Address https://gelex.eu/eli/EU/decision/2024/1248@2024-04-29/mt

Contents

1. Preamble
2. Artikolu 1 Stabbiliment, objettivi, kamp ta’ applikazzjoni u durata
3. 3.
4. Artikolu 2 Arranġamenti finanzjarji
5. Artikolu 3 Arranġamenti mal-benefiċjarju
6. 2.
7. Artikolu 4 Implimentazzjoni
8. Artikolu 5 Monitoraġġ, kontroll u evalwazzjoni
9. 2.
10. Artikolu 6 Rappurtar
11. Artikolu 7 Sospensjoni u terminazzjoni
12. Artikolu 8 Dħul fis-seħħ

IL-KUNSILL TAL-UNJONI EWROPEA,

Wara li kkunsidra t-Trattat dwar l-Unjoni Ewropea, u b’mod partikolari l-Artikoli 28(1) u 41(2) tiegħu,

Wara li kkunsidra l-proposta tar-Rappreżentant Għoli tal-Unjoni għall-Affarijiet Barranin u l-Politika ta’ Sigurtà,

Billi:

(1) Id-Deċiżjoni tal-Kunsill (PESK) 2021/509 tistabbilixxi l-Faċilità Ewropea għall-Paċi (EPF) għall-finanzjament mill-Istati Membri tal-azzjonijiet tal-Unjoni fil-qafas tal-Politika Estera u ta’ Sigurtà Komuni (PESK) biex tinżamm il-paċi, jiġu prevenuti l-konflitti u tissaħħaħ is-sigurtà internazzjonali f’konformità mal-Artikolu 21(2), punt (c), tat-Trattat. B’mod partikolari, skont l-Artikolu 1(2) tad-Deċiżjoni (PESK) 2021/509, l-EPF trid tintuża biex tiffinanzja miżuri ta’ assistenza bħal azzjonijiet biex jissaħħu l-kapaċitajiet ta’ Stati terzi u organizzazzjonijiet reġjonali u internazzjonali b’rabta ma’ kwistjonijiet militari u ta’ difiża.

(2) Ir-reġjuni tat-Tramuntana tal-pajjiżi kostali tal-Golf tal-Guinea, il-Benin, il-Kosta tal-Avorju, il-Ghana u t-Togo qed jesperjenzaw kundizzjonijiet ta’ sigurtà li qed jiddeterjoraw b’rabta mal-kriżi li qed taffettwa s-Saħel ċentrali.

(3) Fid-dawl tal-ambjent tas-sigurtà li qed jiddeterjora, huwa meħtieġ u importanti li jissaħħu l-Forzi Armati tal-Kosta tal-Avorju sabiex ikunu jistgħu jsiru u jiġu appoġġatil-isforzi ta’ stabbilizzazzjoni fil-Kosta tal-Avorju. F’dak il-kuntest, u b’għarfien sħiħ tal-fatt li s-sitwazzjoni teħtieġ rispons integrat, l-iżgurar tal-paċi u s-sigurtà fit-tul fil-Kosta tal-Avorju hija prijorità ewlenija għall-Unjoni.

(4) Fit-3 ta’ Awwissu 2023, il-Kunsill adotta Deċiżjoni (PESK) 2023/1599, li stabbiliet Inizjattiva tal-Unjoni Ewropea għas-Sigurtà u d-Difiża b’appoġġ għall-pajjiżi tal-Afrika tal-Punent tal-Golf tal-Guinea, (l-Inizjattiva), jiġifieri l-Benin u l-Ghana, fil-qafas tal-Politika ta’ Sigurtà u ta’ Difiża Komuni (PSDK) Fil-25 ta’ Settembru 2023, il-Kunsill adotta d-Deċiżjoni (PESK) 2023/2066, li estendiet l-Inizjattiva għall-Kosta tal-Avorju u t-Togo. L-objettiv strateġiku tal-Inizjattiva huwa li tassisti lill-pajjiżi tal-Afrika tal-Punent tal-Golf tal-Guinea li fihom hija stabbilita l-Inizjattiva fl-iżvilupp tal-kapaċitajiet adegwati fi ħdan il-forzi tas-sigurtà u tad-difiża tagħhom biex irażżnu u jirrispondu għall-pressjoni eżerċitata minn gruppi armati mhux statali.

(5) Fit-13 ta’ Marzu 2024, ir-Rappreżentant Għoli tal-Unjoni għall-Affarijiet Barranin u l-Politika ta’ Sigurtà (ir-Rappreżentant Għoli) irċieva talba mill-Kosta tal-Avorju biex l-Unjoni tassisti lill-Forzi Armati tal-Kosta tal-Avorju fl-akkwist ta’ tagħmir ewlieni biex isaħħu l-kapaċitajiet operazzjonali tagħhom sabiex jipproteġu l-fruntieri tal-art u biex jiġġieldu kontra gruppi armati mhux statali li qed jiddestabbilizzaw il-pajjiż u r-reġjun kollu tal-Afrika tal-Punent.

