwali tal-miżura għandha tiġi eżaminata billi jittieħed bħala referenza l-grupp iffurmat mill-utenti attwali u potenzjali tal-Ajruport Nazzjonali ta' Brussell, xorta waħda tibqa' miżura selettiva, kif se jintwera fil-premessi minn 163 sa 192.

(163) Fl-ipoteżi msemmija fil-premessa 162, jenħtieġ li jitqies li l-kuntest ta' referenza rilevanti għall-valutazzjoni tas-selettività eventwali tal-miżura inkwistjoni jikkonsisti mis-sistema ta' imposti tal-ajruport fis-seħħ ġewwa l-Ajruport Nazzjonali ta' Brussell u l-iskema ta' finanzjament tal-attivitajiet ta' sigurtà ta' dan l-ajruport. Barra minn hekk, l-eżami tal-eżistenza ta' trattament differenti kkawżat mill-miżura eżaminata u l-ġustifikazzjonijiet possibbli tiegħu, irid isir fi ħdan il-grupp iffurmat mill-utenti attwali u potenzjali tal-Ajruport Nazzjonali ta' Brussell. Dan huwa l-approċċ li l-Belġju uża, tal-inqas b'mod impliċitu, waqt il-proċedura. Fil-fatt, ta diversi ġustifikazzjonijiet għal ċerti aspetti tal-miżura li kkawżaw trattament differenti fost l-utenti attwali u potenzjali tal-Ajruport Nazzjonali ta' Brussell, fosthom il-limitu ta' 400000 passiġġier u l-użu ta' data dwar is-sena 2012 biex jidentifika l-impriżi benefiċjarji. Il-Kummissjoni tqis li dan il-metodu mhuwiex applikabbli għal dan il-każ, għar-raġunijiet imsemmija fil-premessa 161. Barra minn hekk, kif jintwera fil-premessi minn 164 sa 192, l-applikazzjoni ta' dan il-metodu twassal għall-konklużjoni li l-miżura hija selettiva.

(164) Jekk wieħed japplika l-metodu deskritt fil-premessa 162, bil-kuntest ta' referenza ddeterminat kif indikat fil-premessa 163, għandu jkun innutat li l-miżura toħloq vantaġġ għal ċerti impriżi u mhux għal oħrajn li jinsabu f'sitwazzjoni fattwali u ġuridika simili. Fil-fatt, il-kumpaniji kollha tal-ajru li jagħmlu titjiriet mill-Ajruport Nazzjonali ta' Brussell jinsabu f'sitwazzjoni fattwali u ġuridika simili, peress li kollha huma soġġetti għall-istess sistema ta' imposti tal-ajruport u b'mod partikolari għal imposta tas-sigurtà li tikkonsisti f'ammont wieħed mitlub għal kull passiġġier li jitlaq mill-ajruport irrispettivament mit-tip u n-numru ta' passiġġieri. Madankollu, filwaqt li ċerti utenti, f'dan il-każ dawk li jissodisfaw il-kriterju definit fl-Artikolu 2(1) tad-Digriet Irjali tas-7 ta' Jannar 2014, jibbenefikaw minn rimborż parzjali tal-imposta tas-sigurtà tagħhom, oħrajn ma jieħdu ebda rimborż.

(165) Jonqos li jiġi ddeterminat jekk dan it-trattament differenti huwiex iġġustifikat min-natura u l-ekonomija tas-sistema li taħtha taqa' l-miżura. F'dan ir-rigward, ta' min ifakkar l-għan tad-Digriet Irjali tas-7 ta' Jannar 2014 li stabbilixxa l-miżura inkwistjoni. Skont it-termini tiegħu stess, din hija miżura ta' appoġġ għall-infrastrutturi tas-sigurtà fl-Ajruport Nazzjonali ta' Brussell. Ta' min ifakkar ukoll li skont ir-regolamenti fis-seħħ, hija BAC li għandha tiddetermina l-livell tal-imposti tal-ajruport, fil-limiti tal-qafas regolatorju deskritt fit-Taqsima 2.1.3. Fil-fatt, skont id-dispożizzjonijiet imsemmija fil-premessa 25 BAC għandha tistabbilixxi, wara li tikkonsulta mal-utenti tal-ajruport, is-sistema ta' tariffi u l-formula ta' kontroll tat-tariffi, li jitqiesu li huma miftiehma bejn il-partijiet jekk utent ma jibgħatx notifika ta' nuqqas ta' qbil ġustifikat. L-awtorità regolatorja ekonomika tista' teħtieġ ċerti adattamenti jew modifiki fil-formula ta' kontroll tat-tariffi jew fis-sistema tat-tariffi jekk il-partijiet ma jaqblux skont l-Artikolu 55(4) tad-Digriet Irjali tal-21 ta' Ġunju 2004. Il-formula ta' kontroll tat-tariffi u kwalunkwe modifika f'din il-formula mill-awtorità regolatorja ekonomika, kif ukoll is-sistema tat-tariffi, iridu jiġu approvati mill-Ministru responsabbli għan-navigazzjoni bl-ajru. Fl-aħħar nett, il-Kummissjoni tinnota li BAC stabbiliet imposta ta' sigurtà maħsuba biex tiffinanzja l-attivitajiet ta' sigurtà tagħha, tal-anqas sakemm jiġi introdott is-sussidju stabbilit permezz tal-Artikolu 1 tad-Digriet Irjali tas-7 ta' Jannar 2014. L-elementi mfakkra f'din il-premessa jagħmlu parti min-natura u l-ekonomija tas-sistema li taħtha taqa' l-miżura inkwistjoni.

