Address https://gelex.eu/eli/EU/decision/2025/1039@2025-05-16/mt

Contents

1. Preamble
2. (15)
3. Artikolu 2
4. ANNEX
5. Miri tal-prestazzjoni li nstabu inkonsistenti mal-miri tal-prestazzjoni għall-Unjoni kollha għar-raba’ perjodu ta’ referenza IL-QASAM EWLIENI TA’ PRESTAZZJONI TAL-KOSTEFFIĊJENZA

IL-KUMMISSJONI EWROPEA,

Wara li kkunsidrat il-Ftehim bejn il-Komunità Ewropea u l-Konfederazzjoni Żvizzera dwar it-Trasport bl-Ajru,

Wara li kkunsidrat ir-Regolament (KE) Nru 549/2004 tal-Parlament Ewropew u tal-Kunsill tal-10 ta’ Marzu 2004 li jippreskrivi l-qafas għall-ħolqien tal-Ajru Uniku Ewropew (ir-Regolament qafas), u b’mod partikolari il-punt (c) tat-tieni subparagrafu tal-Artikolu 11(3) tiegħu,

Wara li kkunsidrat ir-Regolament (UE) 2024/2803 tal-Parlament Ewropew u tal-Kunsill tat-23 ta’ Ottubru 2024 dwar l-implimentazzjoni tal-Ajru Uniku Ewropew, u b’mod partikolari l-Artikolu 58(3) tiegħu,

Wara li kkonsultat il-Kumitat dwar l-Ajru Uniku,

Billi: SFOND

(1) Skont l-Artikolu 11 tar-Regolament (KE) 549/2004, huwa meħtieġ li l-Istati Membri jfasslu pjanijiet, fil-livell nazzjonali jew fil-livell tal-blokok ta’ spazju tal-ajru funzjonali (FABs, Functional Airspace Blocks), li jinkludu miri ta’ prestazzjoni, għal kull perjodu ta’ referenza tal-iskema ta’ prestazzjoni għas-servizzi ta’ navigazzjoni bl-ajru u għall-funzjonijiet tan-network. Dawk il-pjanijiet għandhom jinkludu miri ta’ prestazzjoni lokali li huma konsistenti mal-miri ta’ prestazzjoni għall-Unjoni kollha għall-perjodu ta’ referenza kkonċernat.

(2) Il-miri ta’ prestazzjoni għall-Unjoni kollha għar-raba’ perjodu ta’ referenza (RP4, 2025-2029) ġew stabbiliti oriġinarjament fid-Deċiżjoni ta’ Implimentazzjoni tal-Kummissjoni (UE) 2024/1688.

(3) L-Istati Membri kollha u l-Iżvizzera fasslu u adottaw abbozzi tal-pjanijiet ta’ prestazzjoni għall-RP4, li ġew ippreżentati lill-Kummissjoni għall-valutazzjoni sal-1 ta’ Ottubru 2024. L-Iżvizzera ppreżentat lill-Kummissjoni abbozz ta’ pjan tal-prestazzjoni adottat b’mod konġunt mal-Belġju, il-Ġermanja, Franza, il-Lussemburgu u n-Netherlands (l-Istati Membri tal-UE parti mill-FABEC) fil-livell tal-Blokk tal-Ispazju tal-Ajru Funzjonali tal-Ewropa Ċentrali (FABEC). Wara l-verifika tal-kompletezza tal-abbozz tal-pjan ta’ prestazzjoni tal-FABEC, il-Kummissjoni talbet lill-FABEC biex jissottometti abbozz aġġornat ta’ pjan tal-prestazzjoni sal-15 ta’ Novembru 2024.

(4) Il-valutazzjoni tal-Kummissjoni inkluża f’din id-Deċiżjoni hija bbażata fuq l-abbozz aġġornat ta’ pjan tal-prestazzjoni tal-FABEC (l-abbozz tal-pjan ta’ prestazzjoni tal-FABEC) sottomess mill-Iżvizzera u mill-Istati Membri li huma inklużi fil-FABEC.

