Address https://gelex.eu/eli/EU/act/2022/1456@2022-06-10/mt

Contents

1. Preamble
2. Artikolu 1 Awtorizzazzjoni biex tingħata deroga u l-kundizzjonijiet għall-kaxxi tal-munizzjon
3. Artikolu 2 Obbligu ta’ notifika
4. 2.
5. Artikolu 3 Kontrolli mill-awtoritajiet kompetenti
6. 1.
7. Artikolu 4 Ħżin u ċaqliq tal-kaxxi
8. Artikolu 5 Notifika ta’ nuqqas ta’ konformità
9. Artikolu 6 Rappurtar dwar l-importazzjonijiet
10. Artikolu 7 Data ta’ skadenza
11. Artikolu 8 Dħul fis-seħħ
12. ANNEX
13. (4)

IL-KUMMISSJONI EWROPEA,

Wara li kkunsidrat it-Trattat dwar il-Funzjonament tal-Unjoni Ewropea,

Wara li kkunsidrat ir-Regolament (UE) 2016/2031 tal-Parlament Ewropew u tal-Kunsill tas-26 ta’ Ottubru 2016 dwar il-miżuri protettivi kontra pesti tal-pjanti, li jemenda r-Regolamenti (UE) Nru 228/2013, (UE) Nru 652/2014 u (UE) Nru 1143/2014 tal-Parlament Ewropew u tal-Kunsill u li jħassar id-Direttivi tal-Kunsill 69/464/KEE, 74/647/KEE, 93/85/KEE, 98/57/KE, 2000/29/KE, 2006/91/KE u 2007/33/KE, u b’mod partikolari l-Artikolu 43(2),

Billi:

(1) Id-Deċiżjoni ta’ Implimentazzjoni tal-Kummissjoni (UE) 2015/179 awtorizzat lill-Istati Membri sabiex jipprovdu għal deroga temporanja minn ċerti dispożizzjonijiet tad-Direttiva tal-Kunsill 2000/29/KE fir-rigward tal-kundizzjonijiet speċjali li jikkonċernaw l-introduzzjoni fl-Unjoni tal-materjal tal-injam għall-imballaġġ tal-koniferi (Pinopsida) fil-forma ta’ kaxxi tal-munizzjon li joriġinaw mill-Istati Uniti tal-Amerka, taħt il-kontroll tad-Dipartiment tad-Difiża tal-Istati Uniti tal-Amerka. Peress li l-validità tad-Deċiżjoni skadiet fil-31 ta’ Diċembru 2020, jenħtieġ li jiġu adottati regoli ġodda sabiex jippermettu l-introduzzjoni ta’ tali kaxxi tal-munizzjon taħt ċerti kundizzjonijiet anke fil-futur.

(2) L-Artikolu 43(1) tar-Regolament (UE) 2016/2031 jipprevedi rekwiżiti speċifiċi għall-introduzzjoni fl-Unjoni tal-materjal tal-injam għall-imballaġġ, li jenħtieġ li jkun konformi mal-Istandard Internazzjonali tal-Miżuri Fitosanitarji Nru 15 (ISPM 15): ir-Regolazzjoni tal-Materjal tal-Injam għall-Imballaġġ fil-Kummerċ Internazzjonali, li jiggarantixxi li l-materjal tal-injam għall-imballaġġ ikun ġie soġġett għal trattament fitosanitarju approvat.

(3) Ċertu materjal tal-injam għall-imballaġġ tal-koniferi (Pinopsida) fil-forma ta’ kaxxi użati fit-trasport tal-munizzjon u manifatturati fl-Istati Uniti tal-Amerka qabel l-1 ta’ Settembru 2007, kienu soġġetti għal trattamenti li mhumiex konformi mar-rekwiżiti applikabbli stabbiliti fl-Anness I tal-ISPM 15 u għalhekk, ma jissodisfawx il-kundizzjonijiet stabbiliti fl-Artikolu 43(1) tar-Regolament (UE) 2016/2031.