(166) L-imposta tas-sigurtà tikkonsisti f'ammont wieħed mitlub għal kull passiġġier li jitlaq mill-ajruport, irrispettivament mit-tip ta' passiġġier ittrasportat. Miżura ta' finanzjament pubbliku tal-attivitajiet ta' sigurtà għandha għalhekk loġikament twassal lil BAC, biex tal-anqas tuża s-sussidju kollu biex tiffinanzja spejjeż ta' sigurtà addizzjonali, biex tbaxxi l-imposta tas-sigurtà b'mod uniformi. B'hekk, l-utenti kollha tal-Ajruport Nazzjonali ta' Brussell igawdu mill-effetti ta' dan il-finanzjament skont in-numru ta' passiġġieri li jġorru bi tluq mill-ajruport. Madankollu, il-miżura kkonċernata twassal għal riżultat ferm differenti, anki għas-sempliċi fatt li ħafna utenti ma jistgħux igawdu minn rimborż taħt l-Artikolu 2 tad-Digriet Irjali tas-7 ta' Jannar 2014. Għaldaqstant il-miżura tiddevja mill-ekonomija ġenerali tas-sistema ta' imposti tal-ajruport mingħajr raġuni oġġettiva u għal diversi raġunijiet. L-ewwel nett, hija r-riżultat ta' deċiżjoni unilaterali tal-Gvern Federali li ma għandu ebda kompetenza biex jiddetermina l-imposti tal-ajruport. Fil-fatt, ir-rwol tal-Gvern Federali huwa biss li japprova jew ma japprovax il-formula ta' kontroll u s-sistema tat-tariffi meta jintemm il-proċess deskritt fit-Taqsima 2.1.3, li qatt ma ġie segwit biex tiġi adottata l-miżura inkwistjoni. Imbagħad il-miżura hija inkonsistenti mal-istruttura tal-imposta tas-sigurtà, li għandha l-forma ta' ammont għal kull passiġġier li jitlaq mill-ajruport u li ma tagħmilx distinzjoni bejn it-tip jew in-numru ta' passiġġieri ttrasportati. B'hekk it-trattament differenti kkawżat mill-miżura ma jistax ikun iġġustifikat min-natura u l-ekonomija tas-sistema li taħtha taqa' l-miżura msemmija.

(167) Fil-bqija ta' din id-deċiżjoni, u għall-fini ta' kompletezza, il-Kummissjoni xorta se teżamina l-ġustifikazzjonijiet mogħtija mill-Belġju u minn ċerti partijiet terzi dwar il-parametri li jiddeterminaw il-benefiċjarji tal-miżura. Dwar il-limitazzjoni tan-numru ta' benefiċjarji abbażi tal-limitu ta' 400000 passiġġier fis-sena 2012, minbarra l-passiġġieri fi transitu u fi trasferiment.

(168) Skont il-Belġju, l-idea sottostanti tal-miżura hija li tirrifletti l-karattru dekrexxenti tal-kost marġinali għal kull passiġġier tal-ispejjeż tas-sigurtà u li b'hekk jiġi evitat li jiġu penalizzati l-utenti li huma l-aktar li jikkontribwixxu għall-iżvilupp tat-traffiku tal-passiġġieri tal-ajruport.

(169) Rigward l-għażla tal-limitu ta' 400000 passiġġier fis-sena, minbarra l-passiġġieri fi transitu u fi trasferiment, biex jiġu ddeterminati l-benefiċjarji, il-Belġju jispjega li dan il-limitu ġie stabbilit abbażi tal-analiżijiet li ġejjin:

41 % tal-kost tas-sigurtà huwa fiss, filwaqt li 59 % huwa varjabbli;

it-trasferiment tal-passiġġieri mhuwiex eżenti mill-ispejjeż tas-sigurtà, li jikkostitwixxi differenza notevoli minn ħafna ajruporti Ewropej.

il-mod ta' ffissar tat-tariffi tas-sigurtà fl-Ajruport Nazzjonali ta' Brussell ma jirriflettix id-digressjoni tal-kostijiet tas-sigurtà u l-kostijiet reali ta' ġestjoni tal-passiġġieri mhumiex għalhekk riflessi f'din il-prattika ta' tariffi;

il-kumpaniji tal-ajru tal-passiġġieri jikkontribwixxu aktar għall-ispejjeż tas-sigurtà mit-trasportaturi tal-merkanzija peress li l-imposti huma bbażati fuq in-numru ta' passiġġieri filwaqt li sehem kbir tal-kostijiet tas-sigurtà ġej mill-ġestjoni tas-sigurtà għal dawn it-trasportaturi tal-merkanzija.

(170) Skont il-Belġju, din l-analiżi twassal għall-konklużjoni li t-trasportaturi tal-passiġġieri ġew iċċarġjati żżejjed u li kienu meħtieġa miżuri ta' korrezzjoni peress li l-iżvilupp tal-ajruport jirrikjedi li jiżdied speċifikament in-numru ta' passiġġieri li jitilqu mill-Ajruport Nazzjonali ta' Brussell.

(171) Ma' dawn il-ġustifikazzjonijiet, il-Belġju jżid jgħid li kienet kwistjoni ta' stabilizzazzjoni tal-operazzjonijiet tat-trasportaturi ewlenin permezz ta' inċentiv ċar u oġġettiv. Skont il-Belġju, l-inċentiv jista' jkollu effett hekk kif jinqabeż il-limitu ta' 400000 passiġġier bi tluq mill-ajruport. Fil-fatt valur inqas, skont il-Belġju, ikollu bħala effett li jnaqqas il-miżura li tissussidja biss terz tal-ispejjeż tas-sigurtà tal-ajruport, filwaqt li valur ogħla jagħmilha diffiċli ħafna għall-kumpaniji tal-ajru li jixtiequ joperaw fl-Ajruport Nazzjonali ta' Brussell li jilħqu l-għan.

(172) Fl-aħħar nett, fil-kummenti tiegħu dwar id-Deċiżjoni tal-ftuħ il-Belġju żied jgħid: l-għan kien li nħeġġu lill-kumpaniji tal-ajru jkomplu jiżviluppaw fi Brussell billi nikkumpensawhom għat-tnaqqis fil-kostijiet tas-sigurtà li ġġib magħha żieda fil-passiġġieri.

(173) Il-Kummissjoni tinnota l-ewwel nett li l-kunsiderazzjonijiet li għamel il-Belġju dwar it-trasportaturi tal-merkanzija ma jiġġustifikawx id-differenzi kkawżati mill-miżura fost it-trasportaturi tal-passiġġieri, li huma s-suġġett ta' din l-analiżi.

(174) L-argumenti l-oħrajn imressqa mill-Belġju, kif miġburin fil-qosor fil-premessi minn 169 sa 172, ma jistgħu jiġġustifikaw la l-eżistenza tal-limitu ta' 400000 passiġġier fis-sena u lanqas il-livell tiegħu, u lanqas il-fatt li jirrigwarda d-data storika tas-sena 2012. Fil-fatt, dawn l-argumenti jistgħu jinġabru f'żewġ punti prinċipali. L-ewwel nett, il-limitu huwa ġġustifikat mix-xewqa li jiġi promoss jew żviluppat it-traffiku tal-ajruport, l-aktar billi jiġi stabbilizzat it-traffiku tal-operaturi li jittrasportaw l-aktar passiġġieri. It-tieni, huwa ġġustifikat mill-għan li jiġu korretti l-effetti tal-imposta tas-sigurtà attwali, li ma tirriflettix tajjeb ir-realtà tal-kostijiet tas-sigurtà ġġenerati mit-traffiku tal-passiġġieri ta' kull kumpanija tal-ajru.