(5) Il-Korp ta’ Rieżami tal-Prestazzjoni (PRB, Performance Review Body), li jassisti lill-Kummissjoni fl-implimentazzjoni tal-iskema ta’ prestazzjoni, ressaq rapport lill-Kummissjoni li jistabbilixxi l-parir tiegħu dwar il-valutazzjoni tal-abbozz tal-pjan ta’ prestazzjoni tal-FABEC.

(6) F’konformità mal-Artikolu 14(1) tar-Regolament ta’ Implimentazzjoni tal-Kummissjoni (UE) 2019/317, il-Kummissjoni vvalutat il-konsistenza tal-miri ta’ prestazzjoni lokali li huma inklużi fl-abbozz tal-pjan ta’ prestazzjoni tal-FABEC abbażi tal-kriterji stabbiliti fil-punt 1 tal-Anness IV ta’ dak ir-Regolament ta’ Implimentazzjoni, filwaqt li qieset iċ-ċirkostanzi lokali.

(7) Il-Kummissjoni kkumplimentat il-valutazzjoni tagħha bir-rieżami tal-abbozz tal-pjan ta’ prestazzjoni tal-FABEC fir-rigward tal-elementi stabbiliti fil-punt 2 tal-Anness IV ta’ dak ir-Regolament ta’ Implimentazzjoni. Fir-rigward tal-punt 2.1(d)(vii) tal-Anness IV tar-Regolament ta’ Implimentazzjoni (UE) 2019/317, il-Kummissjoni tinnota li ma wettqitx, bħala parti minn dak ir-rieżami, analiżi dettaljata tal-metodoloġija użata mill-Iżvizzera għall-allokazzjoni tal-kostijiet bejn is-servizzi en route u fit-terminal fl-RP4. Għalhekk, f’dan l-istadju, il-Kummissjoni ma waslet għall-ebda konklużjoni rigward il-konformità ta’ dik il-metodoloġija tal-allokazzjoni tal-kostijiet mal-punti (e) u (f) tal-Artikolu 15(2) tar-Regolament (KE) Nru 550/2004 tal-Parlament Ewropew u tal-Kunsill u mal-Artikolu 22(5) tar-Regolament ta’ Implimentazzjoni (UE) 2019/317.

(8) Din id-Deċiżjoni tkopri biss il-miri ta’ prestazzjoni u l-elementi stabbiliti fil-punt 2 tal-Anness IV tar-Regolament ta’ Implimentazzjoni (UE) 2019/317 li japplikaw direttament għall-fornitur tas-servizzi tan-navigazzjoni bl-ajru maħtur biex jipprovdi servizzi fl-ispazju tal-ajru tal-Iżvizzera.

SEJBIET MILL-VALUTAZZJONI

(9) Il-konsistenza tal-miri tal-prestazzjoni tal-kosteffiċjenza inklużi fl-abbozz tal-pjan ta’ prestazzjoni tal-FABEC fir-rigward tal-kost unitarju ddeterminat (DUC, Determined Unit Cost) għas-servizzi tan-navigazzjoni bl-ajru en route ġiet ivvalutata abbażi tal-kriterji stabbiliti fil-punti 1.4(a), (b) u (c) tal-Anness IV tar-Regolament ta’ Implimentazzjoni (UE) 2019/317. Dawk il-kriterji jikkonsistu mix-xejra tad-DUC matul l-RP4, mix-xejra fit-tul tad-DUC matul it-tielet perjodu referenzjarju (2020-2024) (RP3) u l-RP4 (2025-2029), u mill-valur bażi għad-DUC fil-livell taż-żona tal-imposti meta mqabbel mal-valur medju taż-żoni tal-imposti fejn il-fornituri tas-servizzi tan-navigazzjoni bl-ajru għandhom ambjent operazzjonali u ekonomiku simili.

