Not the law itself: Notice

Address https://gelex.eu/eli/EU/notice/C/2025/650/oj@2025-01-21/mt

Contents

1. Preamble
2. (17) Tabella 1: Perkors tan-nefqa netta u suppożizzjonijiet ewlenin fil-pjan tal-Lussemburgu
3. (18) Tabella 2: Dejn tal-gvern estiż u żviluppi tal-bilanċ fil-pjan tal-Lussemburgu
4. ANNEX
5. ANNESS I Rati massimi ta' tkabbir tan-nefqa netta (rati ta' tkabbir annwali u kumulattivi, f'termini nominali)
6. Lussemburgu

Il-KUNSILL TAL-UNJONI EWROPEA,

Wara li kkunsidra t-Trattat dwar il-Funzjonament tal-Unjoni Ewropea, u b'mod partikolari l-Artikolu 121 tiegħu,

Wara li kkunsidra r-Regolament (UE) 2024/1263, u b'mod partikolari l-Artikolu 17 tiegħu,

Wara li kkunsidra r-rakkomandazzjoni tal-Kummissjoni,

Billi:

(1) Fit-30 ta' April 2024 daħal fis-seħħ qafas ta' governanza ekonomika tal-UE riformat. Ir-Regolament (UE) 2024/1263 tal-Parlament Ewropew u tal-Kunsill dwar il-koordinazzjoni effettiva tal-politiki ekonomiċi u dwar is-sorveljanza baġitarja multilaterali, flimkien mar-Regolament emendat (KE) Nru 1467/97 dwar l-implimentazzjoni tal-proċedura ta' defiċit eċċessiv, u d-Direttiva emendata tal-Kunsill 2011/85/UE dwar l-oqfsa baġitarji tal-Istati Membri huma l-elementi ewlenin tal-qafas riformat ta' governanza ekonomika tal-UE. Il-qafas għandu l-għan li jippromwovi finanzi pubbliċi sodi u sostenibbli, u tkabbir sostenibbli u inklużiv u r-reżiljenza permezz ta' riformi u investimenti, u li jipprevjeni defiċits eċċessivi tal-gvern. Huwa jippromwovi wkoll is-sjieda nazzjonali u jiffoka aktar fuq terminu medju, flimkien ma' infurzar aktar effettiv u koerenti tar-regoli.

(2) Il-pjanijiet fiskali-strutturali nazzjonali fuq terminu medju li l-Istati Membri jippreżentaw lill-Kunsill u lill-Kummissjoni huma fiċ-ċentru tal-qafas il-ġdid ta' governanza ekonomika. Il-pjanijiet għandhom jimmiraw li jintlaħqu żewġ objettivi: i) l-iżgurar li, fost l-oħrajn, sa tmiem il-perjodu ta' aġġustament, id-dejn tal-gvern estiż ikun fuq trajettorja ta' tnaqqis plawżibbli, jew jibqa' f'livelli prudenti, u li d-defiċit tal-gvern jinġieb u jinżamm taħt il-valur referenzjarju ta' 3 % tal-PDG fuq it-terminu medju, u ii) l-iżgurar tat-twettiq ta' riformi u investimenti li jirrispondu għall-isfidi ewlenin identifikati fil-kuntest tas-Semestru Ewropew u li jindirizzaw il-prijoritajiet komuni tal-UE. Għal dak il-għan, kull pjan għandu jippreżenta impenn fuq terminu medju għal perkors tan-nefqa netta, li effettivament jistabbilixxi restrizzjoni baġitarja għad-durata tal-pjan, li tkopri erba' jew ħames snin (skont it-terminu regolari tal-leġiżlatura fi Stat Membru). Barra minn hekk, il-pjan għandu jispjega kif l-Istat Membru ser jiżgura t-twettiq ta' riformi u investimenti li jirrispondu għall-isfidi ewlenin identifikati fil-kuntest tas-Semestru Ewropew, b'mod partikolari fir-rakkomandazzjonijiet speċifiċi għall-pajjiż (inkluż dawk li jappartjenu għall-proċedura ta' żbilanċi makroekonomiċi (MIP), jekk applikabbli), u kif l-Istat Membru ser jindirizza l-prijoritajiet komuni tal-Unjoni. Il-perjodu għall-aġġustament fiskali jkopri perjodu ta' erba' snin, li jista' jiġi estiż sa tliet snin jekk l-Istat Membru jintrabat li jwettaq sett ta' riformi u investimenti rilevanti li jissodisfa l-kriterji stabbiliti fir-Regolament (UE) 2024/1263.

(3) Wara l-preżentazzjoni tal-pjan, il-Kummissjoni trid tivvaluta jekk jikkonformax mar-rekwiżiti tar-Regolament (UE) 2024/1263.