(175) Rigward l-ewwel punt, il-Kummissjoni tinnota li l-għan li jiġi stabbilizzat jew żviluppat it-traffiku tal-Ajruport Nazzjonali ta' Brussell ma għandu x'jaqsam xejn mal-għan iddikjarat fid-Digriet Irjali tas-7 ta' Jannar 2014, jiġifieri l-finanzjament tal-infrastrutturi tas-sigurtà. Barra minn hekk, l-għan ta' stabilizzazzjoni jew ta' żvilupp tat-traffiku ġej fir-realtà mill-istrateġija u l-politika kummerċjali ta' BAC. Ta' min ifakkar f'dan ir-rigward li s-sistema tal-imposti tal-ajruport fl-Ajruport Nazzjonali ta' Brussell ma tipprovdi bl-ebda mod li l-Gvern Federali jista' jieħu post BAC fl-implimentazzjoni tal-inċentivi finanzjarji għall-promozzjoni tat-traffiku. Kif ġie indikat qabel, skont ir-regolamenti fis-seħħ, hija BAC li għandha tiddetermina l-livell tal-imposti tal-ajruport, fil-limiti tal-qafas regolatorju deskritt fit-Taqsima 2.1.3. Barra minn hekk, għalkemm l-objettiv tal-Belġju huwa li jżid it-traffiku fl-Ajruport Nazzjonali ta' Brussell, ir-raġunijiet li għalihom l-inċentivi finanzjarji għandhom ikunu riżervati għall-kumpaniji li ttrasportaw aktar minn 400000 passiġġier fl-2012, data preċedenti għad-dħul fis-seħħ tal-imsemmi Digriet Irjali, mhumiex ċari. B'mod partikolari, il-kumpaniji tal-ajru li ma laħqux il-limitu tat-traffiku fl-2012 huma esklużi mill-kamp ta' applikazzjoni tal-miżura meta jista' jkun li huma kapaċi jżidu t-traffiku tagħhom b'mod sinifikanti fis-snin ta' wara f'każ li jingħataw inċentivi xierqa.

(176) L-uniċi elementi kkwantifikati mogħtija mill-Belġju sabiex jiġġustifika l-limitu ta' 400000 passiġġier huma data dwar in-numru ta' passiġġieri li jitilqu mill-ajruport trasportati fl-2012 u fl-2013 mill-kumpaniji tal-ajru li ttrasportaw aktar minn 100000 passiġġier mill-ajruport matul waħda minn dawn is-sentejn, u li jiddistingwu bejn il-passiġġieri fi trasferiment, il-passiġġieri fi transitu u l-passiġġieri l-oħrajn li jitilqu mill-ajruport. Il-Belġju jikkummenta din id-data hekk: L-analiżi taċ-ċifri mogħtija fl-Anness 2 turi għas-sena 2012 li huwa mil-limitu ta' 400000 passiġġier li jitilqu mill-ajruport li tiżdied b'mod sinifikanti r-rata ta' tkabbir – tal-koeffiċjent angolari tal-kurva derivata minn din id-data. Għaldaqstant huwa minn dan il-valur li l-inċentiv jista' jipproduċi dawn l-effetti. Madankollu, sa fejn din id-data turi biss il-bidliet fin-numru ta' passiġġieri trasportati bejn l-2012 u l-2013, u mhux ir-relazzjonijiet bejn l-imposti tal-ajruport, b'mod partikolari dik tas-sigurtà, u n-numru ta' passiġġieri ttrasportati, din ma tippermettix, fil-prinċipju, il-valutazzjoni tal-effetti ta' inċentiv tal-miżura kkonċernata fuq it-traffiku tal-Ajruport Nazzjonali ta' Brussell.

(177) Il-Kummissjoni tqis għalhekk li l-ewwel punt prinċipali tal-argumenti mressqa mill-Belġju, kif miġbura fil-qosor fil-premessa 174 ma jiġġustifikax il-limitu ta' 400000 passiġġier li jitilqu mill-ajruport fis-sena kkunsidrat fl-Artikolu 2(1) tad-Digriet Irjali tas-7 ta' Jannar 2014.

(178) Rigward it-tieni punt prinċipali msemmi fil-premessa 174, il-Kummissjoni tinnota li l-ħsieb li jiġi korrett il-mod kif BAC tiġbor il-kostijiet tas-sigurtà tagħha mingħand id-diversi kumpaniji tal-ajru, li l-Belġju jqis li huwa meħtieġ sabiex tiġi riflessa r-realtà tal-kostijiet ikkawżati mid-diversi kumpaniji tal-ajru, ma għandux x'jaqsam mal-għan tal-miżura, jiġifieri l-appoġġ għall-infrastruttura tas-sigurtà. Fil-fatt, għalkemm l-għoti ta' sussidju lil BAC biex tonqos l-istruttura tal-kostijiet tagħha tas-sigurtà huwa potenzjalment ta' natura tali li jappoġġa lill-infrastrutturi tas-sigurtà, il-mod kif BAC tqassam is-sehem minn dan is-sussidju fost id-diversi kumpaniji tal-ajru jidher li ma għandu l-ebda effett fuq dan l-objettiv. Barra minn hekk, ta' min ifakkar li hija r-responsabbiltà ta' BAC li tipproponi sistema ta' tariffi u formula ta' kontroll tat-tariffi li jirriflettu r-realtà tal-kostijiet. L-awtorità regolatorja ekonomika tista' biss tieħu deċiżjoni definittiva f'ċerti ċirkostanzi u wara proċess ta' konsultazzjoni li jinvolvi lill-utenti tal-Ajruport Nazzjonali ta' Brussell. Bl-intervent unilaterali tiegħu, permezz tal-miżura inkwistjoni, sabiex jikkoreġi l-istruttura tal-imposta tas-sigurtà, il-Gvern Federali injora mingħajr raġuni l-objettiv tas-sistema ġenerali ta' ffissar tal-imposti tal-ajruport.