(10) Il-miri tal-kosteffiċjenza en route proposti għaż-żona tal-imposti en route tal-Iżvizzera għall-RP4, u l-valuri ta’ referenza relatati, huma kif ġej: Żona tal-imposti en route tal-Iżvizzera Valur ta’ referenza tal-2019 Valur ta’ referenza tal-2024 2025 2026 2027 2028 2029 Il-miri u l-valuri ta’ referenza fil-qasam ewlieni ta’ prestazzjoni tal-kosteffiċjenza, espressi bħala kost unitarju ddeterminat (f’termini reali bil-prezzijiet tal-2022) CHF 110,08 CHF 124,74 CHF 131,82 CHF 133,17 CHF 131,03 CHF 128,63 CHF 129,42 EUR 109,54 EUR 124,13 EUR 131,17 EUR 132,51 EUR 130,39 EUR 128,00 EUR 128,79

(11) Fir-rigward tal-kriterju ta’ valutazzjoni stabbilit fil-punt 1.4(a) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra tad-DUC tal-Iżvizzera fil-livell taż-żona tal-imposti ta’ +0,7 % matul l-RP4 hija inqas mix-xejra għall-Unjoni kollha ta’ -1,2 % matul l-istess perjodu.

(12) Fir-rigward tal-valutazzjoni tal-kriterju stabbilit fil-punt 1.4(b) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li x-xejra fit-tul tad-DUC tal-Iżvizzera fil-livell taż-żona tal-imposti matul l-RP3 u l-RP4 ta’ +1,8 % hija inqas mix-xejra fit-tul għall-Unjoni kollha ta’ -1,0 % matul l-istess perjodu.

(13) Fir-rigward tal-kriterju ta’ valutazzjoni stabbilit fil-punt 1.4(c) tal-Anness IV tar-Regolament ta’ Implimentazzjoni (UE) 2019/317, il-Kummissjoni tosserva li l-valur ta’ referenza tad-DUC ta’ EUR 124,13 tal-Iżvizzera, espress f’termini reali fi prezzijiet tal-2022 (EUR2022) huwa 41,8 % ogħla mill-valur ta’ referenza medju ta’ EUR 87,51 f’EUR2022 tal-grupp komparatur rilevanti stabbilit fl-Artikolu 7, il-punt (e), tad-Deċiżjoni ta’ Implimentazzjoni (UE) 2024/1688.

(14) Jeħtieġ li jiġi eżaminat jekk id-devjazzjonijiet imsemmija fil-premessi (11), (12) u (13) jistgħux jitqiesu meħtieġa u proporzjonati f’konformità mal-punt 1.4 (d) tal-Anness IV tar-Regolament ta’ Implimentazzjoni (UE) 2019/317. B’hekk, il-Kummissjoni vvalutat jekk id-devjazzjonijiet osservati mix-xejra tad-DUC mal-Unjoni kollha u mix-xejra fit-tul tad-DUC mal-Unjoni kollha msemmija fil-premessi (11) u (12) jekk humiex esklużivament dovuti għal kostijiet iddeterminati addizzjonali relatati mal-miżuri meħtieġa biex jintlaħqu l-miri tal-prestazzjoni fil-qasam ewlieni tal-prestazzjoni tal-kapaċità jew għall-kostijiet tar-ristrutturar skont it-tifsira tal-Artikolu 2, il-punt (18), tar-Regolament ta’ Implimentazzjoni (UE) 2019/317.

