Address https://gelex.eu/eli/EU/act/oj/L/2021/2256@2021-11-02/mt

Contents

1. Preamble
2. KAPITOLU I Dispożizzjonijiet ġenerali
3. Artikolu 1 Kamp ta’ applikazzjoni
4. Artikolu 2 Definizzjonijiet
5. (7) a)
6. Artikolu 3 Dispożizzjonijiet nazzjonali konfliġġenti u l-applikabbiltà ta’ oqfsa etiċi differenti
7. KAPITOLU II Standards ta’ kondotta etika
8. PARTI 1 PRINĊIPJI ĠENERALI
9. Artikolu 4 Prinċipji ġenerali
10. Artikolu 5 Interazzjonijiet ma’ partijiet esterni
11. PARTI 2 PREVENZJONI U ĠESTJONI TA’ KUNFLITTI TA’ INTERESS
12. Artikolu 6 Kunflitti ta’ interess
13. Artikolu 7 Projbizzjoni li wieħed jirċievi vantaġġi
14. PARTI 3 SEGRETEZZA PROFESSJONALI U PREVENZJONI TA’ UŻU ĦAŻIN TA’ INFORMAZZJONI MHUX PUBBLIKA
15. Artikolu 8 Segretezza professjonali u projbizzjoni fuq l-iżvelar ta’ informazzjoni mhux pubblika
16. Artikolu 9 Projbizzjoni ta’ użu ħażin ta’ informazzjoni mhux pubblika
17. Artikolu 10 Prinċipji ġenerali rigward tranżazzjonijiet finanzjarji privati
18. Artikolu 11 Restrizzjonijiet speċifiċi fuq tranżazzjonijiet finanzjarji privati kritiċi
19. 2. a)
20. i)
21. ii)
22. iii)
23. 3. a)
24. KAPITOLU III Kollaborazzjoni u implimentazzjoni tal-Qafas tal-Etika tal-MSU
25. Artikolu 12 Funzjonijiet indipendenti ta’ etika u/jew ta’ konformità
26. Artikolu 13 Monitoraġġ tal-konformità
27. Artikolu 14 Rapportar ta’ nuqqas ta’ konformità u segwitu
28. KAPITOLU IV Dispożizzjonijiet finali
29. Artikolu 15 Rapportar u valutazzjoni mill-ġdid
30. Artikolu 16 Revoka
31. Artikolu 17 Dħul fis-seħħ u implimentazzjoni
32. Artikolu 18 Destinatarji
33. ANNEX

IL-KUNSILL GOVERNATTIV TAL-BANK ĊENTRALI EWROPEW,

Wara li kkunsidra r-Regolament tal-Kunsill (UE) Nru 1024/2013 tal-15 ta’ Ottubru 2013 li jikkonferixxi kompiti speċifiċi lill-Bank Ċentrali Ewropew fir-rigward ta’ politiki relatati mas-superviżjoni prudenzjali ta’ istituzzjonijiet ta’ kreditu, u b’mod partikolari l-Artikolu 6(1) flimkien mal-Artikolu 6(7) tiegħu,

Billi:

(1) Għandhom isiru numru ta’ emendi għal-Linja Gwida (UE) 2015/856 tal-Bank Ċentrali Ewropew (BĊE/2015/12). Fl-interessi taċ-ċarezza, jenħtieġ li l-Linja Gwida (UE) 2015/856 (BĊE/2015/12) tiġi riformulata.

(2) Sabiex iwettqu l-kompiti fdati lill-Bank Ċentrali Ewropew (BĊE) u lill-awtoritajiet nazzjonali kompetenti (ANK) ta’ dawk l-Istati Membri li jipparteċipaw fil-Mekkaniżmu Superviżorju Uniku (minn hawn ’il quddiem l-MSU) skont ir-Regolament (UE) Nru 1024/2013, il-BĊE u l-ANK jaderixxu mal-prinċipji ta’ indipendenza, akkontabilità, trasparenza u jżommu l-ogħla standards ta’ etika u integrità professjonali, inkluż l-ebda tolleranza lejn imġiba mhux xierqa u l-fastidju. Qafas ta’ governanza li jissalvagwardja dawn il-prinċipji u l-istandards huwa element ewlieni fl-iżgurar tal-kredibbiltà tal-MSU u huwa essenzjali biex tiġi żgurata l-fiduċja ta’ entitajiet taħt superviżjoni u taċ-ċittadini tal-Unjoni.

(3) B’dan il-ħsieb, fl-2015 il-Kunsill Governattiv adotta l-Linja Gwida (UE) 2015/856 (BĊE/2015/12), li stabbiliet il-prinċipji ta’ qafas tal-etika komuni għall-MSU (minn hawn ’il quddiem il-Qafas tal-Etika għall-MSU) li jissalvagwardja l-kredibbiltà u r-reputazzjoni tal-MSU kif ukoll il-fiduċja tal-pubbliku fl-integrità u l-imparzjalità tal-membri tal-korpi u tal-membri tal-persunal tal-BĊE u tal-ANK tal-Istati Membri li jipparteċipaw fl-MSU.