(4) Fis-7 ta’ Settembru 2018, l-Istati Uniti tal-Amerka talbu estensjoni tad-deroga skont id-Deċiżjoni ta’ Implimentazzjoni (UE) 2015/179 għall-materjal tal-injam għall-imballaġġ magħmul minn injam artab u estensjoni tal-kamp ta’ applikazzjoni tad-deroga għall-materjal tal-injam għall-imballaġġ magħmul minn injam iebes. L-Istati Uniti tal-Amerka akkumpanjaw it-talba msemmija hawn fuq b’dossier li jirrappreżenta segwitu għal analiżi tal-perkorsi preċedenti tad-Dipartiment tad-Difiża tal-Istati Uniti fir-rigward tal-kaxxi tal-munizzjon tal-injam artab, filwaqt li kkomplementawha b’analiżi tal-perkorsi għall-kaxxi tal-munizzjon tal-injam iebes.

(5) Il-Kummissjoni kkonkludiet, abbażi tal-informazzjoni pprovduta mill-Istati Uniti tal-Amerka u wara diskussjoni mal-grupp ta’ esperti rilevanti dwar deroga għall-introduzzjoni fl-Unjoni tal-materjal tal-injam għall-imballaġġ fil-forma ta’ kaxxi tal-munizzjon mill-Istati Uniti tal-Amerka, li l-kaxxi msemmija fil-permessa 3 u użati fit-trasport tal-munizzjon, magħmula kemm minn injam artab kif ukoll minn dak iebes, ma jippreżentaw l-ebda riskju għat-tixrid tal-pesti tal-pjanti, dment li jiġu ssodisfati ċertu kundizzjonijiet. Dawn il-kundizzjonijiet jikkonċernaw id-data tal-produzzjoni tal-kaxxi tal-munizzjon, fl-assenza, jew fil-preżenza limitata, tal-qoxra tas-siġar, it-trattament u t-tiswija ta’ tali kaxxi, kif ukoll il-ħżin u t-trasport tagħhom.

(6) Jenħtieġ li din id-deroga tapplika biss għall-materjal tal-injam għall-imballaġġ fil-forma ta’ kaxxi tal-munizzjon li joriġinaw mill-Istati Uniti tal-Amerka, li ġie manifatturat qabel l-1 ta’ Settembru 2007, peress li l-kaxxi mmanifatturati wara dik id-data li għaddew minn trattament f’konformità mal-ISPM 15.

(7) Għalhekk, jenħtieġ li tali materjal tal-injam għall-imballaġġ fil-forma ta’ kaxxi tal-munizzjon li joriġinaw mill-Istati Uniti tal-Amerka, magħmula kemm minn injam artab kif ukoll minn dak iebes, ikun jista’ jiġi introdott fit-territorju tal-Unjoni, kif ukoll jinħażen u jiġi ttrasportat fih, dment li jissodisfa l-kundizzjonijiet stabbiliti f’dan ir-Regolament.

(8) Sabiex żgur ikun hemm kontrolli effettivi u żgur ikun hemm stampa sħiħa tar-riskji fitosanitarji potenzjali, jenħtieġ li kwalunkwe operatur li jittrasporta jew li jaħżen il-materjal tal-injam għall-imballaġġ fil-forma ta’ kaxxi tal-munizzjon li joriġinaw mill-Istati Uniti tal-Amerka, wara l-verifiki rilevanti rispettivi, jinnotifika lill-awtorità kompetenti rispettiva dwar it-trasport jew il-ħżin tal-kaxxi kkonċernati.

(9) Sabiex jiġi żgurat rispons rapidu għal kwalunkwe riskju fitosanitarju potenzjali li jirriżulta mill-materjal tal-injam għall-imballaġġ fil-forma ta’ kaxxi tal-munizzjon li joriġinaw mill-Istati Uniti tal-Amerka, jenħtieġ li l-Istati Membri jinfurmaw minnufih lil xulxin u lill-Kummissjoni meta jsiru jafu b’kunsinna li ma tikkonformax mar-rekwiżiti li jikkonċernaw il-kundizzjonijiet għall-introduzzjoni fl-Unjoni stabbiliti f’dan ir-Regolament. Barra minn hekk, jenħtieġ li, fuq bażi annwali, dawn jipprovdu lill-Kummissjoni u lill-Istati Membri l-oħra bl-informazzjoni dwar l-importazzjonijiet li jkunu saru, sabiex tiġi vvalutata l-applikazzjoni ta’ dan ir-Regolament.