(15) Fir-rigward tal-kriterju stabbilit fil-punt 1.4(d)(i) tal-Anness IV tar-Regolament ta’ Implimentazzjoni (UE) 2019/317, il-Kummissjoni tinnota li fl-abbozz tal-pjan ta’ prestazzjoni tal-FABEC, l-Iżvizzera tirreferi għall-kostijiet iddeterminati addizzjonali mġarrba matul l-RP4 mill-fornitur tas-servizzi tan-navigazzjoni bl-ajru Skyguide b’rabta mal-miżuri meħtieġa biex jintlaħqu l-miri tal-kapaċità (miżuri tal-kapaċità). Il-miżuri ta’ kapaċità ppreżentati jinkludu l-elementi ewlenin li ġejjin:

(15)

(a) it-taħriġ u r-reklutaġġ minn Skyguide ta’ kontrolluri ġodda tat-traffiku tal-ajru (ATCOs) biex jissostitwixxu l-ATCOs li mistennija jirtiraw matul l-RP4 u biex jakkomodaw it-tkabbir previst tat-traffiku. Dan huwa ppjanat li jirriżulta matul l-RP4 f’żieda ġenerali ta’ madwar 10 % tal-għadd ta’ ATCOs f’operazzjonijiet fiċ-ċentri ta’ kontroll taż-żona (ACCs) ta’ Ġinevra u Zurich;

(b) investimenti fl-infrastruttura u fis-sistemi biex tiġi appoġġata r-reżiljenza tal-operazzjonijiet, inklużi soluzzjonijiet addizzjonali ta’ kontinġenza u ta’ riżerva;

(c) titjib tekniku tas-sistema ta’ ġestjoni tat-traffiku tal-ajru li jippermetti kapaċità u effiċjenza akbar. Dan it-titjib se jappoġġa l-operazzjonijiet indipendenti mill-post fl-ACCs ta’ Ġinevra u Zurich, li jfisser li l-ispazju tal-ajru Żvizzeru kollu jista’ jiġi kkontrollat minn wieħed minn dawn l-ACCs;

(d) l-użu ta’ għodod għall-ottimizzazzjoni tal-ġestjoni tal-fluss tat-traffiku tal-ajru.

(16) Wara li kkunsidrat l-evalwazzjoni li saret mill-PRB, il-kostijiet addizzjonali rrapportati mill-Iżvizzera għall-miżuri ta’ kapaċità msemmija fil-premessa (15) huma ferm aktar baxxi f’termini monetarji mid-devjazzjonijiet osservati mix-xejriet tal-kosteffiċjenza mal-Unjoni kollha kkalkulati mill-PRB. Barra minn hekk, il-Kummissjoni tosserva li ċerti miżuri ta’ kapaċità invokati mill-Iżvizzera jistgħu jitqiesu bħala parti mill-operazzjonijiet normali tal-fornitur tas-servizzi tan-navigazzjoni bl-ajru kkonċernat jew jistgħu ma jikkontribwixxux direttament għat-titjib tal-kapaċità tal-ispazju tal-ajru. Għalhekk, mhuwiex possibbli li jiġi konkluż, mingħajr aktar informazzjoni u analiżi dettaljati, dwar jekk il-miżuri tal-kapaċità ppreżentati mill-Iżvizzera jistgħux jitqiesu, fl-intier tagħhom, meħtieġa u proporzjonati għall-ilħuq tal-miri tal-prestazzjoni tal-kapaċità lokali għall-RP4. Għalhekk, il-Kummissjoni tinnota li d-devjazzjonijiet osservati mix-xejriet tal-kosteffiċjenza mal-Unjoni kollha msemmija fil-premessi (11) u (12) ma jistgħux jiġu attribwiti esklużivament għall-kostijiet addizzjonali li jirriżultaw mill-miżuri ta’ kapaċità ppreżentati.

(17) Għalhekk, jenħtieġ li l-kriterju stabbilit fil-punt 1.4(d)(i) tal-Anness IV tar-Regolament ta’ Implimentazzjoni (UE) 2019/317 ma jitqiesx bħala ssodisfat fir-rigward tal-Iżvizzera.

(18) Barra minn hekk, il-Kummissjoni tinnota li l-Iżvizzera ma ppreżentat l-ebda miżura ta’ ristrutturar fl-abbozz tal-FABEC tal-pjan ta’ prestazzjoni li tiġġustifika devjazzjoni mix-xejra tad-DUC għall-Unjoni kollha jew mix-xejra tad-DUC fit-tul għall-Unjoni kollha skont il-kriterju stabbilit fil-punt 1.4(d)(ii) tal-Anness IV tar-Regolament ta’ Implimentazzjoni (UE) 2019/317.