(4) Fuq rakkomandazzjoni mill-Kummissjoni, il-Kunsill irid imbagħad jadotta rakkomandazzjoni biex jistabbilixxi l-perkors tan-nefqa netta tal-Istat Membru kkonċernat u, fejn applikabbli, japprova s-sett ta' impenji ta' riforma u ta' investiment li jirfdu estensjoni tal-perjodu ta' aġġustament fiskali.

(5) Fil-15 ta' Ottubru 2024, il-Lussemburgu ppreżenta l-pjan fiskali-strutturali nazzjonali fuq terminu medju tiegħu lill-Kunsill u lill-Kummissjoni. Il-preżentazzjoni saret wara estensjoni tal-iskadenza stabbilita fl-Artikolu 36 tar-Regolament (UE) 2024/1263, kif miftiehem mal-Kummissjoni fid-dawl tar-raġunijiet mogħtija mil-Lussemburgu.

(6) Il-Lussemburgu kien eliġibbli biex jirċievi informazzjoni teknika f'konformità mal-Artikolu 9(3) tar-Regolament (UE) 2024/1263 iżda ma talabhiex. Fil-21 ta' Ġunju 2024, il-Kummissjoni pprovdiet lil-Lussemburgu l-kundizzjonijiet inizjali ewlenin u s-suppożizzjonijiet sottostanti użati fil-qafas tal-projezzjoni tad-dejn tal-gvern fuq terminu medju tal-Kummissjoni, kif imsemmi fil-Premessa (25) tar-Regolament (UE) 2024/1263, u ppubblikathom fil-15 ta' Ottubru 2024.

(7) F'konformità mal-Artikolu 12 tar-Regolament (UE) 2024/1263, il-Lussemburgu u l-Kummissjoni kienu involuti fi djalogu tekniku f'Settembru 2024. Id-djalogu ffoka fuq is-suppożizzjonijiet sottostanti (b'mod partikolari t-tkabbir potenzjali u d-deflatur tal-PDG), kif ukoll fuq it-twettiq previst ta' riformi u investimenti li jirrispondu għall-isfidi ewlenin identifikati fil-kuntest tas-Semestru Ewropew u l-prijoritajiet komuni tal-Unjoni fit-tranżizzjoni ekoloġika u diġitali ġusta, ir-reżiljenza soċjali u ekonomika, is-sigurtà tal-enerġija u l-bini tal-kapaċitajiet ta' difiża.

(8) F'konformità mal-Artikolu 11(3) u 36(1), il-punt (c) tar-Regolament (UE) 2024/1263, skont l-informazzjoni pprovduta mil-Lussemburgu fil-pjan tiegħu, il-Lussemburgu involva ruħu regolarment fi proċess ta' konsultazzjoni mas-sħab soċjali fil-kuntest tas-Semestru Ewropew. Skont l-informazzjoni pprovduta mil-Lussemburgu fil-pjan tiegħu, f'Lulju 2024, fl-aktar laqgħa reċenti mas-sħab soċjali, l-iskambji kienu dwar ir-Rapport tal-pajjiż tal-2024 għal-Lussemburgu, ir-rakkomandazzjonijiet speċifiċi għall-pajjiż tal-2024 u l-modifiki relatati mal-qafas il-ġdid ta' governanza ekonomika.

(9) Il-pjan ġie ppreżentat lill-parlament nazzjonali fil-15 ta' Ottubru.

(10) Fil-15 ta' Ottubru, il-Lussemburgu ppreżenta l-Abbozz ta' Pjan Baġitarju għas-sena 2025. Il-Kummissjoni adottat opinjoni dwar dan l-Abbozz ta' Pjan Baġitarju fis-26 ta' Novembru 2024.

(11) Fil-21 ta' Ottubru 2024, il-Kunsill indirizza lil-Lussemburgu sensiela ta' rakkomandazzjonijiet speċifiċi għall-pajjiż (CSRs) fil-kuntest tas-Semestru Ewropew.

(12) F'konformità mal-Artikolu 16 tar-Regolament (UE) 2024/1263, il-Kummissjoni vvalutat il-pjan kif ġej:

(13) L-attività ekonomika fil-Lussemburgu naqset b'1,1 % fl-2023, xprunata minn kontribuzzjoni negattiva għat-tkabbir tal-esportazzjonijiet netti u tnaqqis fl-investiment. Skont it-Tbassir tal-Ħarifa 2024 tal-Kummissjoni Ewropea, l-ekonomija mistennija tikber b'1,2 % fl-2024, minħabba żieda fid-domanda domestika u kontribuzzjoni pożittiva mill-esportazzjonijiet netti. Fl-2025, il-PDG reali mistenni jiżdied bi 2,3 %, appoġġat minn pożizzjoni fiskali espansjonarja, rati tal-imgħax li qed jonqsu -li jirfdu l-investiment-, u t-titjib tal-ambjent estern. Fl-2026, il-PDG reali mistenni jiżdied bi 2,2 %, peress li l-momentum mistenni jiddgħajjef minħabba domanda domestika aktar baxxa. Matul il-perjodu ta' tbassir (jiġifieri, 2024–2026), it-tkabbir tal-PDG potenzjali fil-Lussemburgu mistenni jilħaq l-ogħla livell ta' tkabbir annwali ta' 2,0 %, minħabba tnaqqis fil-popolazzjoni fl-età tax-xogħol u fis-sigħat medji tax-xogħol. Ir-rata tal-qgħad kienet ta' 5,2 % fl-2023, u hija pprojettata mill-Kummissjoni li tammonta għal 6,0 % fl-2024, 6,0 % fl-2025 u 5,8 % fl-2026. L-inflazzjoni (deflatur tal-PDG) ipprojettata li tiżdied minn 3,4 % fl-2023 għal 3,9 % fl-2024, u li tilħaq 3,0 % fl-2025 u 2,9 % fl-2026.

(14) Rigward l-iżviluppi fiskali, fl-2023 id-defiċit tal-gvern estiż tal-Lussemburgu kien jammonta għal 0,7 % tal-PDG. Skont it-Tbassir tal-Ħarifa 2024 tal-Kummissjoni Ewropea, huwa mistenni jonqos għal defiċit ta' 0,6 % tal-PDG fl-2024 u li jiżdied għal 0,8 % tal-PDG fl-2025 u, fuq bażi ta' ebda bidla fil-politika, li jonqos għal 0,6 % fl-2026. It-Tbassir tal-Ħarifa 2024 tal-Kummissjoni Ewropea jinkludi l-abbozz ta' baġit tal-Lussemburgu għall-2025 li l-gvern ippropona lill-parlament nazzjonali f'Ottubru. Id-dejn tal-gvern estiż kien ta' 25,5 % tal-PDG fi tmiem l-2023. Skont it-Tbassir tal-Ħarifa 2024 tal-Kummissjoni Ewropea, il-proporzjon tad-dejn mistenni jiżdied għal 27,5 % tal-PDG fi tmiem l-2024. Huwa pprojettat li jistabbilizza b'mod ġenerali għal 27,6 % tal-PDG fi tmiem l-2025 u għal 27,5 % tal-PDG sa tmiem l-2026. It-tbassir fiskali mill-Kummissjoni ma jqisx l-impenji ta' politika fil-pjanijiet fuq terminu medju bħala tali sakemm ma jkunux miżuri ta' politika konkreti mirfuda, imħabbra b'mod kredibbli, u speċifikati biżżejjed.

(15) Il-pjan fiskali-strutturali nazzjonali fuq terminu medju tal-Lussemburgu jkopri l-perjodu 2025–2029 u jippreżenta aġġustament fiskali fuq erba' snin.

(16) Il-pjan fih l-informazzjoni meħtieġa mill-Artikolu 13 tar-Regolament (UE) 2024/1263.

(17) Tabella 1: Perkors tan-nefqa netta u suppożizzjonijiet ewlenin fil-pjan tal-Lussemburgu

Il-pjan jimpenja ruħu għall-perkors tan-nefqa netta indikat fit-Tabella 1, li jikkorrispondi għal tkabbir medju tan-nefqa netta ta' 4,9 % matul is-snin 2025-2029. Il-perkors tan-nefqa netta impenjat fil-pjan huwa rrapportat li jwassal għal bilanċ primarju strutturali ta' 0,4 % tal-PDG fi tmiem il-perjodu ta' aġġustament (2028). Il-pjan jassumi li t-tkabbir tal-PDG potenzjali jiżdied b'mod kostanti minn 1,5 % fl-2024 għal 2,1 % fl-2029. Barra minn hekk, il-pjan jistenna li r-rata ta' tkabbir tad-deflatur tal-PDG tiżdied minn 1,7 % fl-2024 għal 3,1 % fl-2025 u fl-2026, li mbagħad tmiss il-qiegħ f'livell ta' 1,9 % fl-2027 qabel ma terġa' lura għal madwar 2,5 % fl-2028 u fl-2029. Sors: Il-pjan fiskali-strutturali fuq terminu medju tal-Lussemburgu u l-kalkoli tal-Kummissjoni. 2024 2025 2026 2027 2028 2029 Medja matul il-perjodu ta' validità tal-pjan 2025–2029 Medja matul il-perjodu ta' aġġustament 2025–2028 Tkabbir nett fin-nefqa (annwali, %) 8,0 5,8 4,7 3,8 5,4 4,7 4,9 4,9 Tkabbir nett fin-nefqa (kumulattiv, mis-sena bażi 2023, %) 8,0 14,2 19,6 24,1 30,8 36,9 mhux applikabbli mhux applikabbli Tkabbir tal-PDG potenzjali (%) 1,5 1,7 1,8 1,9 2,0 2,1. 1,9 1,9 Inflazzjoni (tkabbir tad-deflatur tal-PDG) (%) 1,7 3,1 3,1 1,9 2,6 2,5 2,6 2,7