(4) Il-Kunsill Governattiv huwa tal-fehma li sabiex jinżammu l-ogħla standards ta’ etika professjonali u integrità, l-istandards minimi komuni eżistenti u r-regoli mmirati lejn il-prevenzjoni ta’ abbuż minn informazzjoni privileġġata u l-użu ħażin ta’ informazzjoni mhux pubblika tal-MSU, kif ukoll il-prevenzjoni u l-ġestjoni tal-kunflitti ta’ interess, jenħtieġ li jiġu żviluppati aktar. Għal dan il-għan, il-Kunsill Governattiv iqis li huwa importanti li l-BĊE u l-ANK jadottaw miżuri mmirati biex jevitaw anki kwalunkwe apparenza ta’ abbuż minn informazzjoni privileġġata, l-użu ħażin ta’ informazzjoni mhux pubblika jew ta’ kunflitti ta’ interess possibbli. Għalkemm il-BĊE u l-ANK jenħtieġ li jkollhom ċerta latitudni fid-definizzjoni tal-aktar qafas xieraq għal tali miżuri, huwa importanti fl-istess ħin li, bħala minimu jiġi applikat sett ta’ miżuri allinjati, b’mod partikolari fir-rigward tar-regoli dwar tranżazzjonijiet finanzjarji privati kritiċi għall-membri tal-persunal tal-BĊE u għall-ANK meta jwettqu kompiti tal-MSU – sabiex tiġi protetta b’mod adegwat ir-reputazzjoni tal-MSU. Dawk il-miżuri allinjati jenħtieġ li japplikaw ukoll għall-membri ta’ korp intern li għandu funzjonijiet amministrattivi u/jew konsultattivi relatati direttament jew indirettament mal-implimentazzjoni tal-kompiti tal-MSU mwettqa mill-ANK.

(5) Sabiex tiġi salvagwardjata aktar il-fiduċja tal-entitajiet taħt superviżjoni u taċ-ċittadini tal-Unjoni li l-membri tal-persunal tal-BĊE u tal-ANK, kif ukoll il-membri tal-korpi tagħhom, iservu b’imparzjalità professjonali sħiħa, jenħtieġ li jiġu evitati perċezzjonijiet ta’ kunflitti ta’ interess. Għal dan il-għan, dawk il-membri tal-persunal u l-membri tal-korpi li għandhom aċċess għal informazzjoni sensittiva għas-suq jenħtieġ li jkunu meħtieġa jikkonformaw ma’ regoli u standards speċifiċi meta jwettqu tranżazzjonijiet finanzjarji privati, b’mod partikolari meta dawk it-tranżazzjonijiet jinvolvu entitajiet regolati.

(6) Filwaqt li l-Qafas tal-Etika għall-MSU japplika biss għat-twettiq ta’ kompiti superviżorji, biex jiġu żgurati integrità u standards ta’ governanza tajba koerenti kemm jista’ jkun fost il-banek ċentrali nazzjonali (BĊNi) u l-ANK, il-Kunsill Governattiv adotta l-Linja Gwida (UE) 2015/855 tal-Bank Ċentrali Ewropew (BĊE/2015/11) li tistabbilixxi l-prinċipji ta’ Qafas tal-Etika tal-Eurosistema (minn hawn ’il quddiem il-Qafas tal-Etika tal-Eurosistema) applikabbli għat-twettiq ta’ kompiti tal-Eurosistema mill-BĊNi.

(7) Il-prinċipji stabbiliti mil-Linja Gwida (UE) 2015/856 (BĊE/2015/12) ġew issupplimentati mill-prattiki ta’ Implimentazzjoni tal-Qafas tal-Etika għall-MSU (EFSI) approvati mill-Kunsill Governattiv u trasposti f’regoli u prattiki interni adottati mill-BĊE u mill-ANK. Dawn il-prattiki tal-EFSI, inkluż b’mod partikolari l-prattika ta’ Implimentazzjoni Nru 4 dwar il-funzjoni ta’ konformità, jenħtieġ li jiġu inkorporati fil-Qafas tal-Etika għall-MSU rivedut, b’mod li jissalvagwardja l-prinċipju tal-awtonomija organizzattiva ta’ kull ANK.

(8) Sabiex jiġi żgurat li l-Qafas tal-Etika għall-MSU jkompli jirrifletti standards xierqa u l-aħjar prattiki li jqisu l-aħħar żviluppi fil-komunità superviżorja u fost l-istituzzjonijiet tal-Unjoni, il-Linja Gwida (UE) 2015/856 (BĊE/2015/12) tipprevedi rieżami regolari mill-Kunsill Governattiv. Id-dħul fis-seħħ tal-Kodiċi ta’ Kondotta għall-uffiċjali ta’ livell għoli tal-BĊE (minn hawn ’il quddiem il-Kodiċi Uniku), kompla jsaħħaħ l-istandards uniformi tal-etika professjonali għall-membri kollha tal-korpi ta’ livell għoli tal-BĊE u s-sostituti tagħhom. F’dan l-isfond, il-Kunsill Governattiv iqis li huwa meħtieġ li l-istandards eżistenti jiġu adattati kif previst fil-Qafas tal-Etika għall-MSU.