(10) Jenħtieġ li l-kundizzjonijiet għad-deroga introdotti b’dan ir-Regolament japplikaw sal-31 ta’ Lulju 2025, biex ikun jista’ jsir ir-rieżami tal-implimentazzjoni tal-miżuri tiegħu, u biex jiġi eżaminat jekk dawn jindirizzawx b’mod effettiv ir-riskju fitosanitarju tal-importazzjoni ta’ dak il-materjal tal-injam għall-imballaġġ.

(11) Peress li d-Deċiżjoni ta’ Implimentazzjoni (UE) 2015/179 diġà skadiet fil-31 ta’ Diċembru 2020, jenħtieġ li dan ir-Regolament ta’ Implimentazzjoni jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea, sabiex tiġi żgurata l-aktar introduzzjoni rapida possibbli ta’ dan il-materjal tal-injam għall-imballaġġ fl-Unjoni.

ADOTTAT DAN IR-REGOLAMENT:

Artikolu 1 Awtorizzazzjoni biex tingħata deroga u l-kundizzjonijiet għall-kaxxi tal-munizzjon

Il-materjal tal-injam għall-imballaġġ fil-forma ta’ kaxxi, li attwalment jintuża fit-trasport tal-munizzjon, manifatturat qabel l-1 ta’ Settembru 2007, u li joriġina mill-Istati Uniti tal-Amerka taħt il-kontroll tad-Dipartiment tad-Difiża tal-Istati Uniti (il-kaxxi), huwa eżentat mir-rekwiżiti tal-Artikolu 43(1) tar-Regolament (UE) 2016/2031, meta:

(a) il-kaxxi jissodisfaw il-kundizzjonijiet stabbiliti fl-Anness ta’ dan ir-Regolament; u

(b) r-rekwiżiti f’konformità mal-Artikoli 2, 3 u 4 huma ssodisfati.

Artikolu 2 Obbligu ta’ notifika

1. L-importatur għandu jinnotifika lill-awtoritajiet kompetenti tal-Istat Membru tal-punt tad-dħul dwar l-intenzjoni tiegħu li jintroduċi l-kunsinna mill-inqas ħamest ijiem ta’ xogħol qabel tiġi introdotta l-kunsinna bħalma ppjanat, kif imsemmi fl-Artikolu 1. Fl-istess perjodu, l-importatur għandu jipprovdi wkoll l-istess notifika lill-awtoritajiet kompetenti tal-Istat Membru bl-ewwel post tal-ħżin, meta dak il-post ikun differenti mill-punt tad-dħul.

2. In-notifika msemmija fil-paragrafu 1 għandha tinkludi l-elementi li ġejjin:

2.

(a) id-data prevista tal-introduzzjoni;

(b) l-inventarju tal-kunsinna kkonċernata li jidentifika l-kaxxi li jagħmlu parti minnha;

(c) l-isem u l-indirizz tal-importatur;

(d) l-indirizz tal-punt tad-dħul tal-introduzzjoni prevista;

(e) l-indirizz tal-ewwel post tal-ħżin, meta dan ikun differenti mill-punt tad-dħul.

Artikolu 3 Kontrolli mill-awtoritajiet kompetenti

1. L-awtoritajiet kompetenti tal-Istat Membru tal-punt tad-dħul għandhom jivverifikaw id-disponibbiltà u l-kompletezza tad-dokument deskritt fil-punt 7 tal-Anness. Huma għandhom jivverifikaw ukoll il-konformità ta’ kampjun rappreżentattiv minn kull kunsinna mal-punti li ġejjin tal-Anness:

1.

(a) il-punti (1) u (2) dwar il-wiri tal-marki rispettivi;

(b) il-punt (3) dwar il-kaxxi msewwija;

(c) il-punt (4) dwar l-assenza tal-qoxra tas-siġar;

(d) il-punt (5) dwar il-livell tal-kontenut tal-umdità;

2. B’deroga mill-paragrafu 1, fejn l-ewwel post tal-ħżin ikun differenti mill-punt tad-dħul, l-awtoritajiet kompetenti tal-Istat Membru tal-ewwel post tal-ħżin għandhom iwettqu l-verifika deskritta f’dak il-paragrafu.