(6) Il-miżuri ta’ assistenza jridu jiġu implimentati b’kont meħud tal-prinċipji u r-rekwiżiti stipulati fid-Deċiżjoni (PESK) 2021/509, b’mod partikolari f’konformità mal-Pożizzjoni Komuni tal-Kunsill 2008/944/PESK, u f’konformità mar-regoli għall-implimentazzjoni tad-dħul u n-nefqa ffinanzjati taħt l-EPF.

(7) Il-Kunsill jafferma mill-ġdid id-determinazzjoni tiegħu li jipproteġi, jippromwovi u jirrealizza d-drittijiet tal-bniedem, il-libertajiet fundamentali u l-prinċipji demokratiċi u li jsaħħaħ l-istat tad-dritt u l-governanza tajba, f’konformità mal-Karta tan-Nazzjonijiet Uniti, mad-Dikjarazzjoni Universali tad-Drittijiet tal-Bniedem u mal-liġi internazzjonali, b’mod partikolari d-dritt internazzjonali dwar id-drittijiet tal-bniedem u d-dritt umanitarju internazzjonali,

ADOTTA DIN ID-DEĊIŻJONI:

Artikolu 1 Stabbiliment, objettivi, kamp ta’ applikazzjoni u durata

1. Hija b’dan stabbilita miżura ta’ assistenza (il-miżura ta’ assistenza) li tibbenifika minnha l-Kosta tal-Avorju (il-benefiċjarju), li għandha tiġi ffinanzjata mill-Faċilità Ewropea għall-Paċi (EPF).

2. L-objettiv tal-miżura ta’ assistenza huwa li l-Forzi Armati tal-Kosta tal-Avorju jiġu appoġġati biex jipproteġu l-integrità territorjali u s-sovranità tal-Kosta tal-Avorju u l-popolazzjoni ċivili tagħha minn theddid intern u estern.

3. Biex jintlaħaq l-objettiv stipulat fil-paragrafu 2, il-miżura ta’ assistenza għandha tiffinanzja t-tipi ta’ servizzi u tagħmir li ġejjin mhux imfassla biex iwasslu forza letali:

3.

(a) sistemi ta’ ġbir ta’ sinjali elettromanjetiċi u l-integrazzjoni tagħhom fuq l-inġenji tal-ajru;

(b) tagħmir ta’ komunikazzjoni u trażmissjoni tad-data u il-integrazzjoni tiegħu fuq l-inġenji tal-ajru;

(c) sistemi tattiċi tal-ajru mingħajr ekwipaġġ;

(d) vetturi u trakkijiet b’diversi użi;

(e) it-tagħmir protettiv personali;

(f) taħriġ fuq talba dwar it-tagħmir u taħriġ dwar id-dritt internazzjonali dwar id-drittijiet tal-bniedem u d-dritt umanitarju internazzjonali.

4. Id-durata tal-miżura ta’ assistenza għandha tkun ta’ 36 xahar mid-data tal-adozzjoni ta’ din id-Deċiżjoni.

Artikolu 2 Arranġamenti finanzjarji

1. L-ammont ta’ referenza finanzjarja maħsub biex ikopri n-nefqa relatata mal-miżura ta’ assistenza għandu jkun ta’ EUR 15000000.

2. In-nefqa kollha għandha tiġi ġestita f’konformità mad-Deċiżjoni (PESK) 2021/509 u r-regoli għall-implimentazzjoni tad-dħul u n-nefqa ffinanzjata taħt l-EPF.

Artikolu 3 Arranġamenti mal-benefiċjarju

1. Ir-Rappreżentant Għoli għandu jagħmel l-arranġamenti meħtieġa mal-benefiċjarju biex jiżgura l-konformità tiegħu mar-rekwiżiti u l-kundizzjonijiet stabbiliti minn din id-Deċiżjoni bħala kundizzjoni għall-għoti ta’ appoġġ fil-qafas tal-miżura ta’ assistenza.

2. L-arranġamenti msemmija fil-paragrafu 1 għandhom jinkludu dispożizzjonijiet li jobbligaw lill-benefiċjarju jiżgura:

2.

(a) il-konformità tal-unitajiet tal-Forzi Armati tal-Kosta tal-Avorju appoġġati fil-qafas tal-miżura ta’ assistenza mal-liġi internazzjonali rilevanti, b’mod partikolari d-dritt internazzjonali dwar id-drittijiet tal-bniedem u d-dritt umanitarju internazzjonali;

(b) l-użu xieraq u effiċjenti ta’ kwalunkwe assi pprovduti skont il-miżura ta’ assistenza għall-finijiet li għalihom ikunu ġew ipprovduti;

(c) il-manutenzjoni suffiċjenti ta’ kwalunkwe assi pprovduti skont il-miżura ta’ assistenza biex tiġi żgurata l-użabilità tagħhom u d-disponibbiltà operazzjonali tagħhom matul iċ-ċiklu tal-ħajja tagħhom;

(d) li kwalunkwe assi pprovduti skont il-miżura ta’ assistenza mhux ser jintilfu, jew jiġu ttrasferiti mingħajr l-approvazzjoni tal-Kumitat tal-Faċilità stabbilit skont id-Deċiżjoni (PESK) 2021/509 lil persuni jew entitajiet oħra għajr dawk identifikati f’dawk l-arranġamenti, fi tmiem iċ-ċiklu tal-ħajja tagħhom.