(9) Bil-ħsieb li jiġi pprovdut forum interistituzzjonali għall-iskambju dwar kwistjonijiet etiċi u ta’ konformità u dwar kwistjonijiet relatati mal-implimentazzjoni tal-Linja Gwida (UE) 2015/855 (BĊE/2015/11) u l-Linja Gwida (UE) 2015/856 (BĊE/2015/12), il-Kunsill Governattiv stabbilixxa Task Force tal-Uffiċjali tal-Etika u l-Konformità (ECTF). Fid-dawl tas-sinifikanza dejjem tikber ta’ dawn il-kwistjonijiet u l-ħtieġa li tirriżulta li jsir sforz għal standards aktar ambizzjużi fil-livell tal-MSU kif ukoll biex tiġi appoġġata l-implimentazzjoni koerenti tal-Qafas tal-Etika għall-MSU, il-Kunsill Governattiv qies li huwa xieraq li jiġu assenjati responsabbiltajiet imsaħħa lill-ECTF u li dan jiġi ttrasformat f’Konferenza permanenti dwar l-Etika u l-Konformità (ECC). Dawn ir-responsabbiltajiet imsaħħa jenħtieġ li jippermettu lill-MSU jindirizza b’mod adegwat l-isfidi inerenti fin-natura dinamika tal-integrità u l-istandards ta’ governanza tajba.

(10) Sabiex tiġi żgurata l-koerenza ġenerali ta’ dawn l-oqfsa etiċi, il-kunċetti ewlenin li jikkonċernaw il-kunflitti ta’ interess, l-aċċettazzjoni ta’ rigali u ospitalità u l-projbizzjoni tal-użu ħażin ta’ informazzjoni mhux pubblika kif stabbilit fil-Linji Gwida (UE) 2015/855 (BĊE/2015/11) u (UE) 2015/856 (BĊE/2015/12) jenħtieġ li jiġu żviluppati aktar u allinjati mal-Kodiċi Uniku. B’mod partikolari, l-iskrutinju qabel l-impjieg u r-restrizzjonijiet ta’ wara l-impjieg jenħtieġ li jiġu estiżi lil hinn mill-membri għolja tal-persunal tal-MSU li jirrapportaw direttament lil-livell eżekuttiv sabiex jindirizzaw b’mod effettiv it-tħassib dwar ir-revolving doors bejn is-superviżuri bankarji u s-settur privat, b’mod partikolari l-parteċipanti fis-swieq finanzjarji.

(11) Għalkemm il-Qafas tal-Etika għall-MSU japplika biss għat-twettiq ta’ kompiti superviżorji, huwa madankollu mixtieq li l-BĊE u l-ANK japplikaw standards ekwivalenti għall-membri tal-korpi tagħhom, il-persunal tagħhom u oħrajn li jwettqu kompiti mhux relatati mal-MSU.

(12) Id-dispożizzjonijiet ta’ din il-Linja Gwida huma mingħajr preġudizzju għal-leġiżlazzjoni nazzjonali applikabbli, b’mod partikolari l-leġiżlazzjoni dwar ix-xogħol.

(13) Id-dispożizzjonijiet ta’ din il-Linja Gwida jenħtieġ li jkunu mingħajr preġudizzju għall-Kodiċi Uniku u għal kwalunkwe rekwiżit ta’ kondotta etika stabbilit f’oqsma speċifiċi li jissodisfaw, bħala minimu, il-prinċipji tal-Qafas tal-Etika għall-MSU,

ADOTTA DIN IL-LINJA GWIDA:

KAPITOLU I Dispożizzjonijiet ġenerali

Artikolu 1 Kamp ta’ applikazzjoni

1. Din il-Linja Gwida għandha tapplika għall-Bank Ċentrali Ewropew (BĊE) u għall-awtoritajiet nazzjonali kompetenti fit-twettiq tal-kompiti superviżorji mogħtija lill-BĊE. F'dan ir-rigward, regoli interni adottati mill-BĊE u mill-ANK fit-twettiq tad-dispożizzjonijiet ta’ din il-Linja Gwida għandhom japplikaw għall-membri tal-persunal tagħhom u għall-membri tal-korpi tagħhom.

2. Il-BĊE u l-ANK għandhom jimmiraw sabiex, sa fejn ikun legalment fattibbli, jestendu l-obbligi ddefiniti fl-implimentazzjoni tad-dispożizzjonijiet ta’ din il-Linja Gwida għal persuni involuti fit-twettiq ta’ kompiti superviżorji li ma humiex membri tal-persunal tal-BĊE u tal-ANK.

Artikolu 2 Definizzjonijiet

Għall-finijiet ta’ din il-Linja Gwida:

(1) awtorità nazzjonali kompetenti tfisser awtorità nazzjonali kompetenti kif definit fl-Artikolu 2(2) tar-Regolament (UE) Nru 1024/2013. Din id-definizzjoni hija mingħajr preġudizzju għall-arranġamenti taħt il-liġi nazzjonali li jassenjaw ċerti kompiti superviżorji lil BĊN li ma jkunx innominat bħala ANK. Referenza għal ANK f’din il-Linja Gwida, f’każ bħal dan, tapplika wkoll għall-BĊN fir-rigward tal-kompiti assenjati lilu mil-liġi nazzjonali;

(2) Qafas tal-Etika għall-MSU tfisser id-dispożizzjonijiet ta’ din il-Linja Gwida kif implimentati mill-BĊE u kull waħda mill-ANK;

(3) informazzjoni mhux pubblika tfisser informazzjoni, irrispettivament mill-forma tagħha, li tappartjeni għat-twettiq ta’ kompiti superviżorji mogħtija lill-BĊE u lill-ANK u li ma tkunx saret pubblika;

(4) informazzjoni sensittiva għas-suq tfisser informazzjoni ta’ natura preċiża li jekk issir pubblika, x’aktarx ikollha effett sinifikanti fuq il-prezz ta’ assi jew il-prezzijiet fis-swieq finanzjarji;

