Address https://gelex.eu/eli/EU/act/2022/141@2022-01-21/mt

Contents

1. Preamble
2. ANNEX
3. (ii)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (KE) Nru 1333/2008 tal-Parlament Ewropew u tal-Kunsill tas-16 ta’ Diċembru 2008 dwar l-addittivi tal-ikel, u b’mod partikolari l-Artikolu 10(3) tiegħu,

Billi:

(1) L-Anness II tar-Regolament (KE) Nru 1333/2008 jistabbilixxi lista tal-Unjoni ta’ addittivi tal-ikel approvati għall-użu fl-ikel u l-kundizzjonijiet tal-użu tagħhom.

(2) Dik il-lista tista’ tiġi aġġornata f’konformità mal-proċedura komuni msemmija fl-Artikolu 3(1) tar-Regolament (KE) Nru 1331/2008 tal-Parlament Ewropew u tal-Kunsill, b’inizjattiva tal-Kummissjoni jew wara li ssir applikazzjoni minn Stat Membru jew minn xi parti interessata.

(3) F’konformità mal-Anness II tar-Regolament (KE) Nru 1333/2008, il-karbonati tas-sodju (E 500) u l-karbonati tal-potassju (E 501) huma awtorizzati għall-użu bħala addittivi tal-ikel f’varjetà wiesgħa ta’ ikel fil-livelli quantum satis. Fost l-oħrajn, huma awtorizzati għall-użu fil-kategorija tal-ikel 9.2. Ħut u prodotti tal-ħut ipproċessati inkluż molluski u krustaċji.

(4) Fid-9 ta’ Settembru 2020, il-Kummissjoni rċeviet applikazzjoni għall-awtorizzazzjoni tal-użu tal-karbonati tas-sodju (E 500) u tal-karbonati tal-potassju (E 501) fiċ-ċefalopodi mhux ipproċessati.

(5) Il-karbonati għandhom effett simili bħall-aċidu fosforiku — fosfati — di-, tri- u polifosfati (E 338-452), li bħalissa huma awtorizzati għall-molluski u l-krustaċji ffriżati u ffriżati f’temperatura baxxa ħafna, fir-rigward tad-dehra taċ-ċefalopodi. Il-proċess tal-manifattura taċ-ċefalopodi jinvolvi trattament ta’ immersjoni f’banjijiet li jkun fihom dissoluzzjoni ta’ melħ, ċitrati u karbonati f’konċentrazzjoni massima ta’ 3% biex tiġi regolata l-aċidità tal-banju għal jumejn jew tlieta. Ir-riżultat huwa l-idratazzjoni, bidla fil-konsistenza u s-sawra tal-prodott, u ż-żamma tal-kulur. Wara l-fwar, iċ-ċefalopodi ttrattati bil-karbonati u ċ-ċitrati jkollhom proprjetajiet organolettiċi aħjar, fosthom laħam aktar artab, togħma aħjar u kulur aktar ċar miċ-ċefalopodi trattati biċ-ċitrati biss Mill-evalwazzjoni sensorjali mwettqa mill-applikant jirriżulta li l-użu propost tal-karbonati tas-sodju (E 500) u l-karbonati tal-potassju (E 501) bħala regolaturi tal-aċidità minflok il-fosfati, itejjeb il-proprjetajiet organolettiċi taċ-ċefalopodi u l-perċezzjoni tal-konsumatur dwaru.

(6) Skont l-Artikolu 3(2) tar-Regolament (KE) Nru 1331/2008, il-Kummissjoni trid titlob l-opinjoni tal-Awtorità Ewropea dwar is-Sigurtà fl-Ikel (l-Awtorità) biex taġġorna l-lista tal-Unjoni tal-addittivi tal-ikel stabbilita fl-Anness II tar-Regolament (KE) Nru 1333/2008, għajr meta l-aġġornament inkwistjoni aktarx ma jkunx iħalli effett fuq is-saħħa tal-bniedem.