(179) Barra minn hekk, anki jekk wieħed jassumi li l-Gvern Federali seta' leġittimament jagħmel din il-korrezzjoni sabiex tiġi riflessa r-realtà tal-kostijiet tas-sigurtà kkawżati mid-diversi kumpaniji tal-ajru, l-esklużjoni tal-kumpaniji tal-ajru li ttrasportaw inqas minn 400000 passiġġier bi tluq mill-ajruport fl-2012, esklużi l-passiġġieri fi transitu u fi trasferiment, ma tippermettix li jintlaħaq dan l-għan. Fil-fatt, għalkemm mhux eskluż li l-kost marġinali tal-ispejjeż tas-sigurtà għal kull passiġġier qed jonqos, xejn ma jindika fl-elementi pprovduti mill-Belġju li huwa biss mill-400000 passiġġier li dan l-effett ta' tnaqqis jistħoqqlu jiġi kkunsidrat, u li l-kumpaniji tal-ajru li jittrasportaw numru inqas ta' passiġġieri ma jistgħux jibbenefikaw mill-ħlas mill-Istat ta' sehem mill-kostijiet ta' sigurtà ta' BAC. Il-Belġju ma pprovda ebda ġustifikazzjoni kwalitattiva jew kwantitattiva għal dan il-punt. Għandu jkun innutat li matul kwalunkwe sena tal-applikazzjoni tal-iskema, kumpanija tal-ajru eliġibbli tista' tiġi rimborżata l-imposta tas-sigurtà sħiħa dovuta għal kull passiġġier li jitlaq mill-ajruport wara l-400000 wieħed sakemm ikun jippermetti l-pakkett baġitarju ta' EUR 19-il miljun. Madankollu, skont il-Belġju, sehem kbir mill-ispejjeż tas-sigurtà ta' BAC (59 %) huwa varjabbli. Minn dan jirriżulta li kull passiġġier addizzjonali, inkluż wara l-400000 wieħed, joħloq kostijiet ta' sigurtà addizzjonali pjuttost sinifikanti. Il-miżura inkwistjoni għalhekk ftit tista' tirrifletti b'mod korrett ir-realtà tal-kostijiet tas-sigurtà kkawżati mid-diversi utenti tal-Ajruport Nazzjonali ta' Brussell.

(180) Min-naħa tagħha, Brussels Airlines qieset li limitu marbut man-numru ta' passiġġieri kien rilevanti fil-każ ta' sussidju għal servizzi relatati mas-sigurtà tal-ajruporti peress li l-kostijiet tas-sigurtà fl-ajruporti huma wkoll marbuta man-numru ta' passiġġieri. Madankollu, Brussels Airlines ma speċifikatx kif il-mod li bih il-kostijiet tas-sigurtà jvarjaw b'mod preċiż skont in-numru ta' passiġġieri jiġġustifika l-għażla ta' limitu espress f'numru ta' passiġġieri li jeskludi mill-bidu kategorija sħiħa ta' kumpaniji tal-ajru. Brussels Airlines lanqas ma pprovdiet xi ġustifikazzjoni għal-livell tal-limitu magħżul.

(181) Barra minn hekk, kumpanija tal-ajru li ttrasportat aktar minn 400000 passiġġier mill-ajruport fis-sena, fl-2013, fl-2014 jew fl-2015, esklużi l-passiġġieri fi trasferiment jew fi transitu, ma tirċievi ebda rimborż parzjali tal-imposta tas-sigurtà tagħha għal dawn is-snin skont l-Artikolu 2 tad-Digriet Irjali tas-7 ta' Jannar 2014 jekk hija ma tkunx laħqet il-limitu ta' 400000 passiġġier fl-2012, u tibqa' penalizzata mill-istruttura tal-imposta tas-sigurtà li skont il-Belġju ma tirriflettix biżżejjed it-tnaqqis gradwali fil-kostijiet tas-sigurtà. B'hekk, l-esklużjoni a priori tal-kumpaniji tal-ajru li ttrasportaw inqas minn 400000 passiġġier bi tluq mill-ajruport fl-2012 mill-kamp ta' applikazzjoni tal-miżura, esklużi l-passiġġieri fi transitu u fi trasferiment, hija inkonsistenti mal-għan li tiġi riflessa aħjar ir-realtà tal-kostijiet tas-sigurtà fl-imposta tas-sigurtà.

(182) Fl-aħħar nett, fil-ġustifikazzjonijiet tiegħu, il-Belġju jinnota li t-trasferiment tal-passiġġieri ma kienx eżenti mill-ispejjeż tas-sigurtà tal-Ajruport Nazzjonali tal-Brussell, li ma jirriflettix it-tnaqqis fil-kostijiet tas-sigurtà. Jekk wieħed jassumi li hija korretta, din id-dikjarazzjoni hija inkonsistenti mal-fatt li l-passiġġieri fi trasferiment u fi transitu mhumiex ikkunsidrati biex jiġu identifikati l-kumpaniji tal-ajru li jaqbżu l-limitu ta' 400000 passiġġier ittrasportati mill-ajruport fl-2012 u għalhekk eliġibbli għal rimborż taħt il-miżura inkwistjoni.

(183) Fid-dawl ta' dak li ntqal, it-tieni punt prinċipali tal-argumenti mressqa mill-Belġju, kif imsemmi fil-premessa (174) ma jiġġustifikax il-limitu ta' 400000 passiġġier li jitilqu mill-ajruport fis-sena kif ikkunsidrat fl-Artikolu 2(1) tad-Digriet Irjali tas-7 ta' Jannar 2014.

(184) Barra minn hekk, filwaqt li skont l-Artikolu 2(1) tad-Digriet Irjali tas-7 ta' Jannar 2014, il-passiġġieri fi trasferiment u fi transitu huma esklużi mill-għadd tan-numru ta' passiġġieri biex jiġu ddeterminati l-kumpaniji tal-ajru benefiċjarji, dawn il-passiġġieri huma inklużi meta l-kumpaniji tal-ajru benefiċjarji jiġu biex jitħallsu skont l-Artikolu 2(2) ta' dan id-Digriet Irjali. Madankollu, il-metodi ta' kalkolu tas-sussidji għandhom ikunu konsistenti mal-kriterju użat biex jiġu ddeterminati l-benefiċjarji, inkella ma jistgħux ikunu konsistenti mal-għanijiet sottostanti għall-għażla tal-kriterju ta' selezzjoni tal-benefiċjarji.

(185) Ryanair innutat din l-inkonsistenza fil-kummenti tagħha. Fl-osservazzjonijiet tiegħu dwar il-kummenti ta' Ryanair, il-Belġju sempliċiment irrefera għall-komunikazzjonijiet preċedenti tiegħu fir-rigward ta' dan il-punt. Iżda dawn il-komunikazzjonijiet ma jispjegawx id-differenza tat-trattament tal-passiġġieri fi trasferiment u fi transitu fid-definizzjoni tal-kriterju ta' selezzjoni tal-benefiċjarji u fil-metodi ta' kalkolu tas-sussidju.