(5) membru tal-persunal tfisser persuna li għandha relazzjoni ta’ impjieg mal-BĊE jew ma’ ANK għajr jekk dik il-persuna tkun fdata biss b’kompiti li mhumiex relatati mat-twettiq ta’ kompiti superviżorji skont ir-Regolament (UE) Nru 1024/2013;

(6) membru ta’ korp tfisser membru ta’ korp deċiżjonali jew korp intern ieħor tal-BĊE jew tal-ANK minbarra membru tal-persunal, ħlief jekk dak il-membru ta’ korp ikun unikament fdat b’kompiti mhux relatati mat-twettiq ta’ kompiti superviżorji skont ir-Regolament (UE) Nru 1024/2013;

(7) entità regolata tfisser kwalunkwe waħda minn dawn li ġejjin:

(7) a)

istituzzjoni finanzjarja monetarja (MFI) kif iddefinita fil-punt (1)(b) tal-Artikolu 2 tar-Regolament (UE) Nru 2021/379 tal-Bank Ċentrali Ewropew (BĊE/2021/2), imma esklużi l-fondi tas-suq monetarju;

b)

istituzzjoniji ta’ kreditu mhux MFI kif iddefinit fil-punt (4) tal-Artikolu 2 tar-Regolament (UE) 2021/379 (BĊE/2021/2);

c)

kumpanija azzjonarja finanzjarja kif iddefinita fil-punt (20) tal-Artikolu 4(1) tar-Regolament (UE) Nru 575/2013 tal-Parlament Ewropew u tal-Kunsill;

d)

kumpannija holding finanzjarja mħallta li tamministra kif iddefinita fil-punt (15) tal-Artikolu 2 tad-Direttiva 2002/87/KE tal-Parlament Ewropew u tal-Kunsill;

e)

konglomerat finanzjarju kif definit fil-punt (14) tal-Artikolu 2 tad-Direttiva 2002/87/KE li huwa soġġett għal superviżjoni supplimentari mill-BĊE skont l-Artikolu 4(1)(h) tar-Regolament (UE) Nru 1024/2013;

(8) kunflitt ta’ interess tfisser sitwazzjoni fejn l-interessi personali jistgħu jinfluwenzaw, jew jistgħu jitqiesu bħala li jinfluwenzaw, it-twettiq imparzjali u oġġettiv tad-dmirijiet u r-responsabbiltajiet;

(9) interess personali tfisser benefiċċju jew benefiċċju potenzjali, ta’ natura finanzjarja jew mhux finanzjarja, għal membru tal-persunal jew membru ta’ korp, inkluż — iżda mhux limitat għal — benefiċċju għal membru dirett tal-familja (li jkun kwalunkwe ġenitur, tifel, ħu jew oħt), konjuġi jew sieħeb/sieħba;

(10) negozjar għal perijodu qasir tfisser ix-xiri u l-bejgħ sussegwenti ta’ strument finanzjarju jew il-bejgħ u x-xiri sussegwenti tal-istess strument finanzjarju fi żmien 90 jum kalendarju;

(11) assi legat tfisser assi pprojbit li ġie akkwistat minn membru ta’ korp jew membru tal-persunal qabel il-projbizzjoni tal-assi jew qabel ma l-projbizzjoni ssir applikabbli għalihom, jew li ġie fil-pussess tagħhom fi żmien aktar tard minħabba ċirkostanzi li fuqhom ma kellhom l-ebda influwenza;

(12) vantaġġ tfisser rigal, ospitalità jew benefiċċju ieħor — kemm jekk finanzjarju, in natura jew ta’ natura oħra — li ma jkunx miftiehem bħala kumpens għal servizzi mogħtija u li r-riċevitur ma jkunx intitolat għalihom mod ieħor.

Artikolu 3 Dispożizzjonijiet nazzjonali konfliġġenti u l-applikabbiltà ta’ oqfsa etiċi differenti

1. Fejn ANK ma tkunx tista’ timplimenta dispożizzjoni ta’ din il-Linja Gwida minħabba liġi nazzjonali applikabbli, hija għandha tinforma lill-BĊE mingħajr dewmien żejjed u tieħu miżuri raġonevoli għad-dispożizzjoni tagħha biex tegħleb l-ostaklu maħluq minn din il-liġi nazzjonali, sabiex tinkiseb implimentazzjoni armonizzata ta’ din il-Linja Gwida fl-MSU kollu.

2. Id-dispożizzjonijiet ta’ din il-Linja Gwida huma mingħajr preġudizzju għal regoli etiċi aktar stretti stabbiliti mill-BĊE jew mill-ANK li huma applikabbli għall-membri tal-persunal tagħhom u għall-membri tal-korpi tagħhom.

KAPITOLU II Standards ta’ kondotta etika

PARTI 1 PRINĊIPJI ĠENERALI

Artikolu 4 Prinċipji ġenerali

1. Il-BĊE u l-ANK għandhom jieħdu l-miżuri meħtieġa biex jiżguraw li fit-twettiq tad-dmirijiet u r-responsabbiltajiet tagħhom, il-membri tal-persunal tagħhom u l-membri tal-korpi tagħhom josservaw l-ogħla standards ta’ kondotta etika.