(19) Abbażi tas-sejbiet fil-premessi (10) sa (18), il-miri ta’ prestazzjoni tal-kosteffiċjenza għaż-żona tal-imposti en route tal-Iżvizzera jenħtieġ li jitqiesu inkonsistenti mal-miri ta’ prestazzjoni għall-Unjoni kollha għall-RP4.

(20) F’konformità mal-punt 2.1(a) tal-Anness IV tar-Regolament ta’ Implimentazzjoni (UE) 2019/317, il-Kummissjoni kkomplementat il-valutazzjoni tagħha tal-abbozz tal-pjan ta’ prestazzjoni tal-FABEC billi rrieżaminat il-miżuri biex jintlaħqu l-miri ambjentali inklużi f’dak il-pjan.

(21) Abbażi tar-rieżami msemmija fil-premessa (20), il-Kummissjoni għandha dubji serji dwar jekk il-miżuri ppreżentati mill-Iżvizzera u l-Istati Membri tal-UE li huma parti mill-FABEC għall-kisba tal-miri tal-prestazzjoni ambjentali tal-FABEC humiex adegwati biex jippermettu li dawk il-miri jintlaħqu b’mod effettiv. Wara li kkunsidrat is-sejbiet tal-PRB, il-Kummissjoni tosserva, b’mod partikolari, li l-miżuri ppreżentati minn Franza fir-rigward tal-fornitur tas-servizzi tan-navigazzjoni bl-ajru DSNA mhumiex biżżejjed biex jippermettu t-titjib immirat fl-effiċjenza tat-titjir fl-RP4.

(22) Għalhekk, il-Kummissjoni tqis li l-FABEC jenħtieġ li jistabbilixxi miżuri addizzjonali għall-ilħuq tal-miri ambjentali tagħha għall-RP4, pereżempju permezz tal-implimentazzjoni effettiva tal-ispazju tal-ajru b’rotot liberi u l-implimentazzjoni ta’ spazju tal-ajru transfruntier b’rotot ħielsa ma’ Stati Membri ġirien addizzjonali.

(23) F’konformità mal-punt 2.1(a) tal-Anness IV tar-Regolament ta’ Implimentazzjoni (UE) 2019/317, il-Kummissjoni kkomplementat il-valutazzjoni tagħha tal-abbozz tal-pjan ta’ prestazzjoni tal-FABEC billi rrieżaminat il-miżuri biex jintlaħqu l-miri tal-kapaċità en route inklużi f’dak il-pjan.

(24) Abbażi tar-rieżami msemmi fil-premessa (23), il-Kummissjoni għandha dubji serji dwar jekk il-miżuri ppreżentati mill-Iżvizzera u l-Istati Membri tal-UE li huma parti mill-FABEC għall-kisba tal-miri tal-prestazzjoni tal-kapaċità en route tal-FABEC humiex adegwati biex jippermettu li dawk il-miri jintlaħqu b’mod effettiv. Wara li kkunsidrat is-sejbiet tal-PRB, il-Kummissjoni tosserva, b’mod partikolari, li l-miżuri ppreżentati mill-Ġermanja fir-rigward tal-fornitur tas-servizzi tan-navigazzjoni bl-ajru DFS mhumiex biżżejjed biex jjilħqu b’mod effettiv id-domanda ta’ traffiku fl-RP4.

(25) Għalhekk, il-Kummissjoni tqis li l-Iżvizzera u l-Istati Membri tal-UE li huma parti mill-FABEC jenħtieġ li jistabbilixxu miżuri addizzjonali għall-ilħuq tal-miri tal-kapaċità tagħha għall-RP4, pereżempju fir-rigward tat-taħriġ u r-reklutaġġ ta’ ATCOs addizzjonali, użu aktar effiċjenti tar-riżorsi, u arranġamenti ta’ kooperazzjoni bejn il-fornituri tas-servizzi tan-navigazzjoni bl-ajru.