(18) Tabella 2: Dejn tal-gvern estiż u żviluppi tal-bilanċ fil-pjan tal-Lussemburgu

Jekk jimmaterjalizzaw il-perkors tan-nefqa netta impenjat fil-pjan u s-suppożizzjonijiet sottostanti, id-dejn tal-gvern estiż, skont il-pjan, jonqos gradwalment minn 27,5 % fl-2024 għal 26,0 % tal-PDG fi tmiem il-perjodu ta' aġġustament (2028), skont it-tabella li ġejja. Wara l-aġġustament, fuq terminu medju (jiġifieri sal-2038), il-proporzjon tad-dejn huwa pprojettat jonqos gradwalment skont il-pjan u li jmiss il-qiegħ fl-2032, f'livell ta' 25,4 % tal-PDG, qabel ma jibda jiżdied gradwalment u jilħaq l-ogħla livell ta' 26 % tal-PDG sal-2038. Sors: Pjan fiskali-strutturali fuq terminu medju tal-Lussemburgu. 2023 2024 2025 2026 2027 2028 2029 2038 Dejn tal-gvern (% tal-PDG) 25,5 27,5 27,5 27,2 26,7 26,0 25,6 26,0 Bilanċ tal-gvern (% tal-PDG) -0,7 -0,6 -0,6 -0,5 -0,3 -0,4 -0,2 -2,1 Għalhekk, skont il-pjan, id-dejn tal-gvern estiż jibqa' taħt il-valur referenzjarju tat-Trattat ta' 60 % tal-PDG fuq it-terminu medju. Għalhekk, abbażi tal-impenji ta' politika u s-suppożizzjonijiet makroekonomiċi tal-pjan, il-perkors tan-nefqa netta ppreżentat fil-pjan huwa konsistenti mar-rekwiżit għad-dejn stabbilit fl-Artikolu 16(2) tar-Regolament (UE) 2024/1263.

(19) Abbażi tal-perkors u s-suppożizzjonijiet tan-nefqa netta tal-pjan, id-defiċit tal-gvern estiż jonqos minn 0,6 % fl-2025 għal 0,4 % tal-PDG fl-2028. Għalhekk, skont il-pjan, il-bilanċ tal-gvern estiż ma jaqbiżx il-valur referenzjarju ta' 3 % tal-PDG fi tmiem il-perjodu ta' aġġustament (2028). Barra minn hekk, fl-għaxar snin ta' wara l-perjodu ta' aġġustament (jiġifieri sal-2038), id-defiċit tal-gvern ma jaqbiżx it-3 % tal-PDG. Għalhekk, abbażi tal-impenji ta' politika u s-suppożizzjonijiet makroekonomiċi tal-pjan, il-perkors tan-nefqa netta ppreżentat fil-pjan huwa konsistenti mar-rekwiżit għad-defiċit kif stabbilit fl-Artikolu 16(2).

(20) Il-pjan huwa bbażat fuq sett ta' suppożizzjonijiet li huma differenti mis-suppożizzjonijiet tal-Kummissjoni trażmessi lil-Lussemburgu fil-21 ta' Ġunju 2024. B'mod partikolari, il-pjan juża suppożizzjonijiet differenti għal seba' varjabbli, jiġifieri l-punt tat-tluq (il-bilanċ primarju strutturali fl-2024), it-tkabbir tal-PDG potenzjali, it-tkabbir tad-deflatur tal-PDG, l-aġġustament bejn il-fondi u l-flussi, il-PDG reali, ir-rata tal-imgħax impliċita nominali, u l-għeluq tad-distakk fl-output. Valutazzjoni bir-reqqa ta' dawn id-differenzi fis-suppożizzjonijiet hija meħtieġa biex jiġi żgurat li dawn ikunu sostnuti minn argumenti ekonomiċi sodi u mmexxija mid-data, speċjalment peress li t-tkabbir medju tan-nefqa netta li jinsab fil-pjan huwa inqas eżiġenti minn dak li jirriżulta mill-użu tas-suppożizzjonijiet tal-Kummissjoni. Id-differenzi fis-suppożizzjonijiet bl-aktar impatt sinifikanti fuq it-tkabbir medju tan-nefqa netta huma elenkati hawn taħt, flimkien ma' valutazzjoni ta' kull differenza kkunsidrata b'mod iżolat. Id-differenzi li jifdal ma għandhomx impatt sinifikanti fuq it-tkabbir tan-nefqa netta medja meta mqabbel mas-suppożizzjonijiet tal-Kummissjoni. B'mod ġenerali, id-differenzi kollha meħuda flimkien iwasslu għal limitu massimu teoretiku medju għat-tkabbir tan-nefqa netta li huwa ogħla minn dak li jkun meħtieġ abbażi tas-suppożizzjonijiet tal-Kummissjoni tar-Rebbiegħa 2024. Fil-pjan tiegħu l-Lussemburgu jimpenja ruħu għal perkors tan-nefqa netta li huwa aktar baxx minn dan il-limitu massimu teoretiku. Il-Kummissjoni ser tqis il-valutazzjoni ta' hawn fuq tas-suppożizzjonijiet tal-pjan f'valutazzjonijiet futuri tal-konformità mal-perkors tan-nefqa netta.