2. Meta jikkonformaw mal-obbligu skont il-paragrafu 1, il-BĊE u l-ANK għandhom, b’mod partikolari, jieħdu l-miżuri meħtieġa biex jiżguraw li l-membri tal-persunal tagħhom u l-membri tal-korpi tagħhom jaġixxu b’mod onest, indipendenti, imparzjali, b’rispett u diskrezzjoni li jevita kwalunkwe forma ta’ mġiba mhux xierqa jew fastidju, u mingħajr kunsiderazzjoni għall-interess proprju, u b’hekk iżommu u jippromwovu l-fiduċja pubblika fl-MSU.

Artikolu 5 Interazzjonijiet ma’ partijiet esterni

Il-BĊE u l-ANK għandhom jieħdu l-miżuri meħtieġa biex jiżguraw li l-membri tal-persunal tagħhom u l-membri tal-korpi tagħhom li jiltaqgħu ma’ partijiet esterni – u b’mod partikolari ma’ rappreżentanti mill-industrija tas-servizzi finanzjarji – (a) iżommu n-newtralità u t-trattament ugwali fl-interazzjonijiet tagħhom ma’ dawk il-partijiet esterni; (b) iżommu rekords bażiċi tal-laqgħat; u (c) jevitaw kwalunkwe kondotta li tista’ titqies bħala li tagħti lill-partijiet esterni kwalunkwe vantaġġ, inklużi vantaġġi ta’ natura kummerċjali jew prestiġjuża.

PARTI 2 PREVENZJONI U ĠESTJONI TA’ KUNFLITTI TA’ INTERESS

Artikolu 6 Kunflitti ta’ interess

1. Il-BĊE u l-ANK għandu jkollhom mekkaniżmu fis-seħħ biex jiġġestixxu sitwazzjoni li fiha kandidat li jkun se jinħatar bħala membru tal-persunal ikollu kunflitt ta’ interess li jirriżulta, inter alia, minn attivitajiet okkupazzjonali preċedenti, holdings finanzjarji, attivitajiet privati jew relazzjonijiet personali.

2. Il-BĊE u l-ANK għandhom jadottaw regoli interni li jirrikjedu li l-membri tal-persunal u tal-korpi tagħhom jevitaw matul l-impjieg tagħhom kwalunkwe sitwazzjoni li tista’ tagħti lok għal kunflitt ta’ interess u biex jirrapportaw tali sitwazzjonijiet. Il-BĊE u l-ANK għandhom jieħdu l-miżuri meħtieġa biex jiżguraw li, meta jiġi rrapportat kunflitt ta’ interess, dan ikun irreġistrat kif xieraq u jkun hemm disponibbli u jittieħdu miżuri xierqa biex isolvu jew itaffu dan il-kunflitt ta’ interess, inkluż ir-rilaxx minn dmirijiet relatati mal-kwistjoni rilevanti.

3. Il-BĊE u l-ANK għandu jkollhom mekkaniżmu fis-seħħ biex jivvalutaw u jevitaw kunflitti ta’ interess possibbli li jirriżultaw minn attivitajiet okkupazzjonali ta’ wara l-impjieg imwettqa mill-membri tal-persunal tagħhom u l-membri tal-korpi tagħhom, inklużi rekwiżiti ta’ notifika xierqa u perjodi ta’ preklużjoni.

4. Il-BĊE u l-ANK għandu jkollhom, meta jkun rilevanti, mekkaniżmu fis-seħħ biex jivvalutaw u jevitaw kunflitti potenzjali ta’ interess li jirriżultaw minn attivitajiet ta’ xogħol li jagħmlu l-membri tal-persunal tagħhom u l-membri tal-korpi tagħhom matul il-liv bla ħlas.

Artikolu 7 Projbizzjoni li wieħed jirċievi vantaġġi

1. Il-BĊE u l-ANK għandhom jadottaw regoli interni li jipprojbixxu lill-membri tal-persunal tagħhom u lill-membri tal-korpi tagħhom milli jitolbu, jirċievu jew jaċċettaw wegħda li jirċievu xi vantaġġ, għalihom jew għal kwalunkwe persuna oħra, li jkun b’xi mod marbut mal-qadi tad-dmirijiet u r-responsabbiltajiet uffiċjali tagħhom.

2. Il-BĊE u l-ANK jistgħu jispeċifikaw fir-regoli interni tagħhom eżenzjonijiet mill-projbizzjoni stabbilita fil-paragrafu 1 fir-rigward tal-vantaġġi offruti mill-banek ċentrali, l-ANK, istituzzjonijiet, korpi jew aġenziji tal-Unjoni, organizzazzjonijiet internazzjonali u aġenziji tal-gvern, kif ukoll akkademji, u fir-rigward ta’ vantaġġi ta’ valur tas-soltu jew negliġibbli offruti mis-settur privat, dment li fil-każ tal-aħħar dawn il-vantaġġi la jkunu ta’ spiss u lanqas mill-istess sors. Il-BĊE u l-ANK għandhom jieħdu l-miżuri meħtieġa biex jiżguraw li dawn l-eżenzjonijiet ma jinfluwenzawx u ma jkunux jistgħu jitqiesu bħala li jinfluwenzaw l-indipendenza u l-imparzjalità tal-membri tal-persunal tagħhom u tal-membri tal-korpi tagħhom.