3. L-arranġamenti msemmija fil-paragrafu 1 għandhom jinkludu dispożizzjonijiet dwar is-sospensjoni u t-terminazzjoni tal-appoġġ skont il-miżura ta’ assistenza f’każ li l-benefiċjarju jinstab li jkun kiser l-obbligi stabbiliti fil-paragrafu 2.

Artikolu 4 Implimentazzjoni

1. Ir-Rappreżentant Għoli għandu jkun responsabbli li jiżgura l-implimentazzjoni ta’ din id-Deċiżjoni f’konformità mad-Deċiżjoni (PESK) 2021/509, u r-regoli għall-implimentazzjoni tad-dħul u n-nefqa ffinanzjata taħt l-EPF, f’konformità mal-Qafas Metodoloġiku Integrat għall-valutazzjoni u l-identifikazzjoni tal-miżuri u l-kontrolli meħtieġa għall-miżuri ta’ assistenza taħt l-EPF.

2. L-implimentazzjoni tal-attivitajiet imsemmija fl-Artikolu 1(3) għandha titwettaq mid-Défense Conseil International – DCI Group.

Artikolu 5 Monitoraġġ, kontroll u evalwazzjoni

1. Ir-Rappreżentant Għoli għandu jimmonitorja l-konformità mill-benefiċjarju mal-obbligi stipulati fl-Artikolu 3. Dak il-monitoraġġ għandu jintuża biex jipprovdi għarfien tal-kuntest u tar-riskji ta’ ksur tal-obbligi stabbiliti f’konformità mal-Artikolu 3, u għandu jikkontribwixxi għall-prevenzjoni ta’ tali ksur, inkluż ksur tad-dritt internazzjonali dwar id-drittijiet tal-bniedem u tad-dritt umanitarju internazzjonali mill-unitajiet tal-Forzi Armati tal-Kosta tal-Avorju appoġġati fil-qafas tal-miżura ta’ assistenza.

2. Il-kontroll ta’ wara t-trasportazzjoni tat-tagħmir u tal-provvisti għandu jiġi organizzat kif ġej:

2.

(a) il-verifika tal-konsenja, fejn iċ-ċertifikati tal-konsenja tal-EPF jiġu ffirmati mill-forzi tal-utent aħħari mat-trasferiment tas-sjieda;

(b) ir-rappurtar, li permezz tiegħu l-benefiċjarju jirrapporta kull sena dwar l-attivitajiet imwettqa bit-tagħmir provdut fil-qafas tal-miżura ta’ assistenza u dwar l-inventarju ta’ oġġetti deżinjati sakemm tali rappurtar ma jibqax jitqies meħtieġ mill-Kumitat Politiku u ta’ Sigurtà (KPS);

(c) żjarat fuq il-post, fejn malli jintalab dan il-benefiċjarju għandu jagħti aċċess lir-Rappreżentant Għoli u lill-awdituri tal-EPF biex iwettqu kontrolli fuq il-post u awditi tal-EPF.

3. Ir-Rappreżentant Għoli għandu jwettaq evalwazzjoni finali mat-tlestija tal-assistenza biex jivvaluta jekk il-miżura ta’ assistenza kkontribwietx biex jintlaħqu l-objettivi ddikjarati fl-Artikolu 1(2).

Artikolu 6 Rappurtar

Matul il-perjodu ta’ implimentazzjoni, ir-Rappreżentant Għoli għandu jipprovdi lill-KPS rapporti ta’ kull sitt xhur dwar l-implimentazzjoni tal-miżura ta’ assistenza, f’konformità mal-Artikolu 63 tad-Deċiżjoni (PESK) 2021/509. L-amministratur għall-miżuri ta’ assistenza għandu jinforma regolarment lill-Kumitat tal-Faċilità stabbilit bid-Deċiżjoni (PESK) 2021/509 dwar l-implimentazzjoni tad-dħul u n-nefqa f’konformità mal-Artikolu 38 ta’ dik id-Deċiżjoni, inkluż billi jipprovdi informazzjoni dwar il-fornituri u s-sottokuntratturi involuti.

Artikolu 7 Sospensjoni u terminazzjoni

1. Il-KPS jista’ jiddeċiedi li jissospendi kompletament jew parzjalment l-implimentazzjoni tal-miżura ta’ assistenza skont l-Artikolu 64 tad-Deċiżjoni (PESK) 2021/509.

2. Il-KPS jista’ jirrakkomanda wkoll li l-Kunsill jittermina l-miżura ta’ assistenza.

Artikolu 8 Dħul fis-seħħ

Din id-Deċiżjoni għandha tidħol fis-seħħ fid-data tal-adozzjoni tagħha.

Magħmul fil-Lussemburgu, id-29 ta’ April 2024. Għall-Kunsill Il-President D. Clarinval

Versions

1. 2024-04-29