(26) F’konformità mal-punt 2.1(b) tal-Anness IV tar-Regolament ta’ Implimentazzjoni (UE) 2019/317, il-Kummissjoni kkumplimentat il-valutazzjoni tagħha tal-abbozz tal-pjan ta’ prestazzjoni billi rrieżaminat il-miri ta’ prestazzjoni tal-kapaċità għas-servizzi tan-navigazzjoni bl-ajru fit-terminal stabbiliti mill-Iżvizzera fir-rigward l-ajruporti msemmija fl-Artikoli 1(3) u (4) ta’ dak ir-Regolament ta’ Implimentazzjoni. Instab li dawk il-miri jagħtu lok għal tħassib.

(27) L-ewwel nett, il-Kummissjoni tinnota li l-miri tal-kapaċità fit-terminal proposti tal-Iżvizzera għall-RP4 iwasslu għal deterjorament tad-dewmien medju tal-ATFM tal-wasla kull sena meta mqabbel mal-RP3. Tabilħaqq, il-miri proposti tal-RP4 huma stabbiliti għal 1,60 minuta għal kull titjira, filwaqt li l-prestazzjoni reali rreġistrata fl-RP3 kienet tvarja minn 0,37 sa 1.50 minuta għal kull titjira.

(28) It-tieni, meta tqassam il-miri tal-kapaċità fit-terminal fil-livell tal-ajruporti, instab li dawk il-miri tal-kapaċità fit-terminal jirriżultaw f’livell ferm agħar ta’ dewmien tal-ATFM għal kull titjira għall-ajruporti ta’ Zurich u ta’ Ġinevra mil-livell ta’ prestazzjoni ta’ ajruporti simili identifikat mill-PRB.

(29) Għalhekk, il-Kummissjoni tqis li l-Iżvizzera jenħtieġ li tiġġustifika aktar il-miri tal-kapaċità fit-terminal għall-RP4 fid-dawl tal-osservazzjonijiet stabbiliti fil-premessi (27) u (28), jew jenħtieġ li tirrevedi ’l isfel dawk il-miri.

(30) F’konformità mal-punt 2.1(c) tal-Anness IV tar-Regolament ta’ Implimentazzjoni (UE) 2019/317, il-Kummissjoni kkumplimentat il-valutazzjoni tagħha tal-abbozz tal-pjan ta’ prestazzjoni billi rrieżaminat il-miri ta’ prestazzjoni tal-kost-effiċjenza għas-servizzi tan-navigazzjoni bl-ajru fit-terminal stabbiliti mill-Iżvizzera rigward l-ajruporti msemmija fl-Artikoli 1(3) u (4) ta’ dak ir-Regolament ta’ Implimentazzjoni.

(31) Il-Kummissjoni tinnota li l-miri tal-kosteffiċjenza għaż-żona tal-imposti fit-terminal tal-Iżvizzera jwasslu għal xejra tad-DUC li qed tiddeterjora ta’ + 1.0 % matul l-RP4. Barra minn hekk, instab li d-DUC medju għall-RP4 tas-servizzi tan-navigazzjoni bl-ajru fit-terminal fl-ajruporti ta’ Zurich u Ġinevra huwa stmat li huwa ogħla, b’marġni sinifikanti, mid-DUC medjan tal-ajruporti simili identifikati mill-PRB.

(32) Għalhekk, il-Kummissjoni tqis li l-Iżvizzera jenħtieġ li tiġġustifika aktar il-miri tal-kapaċità fit-terminal għall-RP4 fid-dawl tal-osservazzjonijiet stabbiliti fil-premessi (31) u, jew jenħtieġ li tirrevedi ’l isfel dawk il-miri.