PARTI 3 SEGRETEZZA PROFESSJONALI U PREVENZJONI TA’ UŻU ĦAŻIN TA’ INFORMAZZJONI MHUX PUBBLIKA

Artikolu 8 Segretezza professjonali u projbizzjoni fuq l-iżvelar ta’ informazzjoni mhux pubblika

B’kont meħud tar-rekwiżiti tas-segretezza professjonali li jirriżultaw mill-Artikolu 37 tal-Istatut tas-Sistema Ewropea ta’ Banek Ċentrali u tal-Bank Ċentrali Ewropew, l-Artikolu 27(1) tar-Regolament (UE) Nru 1024/2013 u l-Artikolu 53 tad-Direttiva 2013/36/UE tal-Parlament Ewropew u tal-Kunsill, il-BĊE u l-ANK għandhom jieħdu l-miżuri meħtieġa biex jiżguraw li l-membri tal-persunal tagħhom u l-membri tal-korpi tagħhom jikkonformaw mar-rekwiżiti tas-segretezza professjonali applikabbli għalihom u jkunu pprojbiti milli jiżvelaw informazzjoni mhux pubblika lil partijiet terzi sakemm ma jkunux awtorizzati li jiżvelaw tali informazzjoni.

Artikolu 9 Projbizzjoni ta’ użu ħażin ta’ informazzjoni mhux pubblika

1. Il-BĊE u l-ANK għandhom jieħdu l-miżuri meħtieġa biex jiżguraw li l-membri tal-persunal tagħhom u l-membri tal-korpi tagħhom ikunu pprojbiti milli jużaw ħażin informazzjoni mhux pubblika.

2. Il-projbizzjoni tal-użu ħażin ta’ informazzjoni mhux pubblika għandha tkopri, bħala minimu, l-użu ta’ informazzjoni mhux pubblika: (a) għal tranżazzjonijiet finanzjarji privati għan-nom proprju jew għan-nom ta’ partijiet terzi; u (b) sabiex partijiet terzi jingħataw rakkomandazzjonijiet jew jiġu mħajjra biex jaġixxu fuq dik l-informazzjoni mhux pubblika.

Artikolu 10 Prinċipji ġenerali rigward tranżazzjonijiet finanzjarji privati

Il-BĊE u l-ANK għandhom jieħdu l-miżuri meħtieġa biex jiżguraw li l-membri tal-persunal tagħhom u l-membri tal-korpi tagħhom ikunu meħtieġa — meta jwettqu tranżazzjonijiet finanzjarji privati għan-nom proprju jew għan-nom ta’ kwalunkwe parti terza — jużaw kawtela, iżommu lura u jkollhom orizzont ta’ investiment fuq terminu medju sa twil.

Artikolu 11 Restrizzjonijiet speċifiċi fuq tranżazzjonijiet finanzjarji privati kritiċi

1. Meta jqisu kunsiderazzjonijiet ta’ effettività, effiċjenza u proporzjonalità, il-BĊE u l-ANK għandhom jadottaw regoli interni applikabbli għall-membri tal-persunal u l-membri tal-korpi li fit-twettiq ta’ kompiti tal-MSU jkollhom aċċess għal informazzjoni sensittiva għas-suq, għajr fuq bażi ta’ darba (minn hawn ’il quddiem persuni b’aċċess għal informazzjoni sensittiva għas-suq), billi jintroduċu r-restrizzjonijiet speċifiċi stabbiliti fil-paragrafu 2 dwar tranżazzjonijiet finanzjarji privati li huma jew li jistgħu jitqiesu li huma relatati mill-qrib mat-twettiq ta’ kompiti tal-MSU (minn hawn ’il quddiem tranżazzjonijiet finanzjarji privati kritiċi).

2. Ir-regoli interni msemmija fil-paragrafu 1 għandhom:

2. a)

jipprojbixxu tranżazzjonijiet finanzjarji privati kritiċi fi:

i)

strumenti ta’ ekwità u ta’ dejn maħruġa minn entità regolata;

ii)

derivattivi relatati ma’ strumenti ta’ ekwità u ta’ dejn maħruġa minn entità regolata;

iii)

unitajiet ta’ skemi ta’ investiment kollettiv li għandhom politika ta’ investiment iddikjarata mmirata esklussivament lejn entitajiet regolati; u

b)

jirrestrinġu tranżazzjonijiet finanzjarji privati kritiċi oħrajn skont il-ħtieġa; u

c)

jirrestrinġu n-negozjar għal perijodu qasir.

3. Filwaqt li jqisu kunsiderazzjonijiet ta’ effettività, effiċjenza u proporzjonalità, ir-regoli interni adottati skont il-paragrafu 2(b) u (c) jistgħu jikkonsistu f’waħda jew aktar mir-restrizzjonijiet li ġejjin fuq it-tranżazzjoni rilevanti:

3. a)

projbizzjoni;

b)

rekwiżit ta’ awtorizzazzjoni minn qabel;

c)

rekwiżit ta’ rapportar ex ante jew ex post;

d)

perijodu ta’ embargo li fih ma għandhiex titwettaq tali tranżazzjoni.

4. Fir-regoli interni tagħhom, il-BĊE u l-ANK: (i) għandhom jipprovdu li persuni b’aċċess għal informazzjoni sensittiva għas-suq jirrapportaw l-assi legati tagħhom kull meta ż-żamma ta’ dawn l-assi toħloq kunflitt ta’ interess mal-involviment tagħhom f’kompiti tal-MSU; u (ii) għandhom jistabbilixxu mekkaniżmu biex jiżguraw li l-kunflitti ta’ interess li jirriżultaw minn assi legati jiġu solvuti f’perijodu ta’ żmien raġonevoli, fosthom li jista’ jintalab li l-assi legati li joħolqu kwalunkwe kunflitt ta’ interess jinbiegħu f’perijodu ta’ żmien raġonevoli. Il-BĊE u l-ANK jistgħu jipprovdu fir-regoli interni tagħhom li l-assi legati li ma joħolqux kunflitti ta’ interess jistgħu jinżammu.