(7) Is-sikurezza tal-karbonat tas-sodju (E 500) u tal-karbonat tal-potassju ġiet evalwata fl-1990 mill-Kumitat Xjentifiku għall-Ikel, li stabbilixxa l-konsum Aċċettabbli ta’ kuljum (ADI) bħala mhux speċifikat. It-terminu mhux speċifikat ifisser li, abbażi tad-data tossikoloġika, bijokimika u klinika disponibbli, id-doża aċċettabbli ta’ kuljum tas-sustanza, li tittieħed mill-preżenza naturali tagħha fl-ikel u mill-użu jew l-użi attwali tagħha fl-ikel fil-livelli meħtieġa biex jinkiseb l-effett teknoloġiku mixtieq, mhix periklu għas-saħħa. Fid-dawl ta’ dak, u fid-dawl tan-nuqqas ta’ prijoritajiet speċifiċi għall-evalwazzjoni mill-ġdid tal-karbonati tas-sodju (E 500) u tal-karbonati tal-potassju (E 501) skont il-programm għall-evalwazzjoni mill-ġdid tal-addittivi tal-ikel stabbilit fir-Regolament tal-Kummissjoni (UE) Nru 257/2010, il-Kummissjoni jidhrilha li l-awtorizzazzjoni tal-użu tal-karbonati tas-sodju (E 500) u tal-karbonati tal-potassju (E 501) bħala regolaturi tal-aċidità fuq iċ-ċefalopodi mhux ipproċessati tikkostitwixxi aġġornament ta’ dik il-lista li mhix mistenni jħalli effett fuq is-saħħa tal-bniedem u għalhekk ma hemmx bżonn tintalab l-opinjoni tal-Awtorità.

(8) Għaldaqstant, jixraq li jiġi awtorizzat l-użu tal-karbonati tas-sodju (E 500) u tal-karbonati tal-potassju (E 501) bħala regolaturi tal-aċidità fil-kategoriji tal-ikel 09.1.2 Molluski u krustaċji mhux ipproċessati fl-Anness II tar-Regolament (KE) Nru 1333/2008 fil-livell quantum satis għaċ-ċefalopodi. Għar-raġunijiet tar-restrizzjoni tal-użu tal-fosfati għall-molluski u l-krustaċji ffriżati u ffriżati f’temperatura baxxa ħafna, l-użu tal-karbonati tas-sodju (E 500) u tal-karbonati tal-potassju (E 501) bħala alternattivi għall-fosfati fiċ-ċefalopodi mhux ipproċessati jenħtieġ li jkun ristrett għaċ-ċefalopodi ffriżati u ffriżati f’temperatura baxxa ħafna mhux ittrattati bl-aċidu fosforiku — fosfati — di-, tri- u polifosfati (E 338-452).

(9) Jenħtieġ li l-Anness II tar-Regolament (KE) Nru 1333/2008 jiġi emendat skont dan.

(10) Il-miżuri previsti f’dan ir-Regolament huma konformi mal-opinjoni tal-Kumitat Permanenti dwar il-Pjanti, l-Annimali, l-Ikel u l-Għalf,

ADOTTAT DAN IR-REGOLAMENT:

Artikolu 1 L-Anness II tar-Regolament (KE) Nru 1333/2008 huwa emendat f’konformità mal-Anness ta’ dan ir-Regolament.

Artikolu 2 Dan ir-Regolament għandu jidħol fis-seħħ fl-għoxrin jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussell, il-21 ta’ Jannar 2022. Għall-Kummissjoni Il-President Ursula von der Leyen

ANNEX

ANNESS

Il-Parti E tal-Anness II tar-Regolament (KE) Nru 1333/2008 hija emendata kif ġej:

(i) fil-kategorija tal-ikel 09.1.2 Molluski u krustaċji mhux ipproċessati jiddaħħlu l-entrati li ġejjin wara l-entrata għal E 385, Etilendiamminatetraaċetat tal-kalċju disodiku (EDTA tal-kalċju disodiku): E 500 Karbonati tas-sodju quantum satis (95) ċefalopodi ffriżati u ffriżati f’temperatura baxxa ħafna biss E 501 Karbonati tal-potassju quantum satis (95) ċefalopodi ffriżati u ffriżati f’temperatura baxxa ħafna biss

(ii) wara n-nota (90) ta’ qiegħ il-paġna tiżdied din in-nota (95) ta’ qiegħ il-paġna li ġejja:

(ii)

(95): ma tistax tintuża flimkien mal-Aċidu fosforiku — fosfati — di-, tri-, u polifosfati (E 338-452)

Versions

1. 2022-01-21