(186) Il-Kummissjoni tosserva dwar dan li, kieku l-passiġġieri fi transitu u fi trasferiment kienu ġew inklużi fl-għadd tal-passiġġieri taħt l-Artikolu 2(1) tad-Digriet Irjali tas-7 ta' Jannar 2014, kien ikun hemm, fil-prinċipju, żewġ kumpaniji tal-ajru oħrajn eliġibbli għall-iskema, jiġifieri Lufthansa u Jet Airways.

(187) Fid-dawl ta' dak kollu li ntqal, jidher li l-limitazzjoni tan-numru ta' benefiċjarji għall-kumpaniji tal-ajru biss li ttrasportaw aktar minn 400000 passiġġier bi tluq mill-Ajruport Nazzjonali ta' Brussell fl-2012, minbarra l-passiġġieri fi transitu u fi trasferiment, mhijiex oġġettivament iġġustifikata min-natura u l-ekonomija tas-sistema li taħtha taqa' l-miżura.

(188) Skont il-Belġju, is-sena 2012 intgħażlet bħala sena ta' referenza għall-fatt li din hija l-aħħar sena li għaliha kien hemm ċifri disponibbli meta l-Kunsill tal-Ministri ddeċieda li jadotta l-miżura. Skont il-Belġju, il-fatt li ġew ikkunsidrati ċ-ċifri tal-2012 jiżgura ċerta ċertezza tad-dritt għall-impriżi benefiċjarji.

(189) Madankollu l-Kummissjoni tqis li dan l-argument mhux validu. L-Artikolu 2(2) tad-Digriet Irjali tas-7 ta' Jannar 2014 jipprevedi li s-sussidji li jirċievu l-kumpaniji tal-ajru jiġu kkalkulati skont sena partikolari (2013, 2014 jew 2015) billi jiġi kkunsidrat in-numru ta' passiġġieri li telqu mill-ajruport (inklużi l-passiġġieri fi transitu u fi trasferiment) matul dik is-sena. Għaldaqstant ma hemm l-ebda raġuni oġġettiva biex jiġu esklużi a priori ċerti kumpaniji tal-ajru mil-lista tal-benefiċjarji abbażi tad-data tas-sena 2012. Fir-realtà, il-kriterju tal-Artikolu 2(1) tal-imsemmi Digriet Irjali ma joffri ebda ċertezza oħra lill-kumpaniji tal-ajru li ma jissodisfawhx għajr li huma esklużi mill-iskema. Għaldaqstant l-argument tal-Belġju dwar iċ-ċertezza tad-dritt huwa ineffettiv.

(190) Skont Brussels Airlines, li fuq dan il-punt taqbel mal-Belġju, l-użu tas-sena ta' referenza 2012 huwa dovut għall-fatt li din hija l-aħħar sena li għaliha kien hemm ċifri disponibbli meta l-Kunsill tal-Ministri ddeċieda li jadotta l-miżura. Brussels Airlines tqis li ovvjament, l-għażla ta' punt ta' referenza tibqa' dejjem arbitrarja sa ċertu punt, iżda bl-għażla tas-sena 2012 bħala referenza, il-Belġju ma qabiżx il-marġni ta' evalwazzjoni diskrezzjonali tiegħu. Madankollu, dawn l-argumenti huma bbażati b'mod impliċitu fuq is-suppożizzjoni li kien jeħtieġ a priori li n-numru ta' benefiċjarji jiġi ristrett minn fost l-utenti kollha tal-Ajruport Nazzjonali ta' Brussell, skont id-data ta' ċerta sena ta' referenza li għaddiet. Għar-raġunijiet imsemmija qabel, il-Kummissjoni tqis li din is-suppożizzjoni mhijiex eżatta, u dan jagħmel l-argument ta' Brussels Airlines ineffettiv.

(191) Skont il-Belġju, il-miżura tippermetti li tittieħed deċiżjoni ġdida għall-perjodu baġitarju 2016, 2017 u 2018, dwar l-għażla tal-kumpaniji tal-ajru benefiċjarji abbażi tan-numru ta' passiġġieri ttrasportati fl-2015, li, jekk ikun meħtieġ, tiftaħ il-benefiċċju tal-miżura għal kumpaniji tal-ajru oħrajn jew teskludi benefiċjarju attwali wieħed jew aktar. Għaldaqstant il-Belġju jqis li l-mekkaniżmu huwa inċentiv peress li jista' jġib ridistribuzzjoni tal-lista tal-benefiċjarji kull tliet snin. Il-Kummissjoni tinnota f'dan ir-rigward li l-miżura hija stabbilita biss għas-snin 2013, 2014 u 2015. Għalhekk l-estensjoni tagħha fiż-żmien hija biss ipotetika.

(192) Fid-dawl ta' dak li ntqal, ir-restrizzjoni tan-numru ta' benefiċjarji skont data tat-traffiku għas-sena 2012 mhijiex iġġustifikata min-natura u l-ekonomija tas-sistema li taħtha taqa' l-miżura msemmija.

(193) Il-miżura tagħti vantaġġ lil tliet utenti speċifiċi tal-Ajruport Nazzjonali ta' Brussell fuq oħrajn, u dan il-vantaġġ mhuwiex iġġustifikat min-natura u l-ekonomija tas-sistema li taħtha taqa' l-miżura msemmija. Din il-konklużjoni tikkonferma n-natura selettiva tal-miżura.

(194) Barra minn hekk, jirriżulta minn dak kollu li ntqal li l-utenti l-oħrajn tal-Ajruport Nazzjonali ta' Brussell huma esklużi mill-iskema u għalhekk ma jirċievu ebda sussidju, u din l-esklużjoni mhijiex iġġustifikata min-natura u l-ekonomija tas-sistema li taħtha taqa' l-miżura msemmija. Għaldaqstant, is-sussidju kollu li rċevew il-benefiċjarji tal-iskema jikkostitwixxi vantaġġ ekonomiku selettiv.

Effett fuq il-kummerċ bejn l-Istati Membri u fuq il-kompetizzjoni

(195) L-għajnuna pubblika għall-impriżi tikkostitwixxi biss għajnuna mill-Istat skont l-Artikolu 107(1) TFUE jekk twassal għal distorsjoni jew theddida ta' distorsjoni għall-kompetizzjoni billi tiffavorixxi ċerti impriżi jew ċerti produtturi u sa fejn tolqot il-kummerċ bejn l-Istati Membri.