5. Il-BĊE u l-ANK għandhom jispeċifikaw fir-regoli interni tagħhom il-kundizzjonijiet u s-salvagwardji li taħthom il-persuni li jafdaw il-ġestjoni tat-tranżazzjonijiet finanzjarji privati tagħhom lil terza persuna indipendenti skont ftehim ta’ ġestjoni tal-assi bil-miktub ikunu eżentati mir-restrizzjonijiet speċifiċi stabbiliti f’dan l-Artikolu.

6. Il-BĊE u l-ANK jistgħu jadottaw regoli interni li japplikaw restrizzjonijiet kif stabbilit f’dan l-Artikolu għall-membri tal-persunal tagħhom u għall-membri tal-korpi tagħhom għajr persuni b’aċċess għal informazzjoni sensittiva għas-suq.

7. Il-BĊE u l-ANK għandhom jieħdu l-miżuri meħtieġa biex jaġġustaw ir-regoli interni tagħhom li jimponu restrizzjonijiet speċifiċi fuq tranżazzjonijiet finanzjarji privati kritiċi kif imsemmi fil-paragrafu 2 biex jirriflettu d-deċiżjonijiet tal-Kunsill Governattiv.

KAPITOLU III Kollaborazzjoni u implimentazzjoni tal-Qafas tal-Etika tal-MSU

Artikolu 12 Funzjonijiet indipendenti ta’ etika u/jew ta’ konformità

1. Il-BĊE u l-ANK għandhom jieħdu l-miżuri meħtieġa biex jiżguraw li jkollhom funzjoni ddedikata għall-etika u/jew il-konformità — li għandha tkun funzjoni ewlenija ta’ ġestjoni tar-riskju — biex tappoġġa lill-korpi deċiżjonali tagħhom fl-implimentazzjoni tal-Qafas tal-Etika għall-MSU. Il-funzjoni tal-etika u/jew tal-konformità għandu jkollha l-pożizzjoni, l-awtorità u l-indipendenza xierqa meħtieġa biex twettaq il-kompiti tagħha. Din għandha tirrapporta direttament — ġerarkikament jew funzjonalment — lill-ogħla livell ta’ ġestjoni fi ħdan il-BĊE jew l-ANK rilevanti, kif applikabbli. Għandha tingħata riżorsi adegwati biex twettaq il-kompiti tagħha, u biex iżomm ruħha aġġornata dwar l-iżviluppi pertinenti u biex iżżomm l-għarfien espert tagħha attwali.

2. Ir-responsabbiltajiet tal-funzjoni tal-etika u/jew tal-konformità fir-rigward tal-Qafas tal-Etika għall-MSU għandhom jinkludu: (a) l-għoti ta’ pariri u gwida dwar l-interpretazzjoni u l-applikazzjoni tal-Qafas tal-Etika għall-MSU; (b) iż-żieda tal-għarfien u t-twettiq ta’ taħriġ obbligatorju; (c) l-identifikazzjoni u l-valutazzjoni tar-riskji ta’ konformità; (d) il-monitoraġġ u l-verifika tal-konformità; (e) ir-rapportar ta’ każijiet ta’ nuqqas ta’ konformità; (f) l-abbozzar, jew il-kontribut għall-abbozzar, tar-regoli u l-prattiki interni tal-BĊE jew l-ANK rilevanti, skont kif applikabbli; u (g) it-tħejjija tar-rapport annwali mill-BĊE jew mill-ANK rilevanti, skont kif applikabbli u kif imsemmi fl-Artikolu 15(1).

3. Il-BĊE u l-ANK għandhom jieħdu l-miżuri meħtieġa biex jiżguraw li l-funzjoni tal-etika u/jew tal-konformità tagħhom tkun involuta, kif xieraq u fil-ħin, fi kwistjonijiet li jista’ jkollhom impatt fuq il-Qafas tal-Etika għall-MSU.

4. Il-funzjoni tal-etika u/jew tal-konformità tal-BĊE u tal-ANK għandha tittratta l-informazzjoni miksuba fit-twettiq tar-responsabbiltajiet tagħha bl-akbar kunfidenzjalità u għandha tipproċessa u żżomm kwalunkwe data personali skont ir-regoli applikabbli dwar il-protezzjoni tad-data.

5. F’każijiet fejn il-funzjoni tal-etika u/jew tal-konformità tal-banek ċentrali tal-Eurosistema twettaq kompiti u dmirijiet oħra, il-BĊE u l-ANK għandhom jieħdu l-miżuri meħtieġa biex jiżguraw li kwalunkwe kompitu u dmir bħal dan ikunu kompatibbli mal-funzjoni tal-etika u/jew tal-konformità nnifisha jew il-kompiti u d-dmirijiet tat-taqsima organizzattiva li magħha hija marbuta l-funzjoni tal-etika u/jew tal-konformità mil-lat organizzattiv.

Artikolu 13 Monitoraġġ tal-konformità

1. Il-BĊE u l-ANK għandu jkollhom stabbiliti mekkaniżmi biex jimmonitorjaw il-konformità mar-regoli li jimplimentaw din il-Linja Gwida. Il-monitoraġġ għandu jinkludi, b’mod partikolari, il-konformità mar-regoli interni li jimplimentaw ir-restrizzjonijiet speċifiċi applikabbli għal tranżazzjonijiet finanzjarji privati kritiċi kif previst fl-Artikolu 11 u, kontrolli ta’ konformità regolari u/jew ad hoc skont il-ħtieġa.