(33) F’konformità mal-punt 2.1(f) tal-Anness IV tar-Regolament ta’ Implimentazzjoni (UE) 2019/317, il-Kummissjoni rrieżaminat l-iskemi ta’ inċentivi inklużi fl-abbozz tal-pjan ta’ prestazzjoni tal-FABEC għall-fini tal-apoġġ biex jinkisbu l-miri ta’ prestazzjoni (“skemi ta’ inċentivi tal-kapaċità). Instab li l-iskemi ta’ inċentivi tal-kapaċità għall-RP4 stabbiliti mill-Iżvizzera għas-servizzi en route u fit-terminal jagħtu lok għal tħassib.

(34) Il-Kummissjoni tinnota li l-iskema ta’ inċentivi tal-kapaċità en route tal-FABEC u l-iskema ta’ inċentivi tal-kapaċità fit-terminal tal-Iżvizzera, kif stabbilit fl-abbozz tal-pjan ta’ prestazzjoni tal-FABEC, jinkludu żvantaġġ finanzjarju massimu li jammonta biss għal 0.50 % tal-kostijiet iddeterminati. Wara li kkunsidrat il-parir espert ipprovdut mill-PRB, il-Kummissjoni tqis li l-iżvantaġġi finanzjarji massimi għal dawk l-iskemi ta’ inċentivi ma jikkonformawx mal-Artikolu 11(3), il-punt (a), tar-Regolament ta’ Implimentazzjoni (UE) 2019/317, li jirrikjedi li tali skemi ta’ inċentivi jkollhom impatt materjali fuq id-dħul f’riskju.

(35) Għalhekk, jenħtieġ li l-Iżvizzera, fir-rigward tal-abbozz tal-pjan ta’ prestazzjoni tal-FABEC, tirrevedi l-iskemi ta’ inċentivi tal-kapaċità tagħha msemmija fil-premessa (34) sabiex l-iżvantaġġi finanzjarji massimi li jirriżultaw minn dawk l-iskemi ta’ inċentivi jiġu stabbiliti f’livell li jkollu impatt materjali fuq id-dħul f’riskju, kif meħtieġ mill-Artikolu 11(3), il-punt (a), tar-Regolament ta’ Implimentazzjoni (UE) 2019/317. Fil-fehma tal-Kummissjoni dik ir-reviżjoni jenħtieġ li twassal għal żvantaġġ finanzjarju massimu ugwali jew ogħla minn 1 % tal-kostijiet iddeterminati.

KONKLUŻJONIJIET

(36) Fid-dawl ta’ dan kollu, jenħtieġ li ċerti miri ta’ prestazzjoni inklużi fl-abbozz tal-pjan ta’ prestazzjoni tal-FABEC fir-rigward tal-Iżvizzera ma jitqisux konsistenti mal-miri ta’ prestazzjoni għall-Unjoni kollha għall-RP4.

(37) Għalhekk, f’konformità mal-Artikolu 14(3), it-tieni subparagrafu tar-Regolament ta’ Implimentazzjoni (UE) 2019/317, l-Iżvizzera u l-Istati Membri tal-FABEC iridu jissottomettu l-abbozz tal-pjan ta’ prestazzjoni rivedut tagħhom lill-Kummissjoni fi żmien tliet xhur mid-data tal-adozzjoni ta’ din id-Deċiżjoni, filwaqt li jqisu r-rakkomandazzjonijiet imressqa mill-Kummissjoni.

(38) Il-Kummissjoni kkonsultat lill-Iżvizzera dwar ir-rakkomandazzjonijiet stabbiliti f’din id-Deċiżjoni, f’konformità mal-Artikolu 19(2) tal-Ftehim bejn il-Komunità Ewropea u l-Konfederazzjoni Żvizzera dwar it-Trasport bl-Ajru,

ADOTTAT DIN ID-DEĊIŻJONI:

Artikolu 1 Il-miri tal-prestazzjoni fir-rigward tal-Iżvizzera elenkati fl-Anness ta’ din id-Deċiżjoni, li huma inklużi fl-abbozz tal-pjan tal-prestazzjoni tal-Blokk tal-Ispazju tal-Ajru Funzjonali tal-Ewropa Ċentrali huma inkonsistenti mal-miri tal-prestazzjoni mal-Unjoni kollha għar-raba’ perjodu referenzjarju stabbiliti fid-Deċiżjoni ta’ Implimentazzjoni tal-Kummissjoni (UE) 2024/1688.