(196) Meta l-għajnuna mogħtija minn Stat Membru ssaħħaħ il-pożizzjoni ta' impriża speċifika mqabbla ma' impriżi oħra li jikkompetu fil-kummerċ intern tal-Unjoni, dan tal-aħħar għandu jitqies li jiġi affettwat minn dik l-għajnuna. Skont il-ġurisprudenza, biex għajnuna titqies li toħloq jew thedded li toħloq distorsjoni fil-kompetizzjoni, huwa biżżejjed li l-benefiċjarju tal-għajnuna jkun f'kompetizzjoni diretta ma' kumpaniji oħrajn fi swieq miftuħa għall-kompetizzjoni.

(197) Rigward l-effett fuq il-kummerċ, hemm lok mhux li jiġi stabbilit effett reali tal-għajnuna fuq il-kummerċ bejn l-Istati Membri […], iżda biss li jiġi eżaminat jekk din l-għajnuna tistax taffettwa lil dan il-kummerċ. B'mod partikolari, il-Qrati tal-Unjoni stabbilew li meta għajnuna mogħtija minn Stat Membru ssaħħaħ il-pożizzjoni ta' impriża meta mqabbla mal-pożizzjoni ta' impriżi kompetituri oħra fil-kummerċ intra-Komunitarju, dawn tal-aħħar għandhom jitqiesu li huma affettwati mill-għajnuna.

(198) Il-miżura inkwistjoni tippermetti lill-kumpaniji tal-ajru benefiċjarji li jħaddmu politika ta' tariffi aktar aggressiva, kif ukoll iżommu jew iżidu artifiċjalment l-offerta tas-servizzi pprovduti meta mqabbla mal-kundizzjonijiet normali tas-suq, u għalhekk, li joħolqu distorsjoni fil-kompetizzjoni mal-kumpaniji l-oħrajn li ma jibbenefikawx mill-miżura. Għaldaqstant il-miżura tista' ssaħħaħ il-pożizzjoni tal-impriżi benefiċjarji meta mqabbla ma' kumpaniji tal-ajru oħrajn attivi fis-suq tat-trasport tal-passiġġieri bl-ajru fl-Unjoni. Dan is-suq issa ġie kompletament liberalizzat u miftuħ għall-kumpaniji tal-ajru kollha tal-Unjoni taħt l-effett tal-leġiżlazzjoni tal-Unjoni.

(199) Minn dan jirriżulta li bid-distorsjoni tal-kompetizzjoni bejn il-kumpaniji tal-ajru li joperaw fis-suq intern, din il-miżura tista' wkoll tfixkel il-kummerċ bejn l-Istati Membri.

Konklużjoni dwar il-preżenza ta' għajnuna lill-kumpaniji tal-ajru

(200) Il-miżura eżaminata tikkostitwixxi għajnuna mill-Istat fis-sens tal-Artikolu 107(1) TFUE, lill-kumpaniji tal-ajru li jissodisfaw il-kundizzjonijiet definiti fl-Artikolu 2(1) tad-Digriet Irjali tas-7 ta' Jannar 2014.

Il-legalità tal-għajnuna

(201) Skont l-Artikolu 108(3) tat-Trattat, Il-Kummissjoni għandha tiġi informata, fil-ħin sabiex tippreżenta l-osservazzjonijiet tagħha, dwar kull proġett sabiex tiġi mogħtija jew sabiex tiġi modifikata għajnuna. (…) L-Istat Membru interessat ma jistax idaħħal fis-seħħ il-proġetti proposti tiegħu qabel ma dik il-proċedura jkollha deċiżjoni finali.

(202) F'dan il-każ, il-miżura inkwistjoni diġà ġiet implimentata, peress li d-Digriet Irjali tas-7 ta' Jannar 2014 daħal fis-seħħ mingħajr ma l-Kummissjoni ġiet innotifikata dwar il-miżura. Is-sospensjoni sussegwenti tal-imsemmi Digriet Irjali ma għandhiex effett fuq l-illegalità tal-għajnuna.

(203) Il-Kummissjoni ma identifikat ebda bażi ġuridika li teżenta lill-Belġju mill-obbligu li jinnotifika din l-għajnuna. Fil-fatt, is-sussidju mogħti la huwa kopert mir-Regolament (KE) Nru 800/2008, u lanqas mir-Regolament tal-Kummissjoni (UE) Nru 651/2014 li l-Artikolu 58(1) tiegħu jipprovdi li Dan ir-Regolament japplika għal għajnuna individwali mogħtija qabel id-dħul fis-seħħ tad-dispożizzjonijiet rispettivi ta' dan ir-Regolament, fejn l-għajnuna tissodisfa l-kundizzjonijiet kollha stabbiliti f'dan ir-Regolament, bl-eċċezzjoni tal-Artikolu 9. Barra minn hekk, hija eskluża mill-kamp ta' applikazzjoni tad-Deċiżjoni tal-Kummissjoni 2012/21/UE, anki sempliċiment minħabba li l-livell tat-traffiku fl-Ajruport Nazzjonali ta' Brussell jaqbeż il-limitu ta' 200000 passiġġier fis-sena stabbilit mill-Artikolu 2(1)(e) ta' dik id-Deċiżjoni.

(204) Għaldaqstant il-miżura inkwistjoni tikkostitwixxi għajnuna illegali.

Il-kompatibbiltà tal-għajnuna

(205) Minħabba li s-sussidju msemmi huwa għajnuna mill-Istat fis-sens tal-Artikolu 107(1) TFUE, jenħtieġ li jiġi eżaminat jekk hijiex kompatibbli mas-suq intern. Peress li l-Belġju qies li l-miżura ma kinitx tikkostitwixxi għajnuna mill-Istat, ma rreferiex għal bażi ġuridika jew għal xi raġunament li fuq il-bażi tiegħu l-miżura tista' tiġi ddikjarata kompatibbli mas-suq intern f'każ li kellha tiġi kkwalifikata bħala għajnuna mill-Istat.

(206) Min-naħa tagħha Brussels Airlines sostniet li kieku l-Kummissjoni kellha madankollu tikkonkludi dwar l-eżistenza ta' għajnuna mill-Istat, din l-għajnuna kellha tkun iddikjarata kompatibbli tal-anqas sal-4 ta' April 2014, id-data tad-dħul fis-seħħ tal-Linji Gwida dwar l-Avjazzjoni. Brussels Airlines tirreferi dwar dan il-punt għad-Deċiżjoni Charleroi, fejn il-Kummissjoni kkunsidrat li diversi miżuri ta' għajnuna mogħtija mir-Reġjun ta' Walloon kienu kompatibbli mas-suq intern sal-4 ta' April 2014.