2. Il-monitoraġġ tal-konformità għandu jkun mingħajr preġudizzju għal regoli interni li jippermettu investigazzjonijiet interni jekk membru tal-persunal tagħhom jew membru ta’ korp tagħhom ikun issuspettat li kiser ir-regoli li jimplimentaw din il-Linja Gwida.

Artikolu 14 Rapportar ta’ nuqqas ta’ konformità u segwitu

1. Il-BĊE u l-ANK għandhom jadottaw regoli interni dwar l-iżvelar ta’ informazzjoni protetta kif ukoll proċeduri interni għar-rapportar ta’ każijiet ta’ nuqqas ta’ konformità mar-regoli li jimplimentaw din il-Linja Gwida. Dawn ir-regoli u proċeduri interni għandhom jinkludu miżuri biex jiżguraw il-protezzjoni xierqa ta’ persuni li jirrapportaw każijiet ta’ nuqqas ta’ konformità.

2. Il-BĊE u l-ANK għandhom jieħdu l-miżuri meħtieġa sabiex jiżguraw li jkun hemm segwitu għal każijiet ta’ nuqqas ta’ konformità, fosthom, kif ikun xieraq, l-impożizzjoni ta’ miżuri dixxiplinari proporzjonati skont ir-regoli u l-proċeduri dixxiplinari applikabbli.

3. Il-BĊE u l-ANK għandhom jirrapportaw kwalunkwe inċident kbir relatat man-nuqqas ta’ konformità mar-regoli interni tagħhom li jimplimentaw din il-Linja Gwida mingħajr dewmien żejjed permezz tal-Kumitat tal-Iżvilupp Organizzattiv u l-Bord Superviżorju lill-Kunsill Governattiv f’konformità mal-proċeduri interni applikabbli, u jinformaw lill-Kumitat tal-Awditjar u lill-ECC b’mod parallel.

KAPITOLU IV Dispożizzjonijiet finali

Artikolu 15 Rapportar u valutazzjoni mill-ġdid

1. Il-BĊE u l-ANK għandhom jibagħtu lill-ECC ir-rapport annwali tagħhom dwar l-implimentazzjoni ta’ din il-Linja Gwida bil-ħsieb li jiskambjaw informazzjoni dwar l-implimentazzjoni ta’ din il-Linja Gwida u jippreparaw rieżamijiet futuri u/jew jiffaċilitaw l-iżvilupp ta’ approċċi komuni, kif imsemmi fl-Artikolu 12(2).

2. Il-Kunsill Governattiv għandu jirrieżamina din il-Linja Gwida mill-inqas kull tliet snin sa mhux aktar tard mid-data li fiha r-regoli u l-miżuri li jimplimentaw il-Linja Gwida kellhom jiġu applikati kif definit fl-Artikolu 17(2) jew fuq ir-rakkomandazzjoni tal-ECC.

Artikolu 16 Revoka

1. Il-Linja Gwida (UE) 2015/856 (BĊE/2015/12) hija b'dan imħassra.

2. Ir-referenzi għal-Linja Gwida (UE) 2015/856 (BĊE/2015/12) għandhom jitqiesu bħala referenzi għal din il-Linja Gwida u għandhom jinqraw b’mod konformi mat-tabella ta’ korrelazzjoni fl-Anness għal din il-Linja Gwida.

Artikolu 17 Dħul fis-seħħ u implimentazzjoni

1. Din il-Linja Gwida għandha tidħol fis-seħħ fil-jum tan-notifika tagħha lill-ANK.

2. Il-BĊE u l-ANK għandhom jieħdu l-miżuri meħtieġa biex jimplimentaw u jikkonformaw ma’ din il-Linja Gwida u japplikaw ir-regoli u l-miżuri li jimplimentaw il-Linja Gwida mill-1 ta’ Ġunju 2023. L-ANK għandhom jinfurmaw lill-BĊE dwar kwalunkwe ostakolu għall-implimentazzjoni ta’ din il-Linja Gwida u għandhom jinnotifikaw lill-BĊE bit-testi u l-mezzi relatati ma’ dawk il-miżuri sa mhux aktar tard mill-1 ta’ April 2023.

Artikolu 18 Destinatarji

Din il-linja ta’ gwida hija indirizzata lill-BĊE u lill-ANK.

Magħmul fi Frankfurt am Main, it-2 ta’ Novembru 2021. Għall-Kunsill Governattiv tal-BĊE Il-President tal-BĊE Christine Lagarde

ANNEX

ANNESS Tabella ta’ korrelazzjoni

Linja Gwida (UE) 2015/856 (BĊE/2015/12) Din il-Linja Gwida Artikolu 1 Artikolu 2 Artikolu 2 Artikolu 1 Artikolu 3 / Artikolu 4 / Artikolu 5 Artikolu 13 Artikolu 6 Artikolu 14 Artikolu 7 Artikolu 9 Artikolu 8 Artikolu 11 Artikolu 9 Artikolu 6 Artikolu 10 Artikolu 7 Artikolu 11 Artikolu 17 Artikolu 12 Artikolu 15 Artikolu 13 Artikolu 18

Versions

1. 2021-11-02