Artikolu 2 L-Iżvizzera għandha tirrevedi ’l isfel il-miri tal-kosteffiċjenza stabbiliti għaż-żona tal-imposti en route tagħha, espressi bħala kost unitarju ddeterminat (DUC, determined unit cost). Meta tirrevedi l-miri tal-kosteffiċjenza tagħha, l-Iżvizzera għandha: Jekk l-Iżvizzera tinvoka fl-abbozz rivedut tal-pjan ta’ prestazzjoni li għandu jiġi ppreżentat f’konformità mal-Artikolu 14(3), it-tieni subparagrafu, tar-Regolament ta’ Implimentazzjoni (UE) 2019/317 devjazzjoni skont il-punt 1.4 (d) tal-Anness IV ta’ dak ir-Regolament ta’ Implimentazzjoni, hija għandha tiżgura li tali devjazzjoni tkun sostanzjata b’informazzjoni u ġustifikazzjonijiet adegwati. B’mod partikolari, l-Iżvizzera għandha turi li kwalunkwe miżura invokata biex tiġġustifika devjazzjoni mill-miri tal-kosteffiċjenza għall-Unjoni kollha tkun relatata biss ma’ riżorsi operazzjonali jew kapaċitajiet tekniċi addizzjonali meħtieġa biex jintlaħqu l-miri tal-kapaċità.

Artikolu 2

(a) tiżgura li l-miri riveduti tal-kosteffiċjenza jkunu konsistenti kemm max-xejra tad-DUC mal-Unjoni kollha kif ukoll max-xejra fit-tul tad-DUC mal-Unjoni kollha, imsemmija, rispettivament, fil-punt 1.4(a) u (b) tal-Anness IV tar-Regolament ta’ Implimentazzjoni (UE) 2019/317;

(b) inaqqsu l-livell tal-kostijiet iddeterminati skont dan, partikolarment fir-rigward tas-sena kalendarja 2029;

(c) jużaw l-aktar tbassir tat-traffiku riċenti, espress f’unitajiet ta’ servizz, f’konformità mal-Artikolu 10(2) tar-Regolament ta’ Implimentazzjoni (UE) 2019/317.

Artikolu 3 Din id-Deċiżjoni hija indirizzata lill-Konfederazzjoni Żvizzera.

Magħmul fi Brussell, is-16 ta’ Mejju 2025. Għall-Kummissjoni Apostolos Tzitzikostas Membru tal-Kummissjoni

ANNEX

ANNESS

Miri tal-prestazzjoni li nstabu inkonsistenti mal-miri tal-prestazzjoni għall-Unjoni kollha għar-raba’ perjodu ta’ referenza IL-QASAM EWLIENI TA’ PRESTAZZJONI TAL-KOSTEFFIĊJENZA

Żona tal-imposti en route tal-Iżvizzera Valur ta’ referenza tal-2019 Valur ta’ referenza tal-2024 2025 2026 2027 2028 2029 Il-miri u l-valuri ta’ referenza fil-qasam ewlieni ta’ prestazzjoni tal-kosteffiċjenza, espressi bħala kost unitarju ddeterminat (f’termini reali bil-prezzijiet tal-2022) CHF 110,08 CHF 124,74 CHF 131,82 CHF 133,17 CHF 131,03 CHF 128,63 CHF 129,42 EUR 109,54 EUR 124,13 EUR 131,17 EUR 132,51 EUR 130,39 EUR 128,00 EUR 128,79

Versions

1. 2025-05-16