Il-pjan jassumi li l-bilanċ primarju strutturali jkun ta' surplus ta' +1,1 % tal-PDG fl-2024 meta mqabbel ma' surplus ta' +0,1 % tal-PDG fl-2024 abbażi tas-suppożizzjonijiet tal-Kummissjoni trażmessi lil-Lussemburgu fil-21 ta' Ġunju 2024. Il-pożizzjoni inizjali aħjar minn dik preżunta fl-2024 hija mirfuda minn data fiskali aktar reċenti, fejn il-pjan jassumi li l-bilanċ tal-gvern estiż ikun ta' defiċit ta' -0,6 % tal-PDG fl-2024 meta mqabbel mas-suppożizzjoni ta' defiċit ta' -1,7 % tal-PDG fl-2024 trażmess lil-Lussemburgu fil-21 ta' Ġunju. Dan huwa konformi mat-tbassir tal-Ħarifa 2024 tal-Kummissjoni Ewropea. Konsegwentement, din is-suppożizzjoni titqies li hija debitament ġustifikata.

Il-pjan jassumi tkabbir fid-deflatur tal-PDG f'medja ta' 2,7 % matul il-perjodu ta' aġġustament meta mqabbel mas-suppożizzjoni ta' tkabbir medju ta' 2,5 % trażmess lil-Lussemburgu fil-21 ta' Ġunju. Il-projezzjonijiet għat-tkabbir tad-deflatur tal-PDG użati fil-pjan ġew prodotti mill-uffiċċju nazzjonali tal-istatistika tal-Lussemburgu (STATEC) u huma bbażati fuq data makroekonomika aktar reċenti. Il-projezzjonijiet kemm għall-2025 kif ukoll għall-2026 jidhru li huma plawżibbli. Konsegwentement, din is-suppożizzjoni titqies li hija debitament ġustifikata.

(21) Skont l-istrateġija fiskali indikattiva fil-pjan, l-impenji għan-nefqa netta ser jitwettqu prinċipalment billi jitrażżan it-tkabbir fin-nefqa u jiġi żgurat li t-tkabbir fid-dħul jibqa' ogħla mit-tkabbir tan-nefqa. L-ispeċifikazzjoni preċiża tal-miżuri ta' politika rilevanti trid tiġi kkonfermata jew aġġustata u kkwantifikata fil-baġits annwali. Fl-istess ħin, hemm riskji għall-implimentazzjoni tal-istrateġija fiskali indikattiva fil-pjan, li jirriżultaw mill-informazzjoni dwar il-miżuri speċifiċi li jirfdu l-istrateġija fiskali li ma tkunx dettaljata bis-sħiħ fil-pjan. Barra minn hekk, l-Abbozz ta' Pjan Baġitarju għall-2025 jispeċifika li t-tkabbir fin-nefqa netta mistenni jonqos fir-rigward tat-tnaqqis fil-pressjoni fuq il-prezzijiet, li huwa fattur importanti fid-determinazzjoni tat-tkabbir fin-nefqa fil-Lussemburgu, minħabba l-mekkaniżmu ta' indiċjar awtomatiku għall-inflazzjoni li japplika għal sehem kbir tan-nefqa pubblika.

(22) Il-pjan jiddeskrivi l-intenzjonijiet ta' politika li jikkonċernaw ir-riformi u l-investimenti biex jiġu indirizzati l-isfidi ewlenin identifikati fil-kuntest tas-Semestru Ewropew, speċjalment is-CSRs, u biex jiġu indirizzati l-prijoritajiet komuni tal-UE. Il-pjan jinkludi qrib id-90 riforma u investiment, li minnhom aktar minn 10 huma appoġġati finanzjarjament mill-Faċilità għall-Irkupru u r-Reżiljenza u xi wħud huma kkomplementati mill-fondi tal-politika ta' koeżjoni.