(207) Madankollu, il-miżuri eżaminati fid-Deċiżjoni Charleroi, li għalihom tirreferi Brussels Airlines, kienu miżuri ta' għajnuna lill-operatur tal-ajruport ta' Charleroi, iddikjarati parzjalment kompatibbli mas-suq intern abbażi tat-Taqsima 5.1.2 tal-Linji Gwida dwar l-Avjazzjoni, li tirrigwarda l-għajnuna operattiva lill-ajruporti. Minħabba li l-miżura eżaminata hija għajnuna lill-kumpaniji tal-ajru, u mhux lill-operaturi tal-ajruporti, l-argument ta' Brussels Airlines huwa irrilevanti.

(208) Minkejja n-nuqqas ta' argumenti invokati mill-Belġju sabiex jiġġustifika l-kompatibbiltà tal-għajnuna mas-suq intern, il-Kummissjoni eżaminat il-kompatibbiltà eventwali tal-għajnuna fid-dawl tal-Artikolu 107(3)(c) TFUE li skontu għajnuna maħsuba sabiex tiffaċilita l-iżvilupp ta' ċerti attivitajiet jew ta' ċerti reġjuni ekonomiċi, basta dik l-għajnuna ma tfixkilx il-kondizzjonijiet tal-kummerċ sa grad li jkun kuntrarju għall-interess komuni tista' titqies kompatibbli mas-suq intern.

(209) Fil-fatt, jidher li għajnuna ma tistax tkun iddikjarata kompatibbli fuq il-bażi ta' ebda bażi ġuridika oħra. B'mod partikolari, il-miżura ma tistax titqies bħala kumpens lill-kumpaniji tal-ajru għall-provvista ta' xi servizzi ta' interess ekonomiku ġenerali. Għaldaqstant, il-miżura ma tistax tkun iddikjarata kompatibbli mas-suq intern fuq il-bażi tal-Artikolu 106(2) TFUE.

(210) Il-Linji Gwida dwar l-Avjazzjoni jipprovdu qafas ġenerali ta' evalwazzjoni tal-kompatibbiltà tal-għajnuna mogħtija lill-kumpaniji tal-ajru fir-rigward tal-Artikolu 107(3)(c) TFUE.

(211) Ħlief għall-għajnuna ta' natura soċjali, li tibbenefika lill-konsumatur finali għal konnessjoni speċifika, u li ovvjament il-miżura inkwistjoni ma tagħmilx parti minnha, l-għajnuna għall-bidu tan-negozju hija l-unika għajnuna lill-kumpaniji tal-ajru li tista' tkun awtorizzata abbażi tal-Linji Gwida dwar l-Avjazzjoni.

(212) Skont il-punt 174 tal-Linji Gwida dwar l-Avjazzjoni fil-każ ta' għajnuna illegali għall-bidu tan-negozju lill-kumpaniji tal-ajru il-Kummissjoni se tapplika r-regoli fis-seħħ dakinhar li tkun ingħatat l-għajnuna. Id-Digriet Irjali ġie adottat fis-7 ta' Jannar 2014, jiġifieri qabel l-4 ta' April 2014. F'din id-data, l-għajnuna għall-bidu tan-negozju lill-kumpaniji tal-ajru kienet irregolata mil-Linji Gwida Komunitarji dwar il-finanzjament tal-ajruporti u l-għajnuna mill-Istat għall-bidu tan-negozju lill-kumpaniji tal-ajru li jitilqu mill-ajruporti reġjonali (minn hawn 'il quddiem il-Linji Gwida tal-2005).

(213) Skont il-punt 79(c) tal-Linji Gwida tal-2005, l-għajnuna għall-bidu tan-negozju għandha tapplika biss għall-ftuħ ta' rotot jew frekwenzi ġodda li jwassal għal żieda fil-volum nett tal-passiġġieri. Il-miżura inkwistjoni ma tissodisfax din il-kundizzjoni peress li l-passiġġieri li jagħtu d-dritt għar-rimborż previst fl-Artikolu 2(1) tad-Digriet Irjali tas-7 ta' Jannar 2014 mhumiex neċessarjament passiġġieri li qed jaqbdu rotot ġodda jew rotot ta' frekwenzi ġodda li jwasslu għal żieda fin-numru ta' passiġġieri.

(214) Barra minn hekk, għalkemm il-punt 15 tal-Linji Gwida tal-2005 jiddistingwi fost erba' kategoriji ta' ajruporti, A, B, C u D, il-punt 79(b) tal-imsemmija linji gwida jeħtieġ li l-għajnuna għall-bidu tan-negozju titħallas għal rotot bejn ajruport reġjonali tal-kategoriji C u D u ajruport ieħor tal-Unjoni, peress li l-għajnuna għar-rotot bejn ajruporti nazzjonali (il-kategorija B) tista' titqies biss f'każ eċċezzjonali. Il-punt 79(b) ma jipprevedix li l-għajnuna għall-bidu tan-negozju tista' tingħata għal rotot bejn ajruport ta' kategorija A u ajruport ta' kategorija A jew B jew ajruport li jinsab barra mill-Unjoni. Madankollu, l-Ajruport Nazzjonali ta' Brussell jilqa' aktar minn għaxar miljun passiġġier fis-sena u għalhekk jappartjeni għall-kategorija A. Peress li ma hemm ebda kundizzjoni marbuta mal-miżura rigward l-ajruport ta' destinazzjoni tar-rotot li jieħdu l-passiġġieri u li jagħtu d-dritt għar-rimborż tal-imposta tas-sigurtà skont l-Artikolu 2(1) tad-Digriet Irjali tas-7 ta' Jannar 2014, il-kundizzjoni msemmija fil-punt 79(b) tal-linji gwida msemmija mhijiex issodisfata.

(215) Għaldaqstant l-għajnuna ma tissodisfax il-kriterji ta' kompatibbiltà li jipprevedu l-Linji Gwida tal-2005 għall-għajnuna għall-bidu tan-negozju.

(216) Fid-dawl ta' dak li ntqal, l-għajnuna hija inkompatibbli mas-suq intern.