Artikolu 4 Ħżin u ċaqliq tal-kaxxi

1. Qabel u wara t-twettiq tal-kontrolli msemmija fl-Artikolu 3, il-kaxxi għandhom jibqgħu maħżuna f’bini magħluq.

2. Kwalunkwe trasport tal-kaxxi jista’ jsir biss f’kontenituri magħluqa, jew b’għata protettiva sħiħa.

Artikolu 5 Notifika ta’ nuqqas ta’ konformità

L-Istati Membri għandhom jinnotifikaw lill-Kummissjoni u lill-Istati Membri l-oħra b’kull kunsinna li ma tikkonformax mal-kundizzjonijiet stabbiliti fl-Anness. Dik in-notifika għandha ssir sa mhux aktar tard minn tlett ijiem tax-xogħol minn dakinhar li l-awtorità kompetenti ssir taf b’kunsinna bħal din.

Artikolu 6 Rappurtar dwar l-importazzjonijiet

Sal-31 ta’ Jannar ta’ kull sena, l-Istat Membru tal-ewwel post tal-ħżin għandu jipprovdi lill-Kummissjoni u lill-Istati Membri l-oħra bl-informazzjoni dwar l-għadd ta’ kunsinni introdotti fit-territorji tagħhom u b’rapport dwar il-kontrolli msemmija fl-Artikolu 3, imwettqa bejn l-1 ta’ Jannar u l-31 ta’ Diċembru tas-sena ta’ qabel.

Artikolu 7 Data ta’ skadenza

Dan ir-Regolament għandu jiskadi fil-31 ta’ Lulju 2025.

Artikolu 8 Dħul fis-seħħ

Dan ir-Regolament għandu jidħol fis-seħħ fit-tielet jum wara dak tal-pubblikazzjoni tiegħu f’Il-Ġurnal Uffiċjali tal-Unjoni Ewropea.

Dan ir-Regolament għandu jorbot fl-intier tiegħu u japplika direttament fl-Istati Membri kollha. Magħmul fi Brussell, l-10 ta’ Ġunju 2022. Għall-Kummissjoni Il-President Ursula von der Leyen

ANNEX

ANNESS Kundizzjonijiet għall-introduzzjoni tal-kaxxi tal-munizzjon, kif imsemmi fl-Artikolu 1

Il-kaxxi msemmija fl-Artikolu 1 għandhom jissodisfaw il-kundizzjonijiet li ġejjin:

(1) juru marka li tikkonferma li ġew manifatturati sal-31 ta’ Awwissu 2007;

(2) juru marka li tindika li ġew trattati bi preżervattiv tal-injam approvat mill-Aġenzija għall-Ħarsien tal-Ambjent tal-Istati Uniti tal-Amerka.

(3) f’każ li dawn il-kaxxi jkunu ssewwew minn meta ġew manifatturati, l-injam użat għal dak il-għan jissodisfa l-kundizzjonijiet stabbiliti fl-Artikolu 43(1) tar-Regolament (UE) 2016/2031;

(4) il-kaxxi jkunu magħmula mill-injam. Dak l-injam irid jew tkun tneħħietlu kompletament il-qoxra tas-siġra jew ikun fih biss biċċiet żgħar tal-qoxra li jidhru separati u distinti minn xulxin. Dawk il-biċċiet tal-qoxra tas-siġra jridu jikkonformaw ma’ wieħed mir-rekwiżiti li ġejjin:

(4)

(a) ikunu anqas minn 3 cm fil-wisa’ (irrispettivament mit-tul);

(b) meta jkunu akbar minn 3 cm fil-wisa’, l-erja tas-superfiċe totali ta’ kull biċċa qoxra tas-siġra tkun anqas minn 50 cm2;

(5) il-livell tal-kontenut tal-umdità tagħhom ma jkunx aktar minn 20 %;

(6) kienu nħażnu f’bini magħluq u trasportati f’kontenituri magħluqa, jew b’għata protettiva sħiħa;

(7) ikunu akkumpanjati minn dokument maħruġ mid-Dipartiment tad-Difiża tal-Istati Uniti tal-Amerika li jikkonferma l-konformità tal-kundizzjonijiet stipulati fil-punti (4), (5) u (6).

Versions

1. 2022-06-10