(23) Fir-rigward tal-prijorità komuni ta' tranżizzjoni ekoloġika u diġitali ġusta, inkluż l-objettivi klimatiċi stabbiliti fir-Regolament (UE) 2021/1119, il-pjan jinkludi diversi miżuri bħall-investiment fl-enerġija rinnovabbli (irrakkomandat fl-2022, fl-2023 u fl-2024), il-promozzjoni tal-użu ta' pannelli fotovoltajċi, u l-appoġġ tal-gvern għall-prinċipji tal-ekonomija ċirkolari. Il-pjan jikkonferma l-appoġġ tal-awtoritajiet għall-Pjan Nazzjonali aġġornat għall-Enerġija u l-Klima. Barra minn hekk, filwaqt li jirrikonoxxi li t-trasport huwa l-akbar kontributur tal-Lussemburgu għall-emissjonijiet ta' gassijiet serra, il-pjan jenfasizza d-dekarbonizzazzjoni tat-trasport (irrakkomandat fl-2019, l-2020, l-2022, l-2023 u l-2024), permezz tal-elettrifikazzjoni, l-użu tal-enerġija rinnovabbli, u infrastruttura mtejba tat-trasport pubbliku, inkluż investimenti fin-networks ferrovjarji, tat-tramm u tal-karozzi tal-linja. Dawn l-inizjattivi jindirizzaw direttament l-objettivi tat-tranżizzjoni klimatika u tas-sigurtà tal-enerġija. Il-miżuri għandhom l-għan li jżidu l-investimenti fit-teknoloġiji ekoloġiċi u fl-infrastruttura tal-enerġija sostenibbli kruċjali għal-Lussemburgu biex jilħaq il-miri nazzjonali tiegħu u dawk definiti mill-UE.

(24) Fir-rigward tal-prijorità komuni tar-reżiljenza soċjali u ekonomika, inkluż il-Pilastru Ewropew tad-Drittijiet Soċjali, il-pjan jinkludi miżuri biex jiġu indirizzati kwistjonijiet ta' affordabbiltà u disponibbiltà tal-akkomodazzjoni aggravati mit-tkabbir rapidu tal-popolazzjoni xprunat minn dinamika qawwija tas-suq tax-xogħol. Azzjonijiet speċifiċi jinkludu ż-żieda fil-provvista tal-akkomodazzjoni (irrakkomandata fl-2019, fl-2020, fl-2023 u fl-2024) permezz ta' proċeduri simplifikati ta' ppjanar u ħidma li għaddejja fuq ir-riforma tat-taxxi fuq il-proprjetà, it-tbegħid minn tassazzjoni bbażata fuq it-tranżazzjonijiet lejn tassazzjoni rikorrenti fuq il-proprjetà u l-introduzzjoni ta' taxxa ġdida fuq art tajba għall-kostruzzjoni mhux użata. Barra minn hekk, il-miżuri jippromwovu l-ugwaljanza fis-sistema edukattiva b'enfasi fuq l-edukazzjoni multilingwi u inklużiva li tiżgura opportunitajiet indaqs għall-istudenti kollha, filwaqt li tindirizza r-rakkomandazzjonijiet fl-2022, fl-2023 u fl-2024 biex jitnaqqas l-impatt tal-inugwaljanzi fuq il-prestazzjoni tal-istudenti. Il-miżuri jinkludu investimenti kontinwi fir-riċerka edukattiva, ambjenti innovattivi ta' tagħlim, u sistema msaħħa ta' appoġġ għall-edukazzjoni inklużiva. Pereżempju, permezz tal-Liġi l-ġdida għall-istudenti li jkunu għadhom kif waslu, li għandha l-għan li tipprovdi tranżizzjoni bla xkiel lill-istudenti l-ġodda u lill-familji tagħhom, u billi tintroduċi approċċ ġdid għall-edukazzjoni tal-matematika f'kuntest multilingwi. Il-pjan jinkludi miżura waħda biex tiżdied ir-rata ta' impjieg ta' ħaddiema akbar fl-età permezz ta' opportunitajiet ta' impjieg imtejba (rakkomandata fl-2019). Inizjattivi bħat-titjib tal-ħiliet u t-taħriġ mill-ġdid kontinwi tal-forza tax-xogħol, u l-estensjoni tal-offerta ta' taħriġ vokazzjonali (irrakkomandati fl-2019, fl-2023 u fl-2024), għandhom il-potenzjal li jikkontribwixxu b'mod pożittiv.