IRKUPRU

(217) Skont id-dispożizzjonijiet tat-Trattat u l-ġurisprudenza stabbilita tal-Qorti, il-Kummissjoni hija kompetenti biex tiddeċiedi jekk l-Istat Membru kkonċernat għandux jabolixxi jew jibdel l-għajnuna meta tkun sabet li din tkun inkompatibbli mas-suq intern. Bl-istess mod, il-Qorti tal-Ġustizzja sostniet ukoll b'mod konsistenti li l-obbligu ta' Stat Membru li jabolixxi għajnuna kkunsidrata mill-Kummissjoni bħala mhux kompatibbli mas-suq intern, huwa maħsub sabiex terġa' tiġi stabbilita s-sitwazzjoni li kienet teżisti qabel.

(218) F'dan il-kuntest, il-Qorti tal-Ġustizzja stabbiliet li dan l-għan jintlaħaq meta l-benefiċjarju jkun ħallas lura l-ammonti mogħtija taħt l-għajnuna illegali. B'din ir-rifużjoni, il-benefiċjarju jitlef il-vantaġġ li kien igawdi fuq il-kompetituri tiegħu fis-suq, u tiġi stabbilita mill-ġdid is-sitwazzjoni li kien hemm qabel il-ħlas tal-għajnuna.

(219) F'konformità ma' dik il-ġurisprudenza, l-Artikolu 16(1) tar-Regolament (UE) 2015/1589 jipprevedi li Fejn jittieħdu deċiżjonijiet negattivi f'każijiet ta' għajnuna kontra l-liġi, il-Kummissjoni għandha tiddeċiedi li l-Istat Membru kkonċernat għandu jieħu l-miżuri kollha meħtieġa biex jirkupra l-għajnuna mill-benefiċjarju (…).

(220) Għaldaqstant, peress li l-miżuri inkwistjoni ġew implimentati bi ksur tal-Artikolu 108(3) TFUE u huma inkompatibbli mas-suq intern, huma għandhom jiġu rkuprati sabiex tiġi stabbilita mill-ġdid is-sitwazzjoni li kienet teżisti fis-suq qabel l-għoti tagħha. L-irkupru għandu jkopri l-perjodu minn meta ngħata l-vantaġġ lill-benefiċjarji, jiġifieri minn meta l-għajnuna saret disponibbli għall-benefiċjarji, sal-irkupru effettiv tagħha. L-ammonti li għandhom jiġu rkuprati għandhom għalhekk jinkludu l-imgħaxijiet sal-irkupru effettiv tagħhom.

(221) Permezz tal-ittra tal-20 ta' Marzu 2017, il-Belġju informa lill-Kummissjoni li kien ħassar id-Digriet Irjali tas-7 ta' Jannar 2014 permezz tad-Digriet Irjali tal-15 ta' Marzu 2017. Għaldaqstant, il-Belġju abolixxa l-miżura tal-għajnuna, li mhux se jkollha effett fil-futur.

(222) Barra minn hekk, permezz tal-ittra tas-16 ta' Mejju 2017, il-Belġju pprovda l-elementi kollha meħtieġa li juru li, skont id-Digriet Irjali tal-15 ta' Marzu 2017, il-kumpaniji tal-ajru Brussels Airlines, TUI Airlines Belgium u Thomas Cook Airlines Belgium, kienu rrimborżaw l-ammonti tal-għajnuna li rċevew u l-imgħaxijiet ikkalkulati mit-22 ta' Settembru 2014, fuq bażi komposta skont il-Kapitolu V tar-Regolament (KE) Nru 794/2004 u r-Regolament tal-Kummissjoni (KE) Nru 271/2008 li jemenda r-Regolament (KE) Nru 794/2004, jiġifieri, rispettivament, EUR 16779819 f'għajnuna u EUR 543546,30 f'imgħax, EUR 2143621 f'għajnuna u EUR 69438,01 f'imgħax, u EUR 76560 f'għajnuna u EUR 2480 f'imgħax.

(223) Fid-dawl ta' dawn l-elementi, u b'kont meħud tar-rimborż tal-ammonti ta' għajnuna riċevuti u tal-imgħaxijiet korrispondenti, il-Kummissjoni tqis li l-benefiċjarji tilfu l-vantaġġ li kienu ngħataw fis-suq meta mqabbla mal-kompetituri tagħhom u li s-sitwazzjoni kompetittiva ta' qabel il-ħlas tal-għajnuna ġiet stabbilita mill-ġdid.

(224) Fid-dawl ta' dak li ntqal, ma hemmx lok li l-Belġju jiġi ordnat jabolixxi l-miżura u jirkupra l-għajnuna inkompatibbli mingħand il-benefiċjarji peress li diġà ħa dawn l-azzjonijiet minn rajh.

KONKLUŻJONI

(225) Il-Kummissjoni tinnota li l-Belġju implimenta għajnuna illegali favur kumpaniji tal-ajru li ssodisfaw il-kundizzjonijiet definiti fl-Artikolu 2(1) tad-Digriet Irjali tas-7 ta' Jannar 2014, bi ksur tal-Artikolu 108(3) TFUE. Minħabba li ma tista' tiġi identifikata ebda raġuni ta' kompatibbiltà għas-sistema inkwistjoni, din tirriżulta bħala inkompatibbli mas-suq intern.

(226) Madankollu, peress li l-Belġju rtira d-Digriet Irjali tas-7 ta' Jannar 2014 u rkupra l-għajnuna u l-imgħaxijiet korrispondenti, ġiet stabbilita mill-ġdid is-sitwazzjoni li kienet teżisti qabel ingħatat l-għajnuna illegali u inkompatibbli mill-Istat. Għaldaqstant ma hemmx lok li tiġi ordnata l-abolizzjoni tal-miżura u l-irkupru tal-għajnuna inkwistjoni.

ADOTTAT DIN ID-DEĊIŻJONI:

Artikolu 1

1. Is-sussidju mogħti mid-Digriet Irjali tas-7 ta' Jannar 2014 lil ċerti kumpaniji tal-ajru jikkostitwixxi għajnuna mill-Istat fis-sens tal-Artikolu 107(1) tat-Trattat dwar il-Funzjonament tal-Unjoni Ewropea.

2. L-għajnuna msemmija fl-ewwel paragrafu, implimentata illegalment mir-Renju tal-Belġju, bi ksur tal-Artikolu 108(3) tat-Trattat dwar il-Funzjonament tal-Unjoni Ewropea hija inkompatibbli mas-suq intern.

Artikolu 2 Din id-Deċiżjoni hija indirizzata lir-Renju tal-Belġju.

Magħmul fi Brussell, it-18 ta' Lulju 2017. Għall-Kummissjoni Margrethe Vestager Membru tal-Kummissjoni

Versions

1. 2017-07-18