(25) Fir-rigward tal-prijorità komuni tas-sigurtà tal-enerġija, il-pjan jinkludi investimenti sinifikanti fl-infrastruttura tal-enerġija, inkluż l-iżvilupp ta' kapaċitajiet ġodda tal-grilja tal-elettriku bħal linja ġdida ta' interkonnessjoni ta' 380 kV bejn il-Ġermanja u l-Lussemburgu u l-promozzjoni tal-infrastruttura tal-idroġenu. Pereżempju, permezz tal-grupp ta' interess ekonomiku Ewropew Grande Région Hydrogen, bi proġett li jinvolvi l-kostruzzjoni ta' network ta' pipelines tal-idroġenu ta' 100 km ibbażat fuq infrastruttura tat-trasport tal-gass naturali ta' 70 km. Dan in-network ta' distribuzzjoni mistenni jkun operattiv sal-2027. Dawn il-miżuri huma allinjati mar-rakkomandazzjonijiet fl-2022, fl-2023 u fl-2024 dwar l-iżgurar tar-reżiljenza tal-provvista tal-enerġija, filwaqt li jikkontribwixxu wkoll għat-tnaqqis tad-dipendenza fuq il-fjuwils fossili. L-investimenti huma essenzjali biex jappoġġaw il-bidliet ekonomiċi u demografiċi tal-Lussemburgu u l-elettrifikazzjoni wiesgħa ta' diversi setturi.

(26) Fir-rigward tal-prijorità komuni tal-kapaċitajiet ta' difiża, il-pjan jenfasizza t-trasformazzjoni tal-Armata Lussemburgiża biex tirrispondi aħjar għall-isfidi ġeopolitiċi attwali, inkluż l-iżvilupp ta' kapaċitajiet militari fl-oqsma tal-avjazzjoni, dik ċibernetika dik spazjali. Barra minn hekk, tngħata prijorità l-formazzjoni ta' battaljun binazzjonali Belġjan-Lussemburgiż għar-rikonjizzjoni fil-kumbattiment u proġetti ffukati fuq ir-reżiljenza tas-soċjetà.

(27) Barra minn hekk, il-pjan jinkludi miżuri oħra ta' politika li jmorru lil hinn mill-prijoritajiet komuni tal-UE, inkluż miżuri għall-appoġġ ta' politiki avvanzati ta' riċerka, żvilupp u innovazzjoni (rakkomandati fl-2019, fl-2020 u fl-2024) permezz tal-istabbiliment ta' park tax-xjenza u t-teknoloġija, it-tiġdid ta' skemi ta' għajnuna għar-R&Ż u l-innovazzjoni, u t-trawwim ta' kollaborazzjonijiet pubbliċi-privati. Dawn l-inizjattivi għandhom l-għan li jsaħħu l-kompetittività u l-produttività tal-Lussemburgu billi jiffukaw fuq teknoloġiji emerġenti u inizjattivi ta' diġitalizzazzjoni għall-SMEs, filwaqt li jikkontribwixxu kemm għal tranżizzjonijiet ekoloġiċi kif ukoll għal dawk diġitali ġusti.

(28) Il-pjan jipprovdi informazzjoni dwar il-konsistenza u, fejn xieraq, il-komplementarjetà, mal-fondi tal-Politika ta' koeżjoni u mal-pjan għall-irkupru u r-reżiljenza (RRP) tal-Lussemburgu. Il-gvern żgura li l-inizjattivi elenkati jappoġġaw l-isforzi li għaddejjin taħt l-RRP, speċjalment fl-oqsma tat-tranżizzjonijiet ekoloġiċi u diġitali, kif ukoll il-koeżjoni soċjali.

(29) Il-pjan għandu l-għan li jikkontribwixxi għall-issodisfar tal-ħtiġijiet ta' investiment pubbliku tal-Lussemburgu b'rabta mal-prijoritajiet komuni tal-UE. Għat-tranżizzjoni ekoloġika, jidentifika l-investimenti fl-infrastruttura tal-enerġija rinnovabbli u fil-miżuri tal-effiċjenza enerġetika. Rigward ir-reżiljenza soċjali u ekonomika, jenfasizza l-ħtieġa għal investiment kontinwu fl-edukazzjoni, miżuri ta' koeżjoni soċjali, u żieda fil-provvista tal-akkomodazzjoni. Il-ħtiġijiet tas-sigurtà tal-enerġija jiffukaw fuq it-titjib tal-grilja tal-enerġija u tal-infrastruttura tal-idroġenu. Fil-kapaċitajiet ta' difiża, jissottolinja l-ħtieġa ta' nfiq militari msaħħaħ u jipprevedi żieda fil-baġit għad-difiża lejn il-kisba ta' 2 % tal-isforz ta' difiża tal-ING sal-2030, f'allinjament mal-impenji tan-NATO.

(30) B'mod ġenerali, il-Kummissjoni tqis li l-pjan tal-Lussemburgu jissodisfa r-rekwiżiti tar-Regolament (UE) 2024/1263.

(31) Il-Kunsill jilqa' l-pjan fiskali-strutturali fuq terminu medju tal-Lussemburgu u jqis li l-implimentazzjoni sħiħa tiegħu twassal biex jiġu żgurati finanzi pubbliċi sodi u tiġi appoġġata s-sostenibbiltà tad-dejn pubbliku kif ukoll tkabbir sostenibbli u inklużiv.

(32) Il-Kunsill jieħu nota tal-valutazzjoni tal-Kummissjoni tal-pjan. Madankollu, il-Kunsill jistieden lill-Kummissjoni tippreżenta l-valutazzjoni tagħha tal-pjanijiet futuri f'dokument separat mir-rakkomandazzjonijiet tal-Kummissjoni għar-rakkomandazzjonijiet tal-Kunsill.

(33) Il-Kunsill jieħu nota tal-valutazzjoni tal-Kummissjoni tal-perkors tan-nefqa netta u s-suppożizzjonijiet makroekonomiċi ewlenin fil-pjan kif ukoll l-implikazzjonijiet tal-perkors tan-nefqa netta tal-pjan għad-defiċit u d-dejn tal-gvern. Il-Kunsill jieħu nota tal-valutazzjoni tal-Kummissjoni li s-suppożizzjonijiet makroekonomiċi u fiskali, filwaqt li f'xi każijiet huma differenti mis-suppożizzjonijiet tal-Kummissjoni, inkluż biex jipprovdu għal data makroekonomika u fiskali aġġornata, huma ġeneralment debitament ġustifikati u sostnuti minn argumenti ekonomiċi sodi. Il-Kunsill jieħu nota tal-istrateġija fiskali wiesgħa tal-pjan u r-riskji għall-prospettiva, li jistgħu jaffettwaw il-materjalizzazzjoni tax-xenarju makroekonomiku u s-suppożizzjonijiet sottostanti u t-twettiq tal-perkors tan-nefqa netta tal-pjan. B'mod partikolari, il-Kunsill jilqa' wkoll li l-partijiet ikkonċernati rilevanti kienu involuti fil-livell nazzjonali qabel il-preżentazzjoni tal-pjan. Il-Kunsill jinnota wkoll li r-riskji ġeopolitiċi jistgħu jagħmlu pressjoni fuq in-nefqiet tad-difiża.

(34) Il-Kunsill jistenna li l-Lussemburgu jkun lest jaġġusta l-istrateġija fiskali tiegħu kif meħtieġ biex jiżgura t-twettiq tal-perkors tan-nefqa netta tiegħu. Il-Kunsill huwa determinat li jissorvelja mill-qrib l-iżviluppi ekonomiċi u fiskali, inkluż dawk sottostanti għax-xenarju tal-pjan.

(35) Il-Kunsill iqis li aktar diskussjonijiet biex jinstab fehim komuni dwar l-implikazzjonijiet ta' sorveljanza annwali tar-rati ta' tkabbir kumulattiv tan-nefqa netta huma meħtieġa fil-ħin għaċ-ċiklu li jmiss ta' sorveljanza fiskali.

(36) Il-Kunsill jieħu nota tad-deskrizzjoni tal-Kummissjoni tar-riformi u l-ħtiġijiet u l-intenzjonijiet ta' investiment b'reazzjoni għall-isfidi ewlenin identifikati fil-kuntest tas-Semestru Ewropew, u jenfasizza l-importanza li jiġi żgurat it-twettiq ta' tali riformi u investimenti. Il-Kunsill, abbażi tar-rapporti ppreżentati mill-Kummissjoni, ser jivvaluta tali riformi u investimenti u jimmonitorja l-implimentazzjoni tagħhom fil-qafas tas-Semestru Ewropew.

(37) Il-Kunsill jistenna b'interess ir-rapporti ta' progress annwali mil-Lussemburgu li għandu jkun fihom, b'mod partikolari, informazzjoni dwar il-progress fl-implimentazzjoni tal-perkors tan-nefqa netta kif stabbilit mill-Kunsill, u l-implimentazzjoni ta' riformi u investimenti usa' fil-kuntest tas-Semestru Ewropew.

(38) F'konformità mal-Artikolu 17 tar-Regolament (UE) 2024/1263, il-perkors tan-nefqa netta kif stabbilit fil-pjan għandu jiġi rrakkomandat mill-Kunsill lil-Lussemburgu.

B'DAN JIRRAKKOMANDA li l-Lussemburgu: Jiżgura li t-tkabbir fin-nefqa netta ma jaqbiżx il-massimi stabbiliti fl-Anness I ta' din ir-Rakkomandazzjoni. Magħmul fi Brussell, il-21 ta’ Jannar 2025. Għall-Kunsill Il-President A. Domański

ANNEX

ANNESS I Rati massimi ta' tkabbir tan-nefqa netta (rati ta' tkabbir annwali u kumulattivi, f'termini nominali)

Lussemburgu

Snin 2025 2026 2027 2028 2029 Rati ta' tkabbir (%) Kull sena 5,8 4,7 3,8 5,4 4,7 Kumulattiv 14,2 19,6 24,1 30,8 36,9

Versions

1. 2025-01-21